Rokstu sagataveja: portals lakuga.lv

Reigys dūmis Piļsātys atteisteibys komiteja atbaļstejuse prīšklykumu puorsaukt Moskovys duorzu par Latgolys parku, viestej informaceja Reigys dūmis sātyslopā. Tai parkam otkon tiks dūts viesturiskais nūsaukums. Lāmumprojektu vēļ juoapstyprynoj Reigys dūmei.

Marta beiguos Reigys dūmē vērsēs latgalīšu navaļstiskūs organizaceju puorstuovi ar bīdreibys “Latgolys Saeima”, Reigys latgalīšu bīdreibys “Trešō Zvaigzne”, Latgolys tradicionaluos kulturys centra “Latgaļu sāta”, bīdreibys “Upītes jauniešu folkloras kopa” i “Latgalīšu kulturys bīdreibys” paraksteitu īsnāgumu, aicynojūt Moskovys duorzam atjaunuot Latgolys duorza viesturiskū nūsaukumu. Reigys vītvuordu i piļsātvidis objektu nūsaukumu komiseja 28. apreļa sēdē lēme atbaļsteit Moskovys duorza puorsaukšonu par Latgolys parku.

Latgolys NVO ari aicynuojušys parkā izveiduot pīminis vītys, kas atguodynuotu par Latgolys sabīdryskūs i kulturys darbinīku īguļdejumu Reigys kulturys i vaļstiskuos identitatis styprynuošonā i atteisteibā vysaidūs laika pūsmūs.

Bīdreibys “Latgolys Saeima” vadeituojs Guntis Rasims soka: “Jemūt vārā Krīvejis suoktū karu Ukrainā i cytus beidzamuo laika nūtykumus, kūpā ar cytom aktivom latgalīšu bīdreibom sasprīdem pīraksteit Reigys dūmei viestuli par vajadzeibu atjaunuot viesturiskū taisneigumu i viesturiskūs nūsaukumus vairuokim ar Latgolys vuordu saisteitim objektim. Vīns nu itūs prīšklykumu ir apstyprynuots, i nazkodejais Latgolys duorzs tiks saukts par Latgolys parku. Mums vysim niu juodūmoj, kai taidus objektus pīpiļdeit ar latgaliskū saturu, aktivitatem, īspiejams, pat tradicionalim pasuokumim. Sagaideisim, kod vysuos kartēs īraksteis itū nūsaukumu, tod ari varēsim koč kū salīdejūšu i vīnojūšu organizēt.”

Moskovys duorzs atsarūn teritorejā storp Mozū Krosta, Moskovys, Bolvu i Kojusolys īlom, tuo plateiba ir 6,2 ha. Parku bejušuos duorznīceibys teritorejā suoce īreikuot 1937. godā piec daiļduorznīka i ainovu arhitekta Andreja Zeidaka projekta. Tūlaik tyka īstateiti kūki, kryumi i izveiduots brodojamais baseins i bārnu rūtaļu laukums. Parka viesturiskais nūsaukums beja Latgolys duorzs, kas tyka puorsaukts par Moskovys duorzu 1945. godā. 1965. godā parka teritorejā izcēle Sporta manežu, kai ari īkuortuoja autostuovvītu.