Vēļ var dasaceit pretendentus Latvīšu viesturiskūs zemu atteisteibys padūmei

Vēļ var dasaceit pretendentus Latvīšu viesturiskūs zemu atteisteibys padūmei

Rokstu sagataveja: portals lakuga.lv

Latvejis Nacionalais kulturys centrs da 2022. goda 17. maja aicynoj navaļstiskuos organizacejis (NVO) dasaceit pretendentus Latvīšu viesturiskūs zemu atteisteibys padūmei, informej centra puorstuove Linda Ertmane.

Pretendentus padūmei var izvierzeit NVO, kurūs darbeiba ir saisteita ar attīceiguos kūpīnys kulturys tradiceju saglobuošonu i atteisteibu. Padūmē iz treis godu tiks izvālāts vīns puorstuovs nu kotrys latvīšu viesturiskuos zemis i lībīšu kūpīnys.

Padūmis pīnuokumūs byus prīšklykumu sniegšona par latvīšu viesturiskūs zemu identitatis, kulturviesturiskuos vidis i kulturtelpu saglobuošonys i ilgtspiejeigys atteisteibys politikys prioritatem i atbolsta pasuokumim, kai ari ituos politikys eistynuošonys izviertiejums.

“Taišni navaļstiskuos organizacejis i sabīdryskuos iniciativys da šam bejušys vīns nu golvonūs dziniejspāku latvyskuma daudzveideibys saglobuošonā, i taidys tuos byus ari iz prīšku. Leidz ar tū sabīdreibys puorstuovim i jūs redziejumam byus cīši svareiga lūma kai padūmis dorbā, tai lykuma īdzeivynuošonā kūpumā, ryupejūtīs par tū, kab lykumā ītvartuos idejis i īceris īsamīsuotu dzeivē,” stuosta kulturys ministra uorštata padūmnīks kulturpolitikys eistynuošonys vaicuojumūs Valts Ernštreits.

Dorbam padūmē izvierzej pretendentu, kurs atbylst itaidim kriterejim: pīredze attīceiguos latvīšu viesturiskuos zemis voi kūpīnys kulturys tradiceju saglobuošonā i kulturys dzeivis veicynuošonā, pīredze projektu vadeišonā i īvīsšonā, kas saisteiti ar kulturys tradiceju saglobuošonu i kulturys atteisteibu, kūpīnys aktiviziešonu voi sabīdreibys leidzdaleibys veicynuošonu, pīredze sadarbeibys veiduošonā ar vaļsts i pošvaļdeibu institucejom i navaļstiskajom organizacejom kulturys jūmā. Detalizāti kandidatu atlasis kritereji apsaverami Latvīšu viesturiskūs zemu atteisteibys padūmis kandidatu viertiešonys komisejis nūlykumā ITE.

Dasacejumu, dzeivis gaitys aprokstu (Europass formatā) i kandidatu dasacejušuos NVO statutu kopeju juoīsnādz LNKC personeigai, syutūt posta syutejumā (adress: Piļs laukums 4, Reiga, LV-1050) voi elektroniski, parokstūt ar drūsu elektroniskū parokstu, lnkc@lnkc.gov da 2022. goda 17. maja. NVO izvierzeitūs kandidatus izviertēs Latvejis Nacionaluo kulturys centra izveiduota komiseja.

Latvīšu viesturiskūs zemu atteisteibys padūme izveiduota ar mierki koordinēt vaļsts puorvaļdis īstuožu i pošvaļdeibu sadarbeibu i lāmumu pījimšonu vaicuojumūs par latvīšu viesturiskūs zemu identitati, kulturviesturiskuos vidis i kulturtelpu saglobuošonu i ilgtspiejeigu atteisteibu, veicūt Latvīšu viesturiskūs zemu lykumā nūsaceituos funkcejis i uzdavumus.

Print Friendly, PDF & Email

Nūtikšonu kalendars

Feb
4
Sai
vysu dīnu TLMS “Dzīpariņš” 45 darbeibys go... @ Latgolys Kulturviesturis muzejs
TLMS “Dzīpariņš” 45 darbeibys go... @ Latgolys Kulturviesturis muzejs
Feb 4 vysu dīnu
Jaunū izstuožu godu Latgolys Kulturviesturis muzejs īsuoc kūpā ar ilggadejū i vysod atsauceigū sadarbeibys partneri – Tautys lītiškuos muokslys studeju “Dzīpariņš”. Tei nūdybynuota jau 1978. godā i apvīnoj sevī vysaidu paaudžu rūkdarbneicys, kurys saista kūpeiga[...]