Rokstu sagataveja: portals lakuga.lv

8. aprelī 19.00 stuņdēs Lubuonys piļsātys klubā nūtiks gruomotys “Broņislavas Martuževas likteņgaitu klade” attaiseišonys svātki, informej B. Martuževys fonda “Rakstītāja” vadeituoja Anna Egliena. Pasuokums nūtiks taišni pošys dzejneicys 98. dzimšonys dīnā.

2020. godā ar Latgolys kulturys programys atbolstu muzykaluo grupa “Baltie lāči” (redaktore: Baiba Baltace-Saukāne) izdeve gruomotu “Broņislavas Martuževas likteņgaitu klade”. Tys beja pandemejis laiks, partū taidus eistus liktiņgaitu kladis attaiseišonys svātkus svieteit nasaguoja. Tiraža tyka izplateita Latgolys nūvoda školuos i bibliotekuos, niu “Baltie lāči” izdūd papyldu tiražu, i pasuokuma laikā klade byus nūpierkama.

Bronislavys Martuževys (1924–2012) dzeivis stuosta i rodūšuos biografejis daudzynuojums nas sevī jaudeigus impulsus lobuokai Latvejis viesturis saprasšonai godu symta garumā i īdvasmu vierzeibai iz prīšku. Lai ari itei liktiņgaitu klade var breineigi nūderēt sevkura vacuma auditorejai, vīns nu mierku beja radeit školuos vuiceibu procesā izmontuojamu materialu lobuokai nūtikšonu izpratnei Latvejā 20. godu symtā, tei savyn ari dažaidus vuiceibu prīškmatus – viesturi, kulturviesturi, literaturu i muzyku. Gruomotys pīcuos nūdaļuos hronologiskā seceibā viesteits par pīcim Bronislavys Martuževys dzeivis pūsmim, kotrā nu nūdaļu ir četrys dalis: viesturiskais kontekts (autors: Kaspars Strods), liktiņgaitys (autore: Anna Egliena), dzeja rūkrokstā i muzyka (notu salykumā).

Atbylstūši liktiņgaitu kladis saturam svātku programu pīcuos daļuos ar dzeju i dzīsmem veidoj Bierzpiļs vydsškolys i Lubuonys vydsškolys školāni, tū papyldynoj Bierzpiļs folklorys kūpa “Saivenis”, Lubuonys jauktais vokalais ansamblis “Naktsputni” i grupa “Baltie lāči”.

Īīšona pasuokumā bez moksys.