Kai turpynuot paleidzēt Ukrainai

Kai turpynuot paleidzēt Ukrainai

Rokstu sagataveja: portals lakuga.lv

Paguojuši jau vaira nakai treis mieneši nu dīnys, kod Krīveja ībruka Ukrainā. Ka suokumā vysi šausmuos i šokā sekuoja leidza vysom kara nūtikšonom, tod niu interese par tū palykuse daudz mozuoka. Tikai napīrast pi kara – tai februara beiguos pi seve saceja daudzi. Lai cik brīsmeigi naskaneitu, tok šudiņ daudzi pi tuo eistyn ir pīroduši. Tok kars nav beidzīs, i mums juoturpynoj paleidzēt Ukrainai. Ir daudz vysaiduoku veidu, kai tū dareit.

Instagram kontā @bella_mariolla apkūpuoti veidi, kai turpynuot atbaļsteit Ukrainu ari piec treis kara mienešu:

1. Turpynoj sekuot leidza informacejai par nūtikšonom Ukrainā, tok nanūsleiksti ziņuos i trauksmē. Sekoj ukrainim socialajūs medejūs – tim, kuri var tevi savīnuot ar Ukrainu caur sovu saturu. Sekoj ari fotografim, kas atsarūn karalaukā i caur fotoobjektivu stuosta par Ukrainys cylvākim.

2. Vuicīs vysu kū jaunu par Ukrainu: viesturi, kulturu, tradicejis, volūdu, iedīni, apgierbu, sportu, dobu, piļsātom. Atrūņ tū, kas tevi vysvaira interesej, i īsavuici kū jaunu par tū!

3. Kotru mienesi zīdoj ukraiņu atbolstam! Nav svareigs zīduojuma apmārs, bet tuo regularitate. Izdūmoj, kam tu gribi paleidzēt: armejai, uorstim, bieglim, bārnim, vacim cylvākim, dzeivinīkim i regulari tūs atbolsti!

4. Īvīs koč kū ukrainisku sovā dzeivē! Par pīmāru, taisi ukraiņu iedīņus, skaiti ukraiņu autoru gruomotys, klausīs ukraiņu muzyku, pierc Ukrainā ražuotys precis, audzej saulispučis sovā duorzā!

5. Turpynoj raksteit varys puorstuovim par Ukrainu! Tys nūdrūsynuos, ka vaļdeiba turpynuos paleidzēt Ukrainai, pīguoduos municeju i atbaļsteis Ukrainu politiskajā i diplomatiskajā vidē.

6. Runoj par Ukrainu ar sovim draugim, radinīkim, sābrim i kolegim. Tam obligati nav juobyut par karu: Ukraina ir kas vairuok par tū. Izavielej tematu, kas tev pateik, i veidoj sarunu par Ukrainu!

7. Izruodi sovu atbolstu, izlepejūt uzleimi Ukrainys kruosuos iz sovys mašynys, izlīc Ukrainys karūgu pi sovys sātys voi iz sova balkona, dalīc Ukrainys karūga leņtu voi nūzeimeiti pi sovu drēbu! Tu navari īsadūmuot, cik nūzeimeigi ukrainim ir redzēt ituos atbolsta zeimis i kū tys jim nūzeimoj.

8. Paleidzi ukraiņu bieglim sovā apleicīnē i palīc par jūs draugu: paruodi jim apleicīni i dūd īsacejumus, īlyudz jūs gostūs pi seve i sovys saimis, īpazeistynoj jūs ar cytim ļaudim, paleidzi jim atrast dorbu, nasabeist runuot, ka redzi, ka jūs tīseibys ir apdraudātys.

9. Paleidzi uzvarēt informacejis karu, puorpublicejūt informaceju par Ukrainu nu drūsu olūtu, komentej rokstus par Ukrainu, vīnkuorši mīdz “pateik” voi sagloboj itūs īrokstus, kab socialūs medeju algoritmi tūs ruodeitu piec vareibys vaira cylvākim.

Vysdrūsuokais veids, kai zīduot Ukrainai, vys vēļ ir portalā ziedot.lv. Ukrainys cylvākim var zīduot ITE, taipat ITE var atbaļsteit ari “Twitter konvoju Ukrainai”, kas Ukrainys aizstuovim zīdoj mašynys. Portalā daīmamys ari vairuokys cytys iniciativys, kas paradzātys kaidam konkretam mierķam, kas saisteits ar Ukrainu i tuos ļaudim. Par cytim paleidzeibys veidim vaira izzynuot var ari bīdreibys “Tavi draugi” sātyslopā palidzibaukrainai.lv

Print Friendly, PDF & Email

Nūtikšonu kalendars

Oct
5
Tre
15:00 Pītera Korsaka fotografeju izstu... @ Latgolys Kulturviesturis muzejs
Pītera Korsaka fotografeju izstu... @ Latgolys Kulturviesturis muzejs
Oct 5 @ 15:00 – 16:30
Izstuode viestej par 20. i 21. godu symtā satyktajim zynomajim i mozuok zynomajim latgalīšim. Tei ir līceiba par laikabīdrim mynātajā periodā, kurūs vydā ir Pīters Zeile, Evalds Vasilevskis, Bronislava Martuževa, Juoņs Streičs, Bronislavs Spridzāns i[...]
Oct
7
Pīk
14:00 Antoninys Masiļūnis “Povuoru gru... @ Latgolys Kulturviesturis muzejs
Antoninys Masiļūnis “Povuoru gru... @ Latgolys Kulturviesturis muzejs
Oct 7 @ 14:00 – 15:30
Programā: 2022. godā atjaunuotuo izdavuma prezentaceja i stuostejums par 1992. godā izdūtuos A. Masiļūnis gruomotys “Povuoru gruomota” redizaina projektu i tuo realizaceju, prezentej – dizainere Valentīna Siņakova; Daleišonuos atmiņuos, pīsadola: 1992. goda izdavuma dizaina autore[...]
19:00 Rudiņa bals @ Iļžukolna TN
Rudiņa bals @ Iļžukolna TN
Oct 7 @ 19:00 – 23:45
Rudiņa bals @ Iļžukolna TN