Grupa “Rupuči” prezentej videoklipu dzīsmei “Div mozi eži”

Grupa “Rupuči” prezentej videoklipu dzīsmei “Div mozi eži”

Rokstu sagataveja: portals lakuga.lv

Muzikis, pasuokumu vadeituojs i akters Kristaps Rasims kūpā ar sovim bārnim Ernestu i Terēzi apsavīnuojuši grupā “Rupuči”, i, svietejūt 15. majā gaidomū Storptautyskū saimis dīnu, prezentej videoklipu dzīsmei “Div mozi eži” nu albuma “Vuškeņa iz pļovys”. Reizē ar videoklipu grupa atkluoj ari jaunu bārnim i saimem paradzātu “YouTube” kanalu latgaliski.

Dzīsme “Div mozi eži” ir vīna nu digitaluo albuma bārnim “Vuškeņa iz pļovys” septeņu dzīšmu. Albuma rasšonuos īdviesme ir bīdreibys “LgSC” pārnejuo gods golā izdūtuo literatis Ilzis Spergys i muokslineicys Līgys Romančukys dzejūļu gruomota bārnim ar taidu pošu nūsaukumu “Vuškeņa iz pļovys”. Albuma “Vuškeņa iz pļovys” dzīšmu muzykys autors ir Kristaps Rasims, bet tuos īdzīduojuse grupa “Rupuči”, kurā apsavīnuojuši Kristaps, Ernests i Terēze Rasimi, kai ari Luocs Numeža. Albums īraksteits studejā “Reiga”, īrokstā tolkā guojuši ari muziki Zane Dziesma, Deniss Smirnovs i Mārcis Lipskis, bet albumu masteriejs Krišjānis Geidāns. Albums “Vuškeņa iz pļovys” bārnim ir daīmams nūsaklauseišonai video formatā “YouTube”, kai ari cytūs popularuokajūs muzykys straumiešonys servisūs. Kotram grybātuojam “YouTube” ir daīmami diveji dzīšmu varianti – dzīduošonai leidza ar grupu “Rupuči” voi pošim viņ ar muzykys pavadejumu.

Niu trejom nu albuma dzīšmu grupa “Rupuči” ar video meistara Ivara Utināna paleidzeibu radejuši videoklipus, kurūs publiska atruodeišona paradzāta tyvuokajuos maja trešdīnēs.

18. majā pyrmizruodi pīdzeivuoja videoklips dzīsmei “Vīna poša”.

25. majā publicāts video dzīsmei “Četri bārni”.

Leidza ar videoklipim grupa “Rupuči” gryb aizsuokt jaunu videokanalu, kurā byutu daīmams bārnu i saimu auditorejai paradzāts saturs latgaliski – dzīsmis, stuosti i cytys padareišonys.

“Sekojūt leidza Latgolys kongresa nūtikšonom, kur tyka sprīsts ari par latgaliskū video i cytaida veida saturu i informaceju bārnim, kuruos cikom ir pamoz, saprotu, ka navajag gaideit i mes poši, grupa “Rupuči”, varim byut jaunu lītu radeituoji. Ar bārnim saimē dzīdam dzīsmis, stuostam stuostus i dorim vysa kū cytu, varbyut tys byutu interesanti i nūdereigi ari cytom saimem, kuruos jau niu sasarunoj voi grybātu sasarunuot latgaliski,” ideju par jaunū videokanalu raksturoj Kristaps.

Dzejūļu gruomota i muzykys albums bārnim “Vuškeņa iz pļovys” ir ari vīns nu Latgalīšu kulturys goda bolvys “Boņuks 2021” sajiemieju.

Print Friendly, PDF & Email

Nūtikšonu kalendars

Aug
16
Ūtr
20:00 Latgalīšu kukne @ tīšsaistē
Latgalīšu kukne @ tīšsaistē
Aug 16 @ 20:00 – 21:30
Latgalīšu kukne @ tīšsaistē
Vaira informacejis: ITE
Aug
18
Cat
20:00 Ūgys koncerts @ "Kaņepes Kultūras centrs"
Ūgys koncerts @ "Kaņepes Kultūras centrs"
Aug 18 @ 20:00 – 22:00
“Kaņepes Kultūras centra” duorzā – Ūgys koncerts. Pi puļts DJ MARTIN BIRCH.   Ūga īvalk klauseituoju Rēzeknis hiphopa kulturys kusteibā. Tei ir īlu muzyka, mīlesteiba i vīnuoteiba storp ituos kulturys pīkūpiejim. Vīneiguo sīvīte, kura repoj[...]