Rokstu sagataveja: portals lakuga.lv

Smoguos muzykys cīneituoji aicynuoti apmeklēt Ukrainys atbolsta koncertu “Latvian Metal Supports Ukraine”, kas nūtiks 23. aprelī nu 19.00 da 23.00 stuņžu Daugovpiļs Kulturys pilī, viestej informaceja Daugovpiļs vaļstspiļsātys sātyslopā. Lobdareibys koncertā pīsadaleis folkmetala grupa “Varang Nord” (Daugovpiļs), latvīšu smoguos muzykys legenda “Preternatural” (Reiga) i progresivī “Stagnant Project” (Reiga).

“Itymā Ukrainai i vysam civilizātajam pasauļam gryutajā laikā ari mes kai muziki gribim dūt atbolstu, dorūt tū, kū vyslobuok muokam – spielēt, itūreiz vuocūt zīduojumus Ukrainai. Ūtrys – ar itū koncertu mes gribim solidarizētīs i paust skaidru nūstuoju – mes asam par Ukrainu i pret Krīvejis suoktū karu,” soka pasuokuma idejis autori i organizatori grupa “Varang Nord”.

Sadarbeibā ar lobdareibys organizaceju Ziedot.lv pasuokuma laikā vuoks zīduojumus Ukrainys atbolstam – byus vareiba veikt skaidrys naudys zīduojumus Ziedot.lv kasteitēs, kai ari koncerta apmaklātuoji tiks aicynuoti zvaneit iz zīduojumu numeri 9000 6086 (moksa par zvonu: 1,42 eiro).

Jemūt vārā īrūbežuotū vītu skaitu (tik stuovvītys), īīšona ar īlyugumim, kurūs juorezervej īprīkš “Biļešu Paradīze” kasēs voi škārsteiklā.

Aplīcynojūt sovu atbolstu Ukrainai, vysi dalinīki koncertā pīsadola breivpruoteigai. Pasuokumu organizej Daugovpiļs vaļstspiļsātys pošvaļdeibys Kulturys puorvaļde sadarbeibā ar uzjāmumu “MuzPro” i grupu “Varang Nord”, atbolsta Ziedot.lv i “Biļešu Paradīze”.