Rokstu sagataveja: portals lakuga.lv

Aņss Ataols Bierzeņš sataisejs i publiciejs videoklipu sovai
autordzīsmei „Cārmyukša“. Itei dzīsme plotuok zynoma jau vaira nakai 10 godu, kod jū suoce atskaņuot Latgolys radeja, i pa itū laiku jei plotai īsaguojuse dzīdūšūs Latgolys ļaudīs, varātumem pat saceit – folkloriziejusēs.

Autors stuosta, ka jau ilgu laiku dūmuojs par videoklipa uzjimšonu, tok pa dažaidim īmeslim tū īdzeivynuot pasalūba tik niu.

Aņss Ataols Bierzeņš  ir folklorists i tautys muzykys izpiļdeituojs, folklorys kapelys „Maskačkys spieļmani“ dalinīks. Nu 2009. gods Bierzeņš suoce sovu autordzīšmu raksteišonu, araņžiešonu i izplateišonu. Jis dzīsmis dzīd poša spieļuotu garmaņu pavadejumā, kai sovu žanru definejūt “bardu dzīsmis zam garmaņu”. Autors roksta dzīsmis pa lelumam latgalīšu volūdā, tok kurys nakurys i pa baļtiskam, krīvyskam, spaniskam i leitovyskam.

2015. godā izguoja A.A. Bierzeņa pyrmais autordzīšmu albums „Pasaver“,
kurā ir 12 dzīšmu (tymā skaitā i „Cārmyukša“), nu jūs 10 – ar Bierzeņa
vuordim i muzyku. Par itū albumu jis 2016. godā sajēme Latgalīšu kulturys goda bolvu „Boņuks“, a 2017. godā – dzīšminīku Pana bolvu.