Grupa “Bez PVN” prezentējuse videoklipu dzīsmei “Pīci elementi”

Grupa “Bez PVN” prezentējuse videoklipu dzīsmei “Pīci elementi”

Rokstu sagataveja: portals lakuga.lv

Grupa “Bez PVN” prezentējuse jaunu videoklipu – tymā īmyužynuota dzīsme “Pīci elementi” (Porcelans), kurū pyrmū reizi beja vareiba dzierdēt ituo gods Latgalīšu kulturys goda bolvys “Boņuks” ceremonejā Latgolys viestnīceibā GORS.

Skaneigi jaunumi nu grupys “Bez PVN” nabeja bejuši jau vaira nakai godu, kod pārnejuo gods martā izguoja grupys trešais albums “Bezgaleibys”. Niu, apreļa vydā, pyrmizruodi pīdzeivoj videoklips grupys jaunuokajai dzīsmei “Pīci elementi” (Porcelans). Klipu veiduojs Ivars Utināns, ar kuru grupa jau da ituo sasadorbuojuse vairuoku videoklipu taiseišonā, bet tymā golvonuos varūnis lūmā īsajutuse aktrise Jolanta Znuotiņa. Jolantu latgaliskuos kulturys i literaturys interesenti kūpā ar Kristapu Rasimu nu “Bez PVN” varēja redzēt ari Ontona Kūkoja dailradei veļteitajā dzejis izruodē-kinā “Pa mīlesteibu brīnūt, kuojis nasaļ”. Videoklipa horeografe ir Arina Buboviča, grima muokslineica Jana Kozlova, bet grupys styls ir dizaineris Laimys Jurčys sadarbeibā ar vizualū muokslineicu Martu Veinbergu topušuo kolekceja “Collective Blanket”. Interesants fakts – mūdis muokslineica Laima Jurča taipat kai grupys “Bez PVN” dybynuotuoji Kristaps i Guntis Rasimi īt nu Kuorsovys. Pats klips filmāts “Studio Imagine”.

Prezentejūt jaunū video, grupa “Bez PVN” soka: “Itys video tyka filmāts breidī, kod Krīveja nažieleigi ībruka Ukrainā. Mes tycom, ka Ukrainā dreiži atīs plaukstūšs majs. I otkon zīdēs saulispučis.”

Dzīsmis “Pīci elementi” muzykys autori ir grupys dalinīki, bet vuordus sarakstejs Kristaps Rasims. Dzīsmis īrokstā sūpluok grupys dalinīkim – Kristapam Rasimam (bolss, elektriskuo gitara), Guntim Rasimam (bolss, akustiskuo gitara), Juram Vucānam (bolss, elektriskuo gitara, tausteni), Valdim Vucānam (bass) i Normanam Bārbalam (bungys) – pīsadalejuši ari altiste Zane Dziesma i trompetists Deniss Smirnovs. Dzīsme “Pīci elementi” (Porcelans) īraksteita studejā “Reigā” i studejā “Hodila Records” pi Girta Laumaņa, bet dzīsmis miksu taisejs Armands Treilihs.

Kalenders

Jun
19
Cat
06:45 Pasuokums “FIZISKAIS RŪBEŽS: kul...
Pasuokums “FIZISKAIS RŪBEŽS: kul...
Jun 19 @ 06:45 – 18:45
Pasuokums "FIZISKAIS RŪBEŽS: kulturys nūzeime i pīejameiba Latvejis austrumu regionā"
Latgolys muokslys i kulturys platforma MUD LAB aicynoj iz storpdisciplinaru pasuokumu FIZISKAIS RŪBEŽS, kas nūtiks Leivuonā ituo gods 19. junī, daudzfunkcionaluo jaunīšu iniciativu centra “Kvartāls” futbola laukumā i Leivuon dzeļžaceļa stacejā. Pasuokums, kurā pīsadaleis kai[...]
18:00 Seminars “Viesturis olūtu komple... @ Kruoslovys nūvoda muzejs
Seminars “Viesturis olūtu komple... @ Kruoslovys nūvoda muzejs
Jun 19 @ 18:00
Seminars "Viesturis olūtu kompleksuo izpiete: mutvuordu viesturis olūti i fotografejis" @ Kruoslovys nūvoda muzejs
19. junī 18.00 stuņdēs Kruoslovys nūvoda muzejā nūtiks seminars “Viesturis olūtu kompleksuo izpiete: mutvuordu viesturis olūti i fotografejis”.
18:30 Izruode “Melnais piens/2024” @ Jaunais Reigys teatris
Izruode “Melnais piens/2024” @ Jaunais Reigys teatris
Jun 19 @ 18:30 – 20:15
Paguojuši 15 godi, kai JRT roduos izruode “Melnais piens”. Itei izruode paruoda, ka teatram nav obligati vysod juobyut baļsteitam iz destrukceju i konfliktim. Tys var byut ari par harmoneju i skaistumu, koč i skumeigu. Vizuali[...]