Rokstu sagataveja: portals lakuga.lv

Sagaidūt jau catūrtū oficiali svietejamū Latgolys kongresa dīnu (27. aprelī) un popularizejūt latgalīšu rokstu volūdu, tymā izdūtuos gruomotys, vysi interesenti aicynuoti īsasaisteit rodūšajā aktivitatē “Latgalīšu gruomotys runoj”, informej tuos organizatore Skaidrīte Svikša.

Cik saturiski boguotu i skaistu gruomotu ir izdūts latgalīšu rokstu volūdā! Nu senejūs izdavumu viesturiskuos i poligrafiskūs īspieju īrūbežuoteibys da myusu dīnu kruosainūs gruomotu plyudu –  tys vyss ir myusu, latgalīšu, literaturys daļa. Nūslaucēsim putekļus i ceļsim tū gaismā i pi reizis – radeisim jaunus vuordu salykumus i ryndys, kas ļaus sev i cytim gon pasmaideit, gon aizadūmuot.

Pīsadaleit var kotrs interesents individuali voi ari īsasaistūt kaidā nu grupu:

1. školys (klašu grupys školuotuoju vadeibā);
2. bibliotekys un muzeji (individuali voi grupu dorbi);
3. dzejnīki, rakstnīki (ar sovu voi kolegu izdūtūs gruomotu rodūšu apkūpuojumu).

Bibliotekā, sātā gruomotu plauktā voi internetā atrūnit gruomotys latgalīšu volūdā, salīcit tūs mugurenis vīnu iz ūtrys voi vuokus, taisūt vuordu salykumus, teikumus voi pat dzejis ryndys i nalelus stuosteņus! Teksta lobskaņai var izmontuot saikļus i vuordūs lūceit. Vīnā biļdē sakombinejit i nūfotografejit izmontuotuos gruomotys, kluot pīrokstit saguojušū interesantū salykumu i da 20. apreļa atsyutit iz e-posta adresi byusim.viteji@inbox.lv, nūruodit kontaktinformaceju (telefona numeri, e-posta adresi), vuordu i uzvuordu, pīsadolot individuali voi kaidā grupā; školu, klasi, školānus, kas īsasaistēja, i školuotuoju;  biblioteku i muzeju gadīnī – darbinīkus, kuri veiduoja rodūšū dorbu, i personu, ar kuru organizatorim sasazynuot. Latgolys dzejnīki, rakstnīki aicynuoti spielētīs [popularizēt!] ar sovu voi kolegu gruomotu nūsaukumim.

Bibliotekys aicynuotys mudynuot sovus laseituojus pīsadaleit aktivitatē un aprelī izveiduot kaidu styureiti ar latgalīšu gruomotom, lai laseituojs iz vītys, apmeklejūt biblioteku, var izveiduot sovu salykumu! Taipoš školuos itū aktivitati aicynoj izmontuot gon latvīšu volūdys stuņdēs, gon organizejūt nūvodvuiceibys stuņdis i rezultatu īsyuteit iz nūruodeitū adresi.

Aktivitate tyka suokta jau 2021. goda majā “Vietējās Latgales Avīzes” lopā “Byusim Vītejī” i paļdis tim atsauceigajim, kas sovus rodūšūs atrodumus jau atsyutiejuši (jūs darbeni teik īkļauti kūpejā daleibnku sarokstā i vārtāti), bet nūteikti var meklēt i radeit vēļ!

Rodūšū aktivitati organizej “Vietējā Latgales Avīze” un Rēzeknis Centraluo biblioteka. Saturiski interesantuokūs un originaluokūs dorbu autorim paradzātys bolvys. Piec konkursa salykumi tiks publicāti Rēzeknis Centraluos bibliotekys sātyslopā, lobuokī dorbi ari “Vietējā Latgales Avīzē”.