Rokstu sagataveja: portals lakuga.lv

Svietejūt Latgolys kongresa dīnu, bīdreiba “LgSC” i latgalīšu kulturys ziņu portals lakuga.lv aktualizej akceju “Latgalīšu volūdai draudzeiga vīta” i aicynoj tamā īsasaisteit jaunus dalinīkus – uzjiemiejus, organizacejis, vaļsts i pošvaļdeibu īstuodis. Taipat itūgod akcejā paradzātys vairuokys jaunys aktivitatis, kab rūsynuotu leluoku latgalīšu volūdys lītuošonu kasdīnā i veicynuotu sabīdreibys izpratni par latgalīšu volūdys vierteibu i pozitivu attīksmi pret jū.

Akcejis i eipašys atzeimis, kab rūsynuotu sabīdreibu lītuot sovu dzymtū voi kaidam regionam eipašū volūdu pasaulī ir īrosta prakse. Eipašys uzleimis, kab atzeimātu latgalīšu volūdai draudzeiguos vītys, tykušys radeitys jau pyrma laika, bet kai sabīdreibys īsaistis kampaņa “Latgalīšu volūdai draudzeiga vīta” aizsuokta 2020. godā. Akcejis mierkis ir mudynuot latgalīšus kasdīnys saziņā izmontuot dzymtū volūdu, kai ari veicynuot sabīdreibys izpratni par latgalīšu volūdys vierteibu i pozitivu attīksmi pret jū. Kasdīnys saziņā latgalīšu volūdu izmontoj napylni 9 % Latvejis īdzeivuotuoju, bet Latgolys regionā viņ trešdaļa Latgolys īdzeivuotuoju, i volūdai ir cīši lela nūzeime latgaliski latvyskuos identitatis saglobuošonā.

Itūšaļt akcejā “Latgalīšu volūdai draudzeiga vīta” jau īsasaistejuši vaira nakai 90 dalinīku – uzjiemieji, navaļstiskuos organizacejis, pošvaļdeibu i vaļstis īstuodis kai Latgolā, tai cytur Latvejā i pasaulī. Itūgod akcejis mierkis ir aicynuot tamā īsasaisteit jaunus dalinīkus, aktivizēt jau asūšūs i rūsynuot ari leluoku sabīdreibys pīsadaleišonu. Bīdreiba “LgSC” i portals lakuga.lv itūgod īcerējuši vaira stuosteit, informēt sabīdreibu par akcejis dalinīkim – latgalīšu volūdai draudzeigajom vītom, taipat vosorys suokumā tiks izsludynuota itamuos vītuos gasteišonys aktivitate, kū apvīnuot ar Latgolys apceļuošonu, kai ari tiks sagataveits akcejis ceļveds i eistynuotys cytys aktivitatis.

Kab pīsadaleitu akcejā, interesenti aicynuoti aizpiļdeit dasacejuma anketu, kas atrūnoma akcejis lopā http://lakuga.lv/ltg-vita. Kotrys akcejis dalinīks var sajimt ari uzleimi “Latgalīšu volūdai draudzeiga vīta”, kurū var izmontuot kai vītys atpazeišonys zeimi i īdrūsynuojumu sabīdreibai ite runuot latgaliski. Vīns nu veidu, kai uzjiemieji var aktivi īsasaisteit, ir taiseit specialus pīduovuojumus, par pīmāru, latgaliski runojūšajim klientim pīduovuot kaidu atlaidi precei voi pakolpuojumam. Taipat bīdreibys “LgSC” aktivisti i portala lakuga.lv komanda ir gotovi vysod pakonsultēt akcejis dalinīkus pareizys latgalīšu rokstu volūdys vaicuojumūs.

Aicynojūt pīsadaleit akcejā, bīdreibys “LgSC” vadeituoja Edeite Husare soka: “Apzynojūt latgalīšu volūdai draudzeiguos vītys, asam sacynuojuši, ka runuošonai sabīdreibā latgaliski ir diveji atslāga vuordi – suokšona i entuziasms. Ir daudzys vītys, kuruos var runuot latgaliski, bet golvonais ir kaida pyrmais sūļs – klienta voi uzjiemieja, īstuodis puorstuova – ka īsuoc runuot latgaliski, tod tai saruna ari turpynojās. Taipat tū, cik latgaliska ir vide Latgolā, nūsoka pošu vītu i sabīdreibys entuziams runuot, dareit, reikuot koč kū latgaliski – dīvamžāļ pamatā niu vyss cikom turīs viņ iz tuo. Tī statistikys dati, kas publiski daīmami par latgalīšu volūdys lītuošonu, nav cīši prīcynojūši, nu vys tik turim nūceju, ka ar itaidom i cytaida veida aktivitatem vys tik var raudzeit rūsynuot sabīdreibu vaira runuot latgaliski.”

Akcejis “Latgalīšu volūdai draudzeiga vīta” nūtikšonu 2022. godā finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.