Rokstu sagataveja: portals lakuga.lv

Kab gūdynuotu izcyluo nūvodnīka, dzejnīka Pītera Jurciņa pīmiņu i turpynuotu jau 2005. godā aizsuoktū konkursa tradiceju, Rēzeknis nūvoda Nautrānu pogosta puorvaļde izsludynoj literatu konkursu, informej Nautrānu pogosta kulturys pasuokumu organizatore Inga Vigule.

Itūgod konkursa moto ir Pītera Jurciņa vuordi: “Var tymsā pakrist redzeigais, bet naredzeigais – gaismā puortapt.”

Konkursā var pīsadaleit kotrys, kurs ir pīrakstejs nūlykumam atbylstūšu, vēļ napublicātu dorbu latgalīšu volūdā. Dorbi tiks vārtāti pīcuos nominacejuos: dzeja, proza, skečs voi vīncielīņs, bārnu literatura i latgaliskūs vierteibu paruodeišona sevkura dailliteraturys žanra dorbā. Konkursam dorbi juoatsyuta leidz 22. juņam (īskaitūt) pa postu (“Pagastmāja”, Rogovka, Nautrēnu pagasts, Rēzeknes novads, LV-4652, ar nūruodi “Literatu konkursam”) voi elektroniski (iz e-postu: inga.vigule@rezeknesnovads.lv ), nūruodūt autora vuordu, uzvuordu, telefona numeri, adresu, nūsadorbuošonu.

Konkursa laureatu apbolvuošona nūtiks 2022. goda 29. juņa pasuokumā “Pīterdīna Rogovkā” Rēzeknis nūvoda Nautrānu pogostā. Kotrys nominacejis laureats sajims naudys premeju 100 eiro apmārā, kai ari byus specbolva nu Latgalīšu volūdys, literaturys i kulturviesturis školuotuoju asociacejis (LVLKŠA) par bārnu prozu latgalīšu volūdā.

Vaira informacejis par konkursu var puorskaiteit tuo nūlykumā.