Eiropys kulturys golvyspiļsāta 2027. godā byus Līpuoja

Eiropys kulturys golvyspiļsāta 2027. godā byus Līpuoja

Rokstu sagataveja: portals lakuga.lv

Ūtardiņ, 10. majā, storptautyska naatkareigu ekspertu žureja pabeidze dorbu pi konkursa “Eiropas kultūras galvaspilsēta 2027” finalistu izviertiešonys i paziņuoja Eiropys kulturys golvyspiļsātys 2027 titula sajiemieju Latvejā. 2027. godā Eiropys kulturys golvyspiļsāta byus Līpuoja.

Konkursa “Eiropas kultūras galvaspilsēta 2027” finala kuortā saceņseiba nūtyka storp treis Latvejis piļsātom – Daugovpili, Līpuoju i Valmīru. Vysys treis piļsātys nedeļā nu 2. da 6. maja kluotīnis vizeitēs apmeklēja žurejis delegaceja – Beatrise Garsija (Beatriz Garcia) nu Spānejis, Hrvoje Laurenta (Hrvoje Laurenta) nu Horvatejis i obeji Latvejis eksperti – Diāna Čivle i Ģirts Majors, kai ari nūvāruotuoju statusā asūšī Eiropys Komisejis i Kulturys ministrejis puorstuovi.

Daugovpiļs, Līpuojis i Valmīrys dasacejumi konkursa finala kuortā izvārtāti itaiduos kritereju kūpuos: īguļdejums ilgtermeņa strategejā, Eiropys dimenseja, kulturys i muokslys saturs, izpiļdis spieja, sabīdreibys īsaiste i puorvaļdeiba.

Konkursa žurejā dorbuojuos deveni Eiropys Parlamenta, Eiropys Padūmis, Eiropys Komisejis i Eiropys Regionu komitejis atlaseiti eksperti, kai ari div nacionalī eksperti, kurūs izvierzejuse Nacionaluo kulturys padūme i Kulturys ministreja.

Eiropys kulturys golvyspiļsātys nūsaukumu pīškir kotru godu nu 1985. goda. Tū pīškir na vaira kai vīnai piļsātai kotrā nu div ES daleibvaļstu, jemūt vārā eipašā kalendarā nūsaceitu seceibu. Itys kalendars paredz, ka 2027. godā Eiropys kulturys golvyspiļsātys nūsaukumu pīškir div daleibvaļstim – Latvejai i Portugalei. Itaida vareiba Latvejai jau vīnu reizi ir bejuse – 2014. godā Eiropys kulturys golvyspiļsāta beja Reiga reizē ar Zvīdrejis piļsātu Ūmeo. 

Līpuojis dasacejuma koncepcejā “(ne)miers” izveiduota plota, daudzveideigu žanru puorstuovāta pīcu lineju programa, kab runuotu par nūzeimeigom problemom, kas ir aktualys kai Līpuojai, tai Eiropai kūpumā. Kotra nu pīcu programys lineju – “Eiropas sapnis”, “Pilsēta paradokss”, “Jaunatklāj vietējo!”, “Apzinātā mērenība” i “Radošā tālnojauta” – atkluoj stuostu, kas cīši saisteits ar Līpuoju i tuos sasaisti ar Eiropu.

Print Friendly, PDF & Email

Nūtikšonu kalendars

Sep
26
Pyr
17:00 LTG i ES. Dzeivuos sarunys. Eiro... @ Latgolys Centraluo biblioteka
LTG i ES. Dzeivuos sarunys. Eiro... @ Latgolys Centraluo biblioteka
Sep 26 @ 17:00 – 20:00
Pyrmūdiņ, 26. septembrī, “Europe Direct Dienvidlatgale” centrs, bīdreiba “LgSC” i Eiropys Savīneibys informacejis punkts Daugovpilī aicynoj iz Eiropys Volūdu dīnai veļteitu nūtykumu “LTG i ES. Dzeivuos sarunys” Daugovpilī, Latgolys Centralajā bibliotekā. Pasuocīņa laikā dzeivuos bibliotekys[...]
Sep
27
Ūtr
19:00 Latgalīšu rokstu volūdys nūdarbeiba @ tīšsaistē
Latgalīšu rokstu volūdys nūdarbeiba @ tīšsaistē
Sep 27 @ 19:00 – 20:30
Bīdreiba “LgSC” sadarbeibā ar latgalīšu kulturys ziņu portalu lakuga.lv aicynoj iz ostoņom latgalīšu rokstu volūdys tīšsaistis bezmoksys nūdarbeibom, kab kotrys interesents varātu izzynuot vaira par latgalīšu rokstu volūdu i īsavuiceit tuos pamatprincipus. Latgalīšu rokstu volūdys[...]
Oct
1
Sai
vysu dīnu Izstuode “Jura Gaigala akvareļi” @ Latgolys Kulturviesturis muzejs
Izstuode “Jura Gaigala akvareļi” @ Latgolys Kulturviesturis muzejs
Oct 1 vysu dīnu
Nu 21. septembra da 1. oktobra Latgolys Kulturviesturis muzejā apsaverama izstuode “Jura Gaigala akvareļi”. Ceļojūšuo izstuode veļteita gruomotys “Jura Gaigala varavīksne” izīšonys svātkim. Tiks izstuodeitys muokslinīka akvareļgleznys nu meitys Dacis Gaigalys kolekcejis.