Ligija Purinaša storptautyskā projektā sasadorboj ar dzejneicu nu Skotejis

Ligija Purinaša storptautyskā projektā sasadorboj ar dzejneicu nu Skotejis

Rokstu sagataveja: portals lakuga.lv

Latgalīšu literate Ligija Purinaša niu pīsadola storptautyskā projektā, kurā cytu vaļstu autori sadarbeibā ar dzejnīkim nu Lelbritanejis roda jaunus tekstus. Ar Ligijis i Skotejis dzejneicys Dženys Hadfīldys (Jen Hadfield) sadarbeibys rezultatu varēs īpasazeit pasuokumā “New European Poetry Night”, kas 25. aprelī nūtiks tīšsaistē.

Platformys “Latvian Literature” puorstuove Ildze Jansone stuosta, ka īprīškejūs godūs “Latvian Literature” ir aktivai sasadorbuojuse ar EUNIC (European Union national Institutes of culture) Londonā Eiropys literaturys festivalā, tok itaida virtualā rezidence nūteik pyrmūreiz. Kotru godu EUNIC Londonā izsludynoj konkursu, kuruo rezultatā teik izvālāti konkretu Eiropys vaļstu autori, kas pīsadola itymūs pasuokumos. 2021. goda konkursā tyka dasaceiti treis latvīšu autori, kuri atbylda organizatoru izvierzeitajim nūsacejumim: autoram ir juobyut kaidam dorbam, kas jau ir izdūts Lelbritanejā, autors runoj angļu volūdā i ir gotovs pīsadaleit rezidencē sadarbeibā ar vītejū, Lelbritanejis, autoru. Kai zynoms, 2020. goda rudinī Londonys izdevnīceibā “Francis Boutle Publishers” tyka izdūta bilingvala dzejis antologeja “The Last Model/Pādejais modeļs”, kurā apkūpuoti Ligijis Purinašys, Raibuo i Ingridys Tāraudys dzejūli. Daleibai projektā tyka izvālāta taišni Ligija Purinaša, kura niu sasadorboj ar Dženu Hadfīldu.

Džena Hadfīlda ir skotu dzejneica i vizualuo muokslineica, kas niu dzeivoj Šetlendys soluos. Jei ir izdavuse četrus dzejūļu kruojumus i ir jaunuokuo sīvīšu autore, kas sajāmuse T. S. Eliota bolvu (2008) par sovu ūtrū dzejūļu kruojumu “Night-No-Place”.

Ligija Purinaša par daleibu projektā soka: “Ar Dženu nikod naasam sasatykušs, vīna ūtru napazeistom, bet epistularā formā rodom jaunus tekstus saskaņā vīna ar ūtru i sovom sajiutom par nūteikūšū apleik i sevī. Maņ deļ ituo pasuokuma ir taps teksts angliski, kū pate asu atdzejuojuse latgaliski – raugūt izaicynuot sevi i aktualizēt tū, ka nu vīnys pusis dzeja ir universala, bet nu ūtrys pusis – taišni volūda ir interpretacejis reiks tekstam. Byušona pa vydu sovai identitatei i vyspuorciļvieciskuom, eiropeiskuom vierteibom, pa munam, tagad ir izaicynuojums. Kotrs projekts maņ īvuica nazkū jaunu, i ari ite vuicūs augt i dareit – maņ ceļā goduos breineigi cylvāki.”

“New European Poetry Night” nūtiks 25. aprelī 21.30 stuņdēs piec Latvejis laika (19.30 piec Lelbritanejis laika). Tamā kūpā ar Lelbritanejis autorim pīsadaleis na tik Ligija, bet ari literati nu Kiprys i Vuocejis, kas ari pīsadola projektā. Pasuokumā jī runuos par tulkuošonys i īdvasmys procesim, kai ari pyrmū reizi īpazeistynuos publikys ar jaundorbim, kas radeiti projekta laikā. Pasuokums nūtiks Zoom platformā, tok iz tū juoīsaguodoj belets, kas moksoj 3 mārcenis. Vaira informacejis par pasuokumu var atrast ITE.

Print Friendly, PDF & Email

Nūtikšonu kalendars

Jan
28
Sai
12:00 Puorguojīņs pa Rēzekni “Piļsāta ... @ Rēzekne
Puorguojīņs pa Rēzekni “Piļsāta ... @ Rēzekne
Jan 28 @ 12:00 – 15:00
28.janvarī gaidoms puorguojīņs pa Rēzekni “Piļsāta pi upis i storp stacejom”. Plānuots apmāram 3 stuņžu laikā nūīt ap 7 kilometrim. Tū suoks pi dzeļžaceļa stacejis “Rēzekne II”, varēs izzynuot, ar kū tei ir seviška. Tuoļuok[...]
21:00 “Muzikālā banka 2022” @ Daugovpiļs Olimpiskais centrs
“Muzikālā banka 2022” @ Daugovpiļs Olimpiskais centrs
Jan 28 @ 21:00 – 23:30
Daugovpiļs Olimpiskajā centrā otkon nūtiks Latvejis Radejis 2 goda vierteiguokūs pop i rokdzīšmu aptaujis “Muzikālā banka 2022” apbolvuošonys ceremoneja. Jau īrostai “Muzikālās Bankas” finala koncertšovs byus dinamiski kruošņs, muzykali vierīneigs i īspaideigs, pīsadolūt aizvadeituo gods Latvejis[...]