Lūznovys muižys literarūs sarunu cyklā byus sasatikšona ar Valentinu Lukaševiču

Lūznovys muižys literarūs sarunu cyklā byus sasatikšona ar Valentinu Lukaševiču

Rokstu sagataveja: portals lakuga.lv

Svātdiņ, 12. junī, 17.00 stuņdēs Lūznovys muižā nūtiks sarunu cykla “Literārās sarunas Lūznavas muižā” sasatikšona, kurā byus vareiba vaira īpazeit literatu i literaturzynuotnīku Valentinu Lukaševiču. Sarunā pīsadaleit varēs kai muižā kluotīnē, tai tū vērtīs tīšraidē muižys sātyslopā.

Valentins Lukaševičs literaturā debitēja tandemā ar Oskaru Seikstu – obeji ir spylgti postmodernuos literaturys puorstuovi i labi zynomi ari myusu dīnu latvīšu literaturā. Pārņ Lukaševičam izguojuši div jauni dorbi: dzejūļu kruojums “Pādi navā svāti” i eseju kruojums “Casnāgu maizeitis”. V. Lukaševičs ir daudzu kūpkruojumu i audiovizualu projektu, raidejumu iniciators i vadeituojs. Jū raksturoj enciklopediskys, tymā pošā laikā ciļvieciski saistūšys zynuošonys i skots iz lītom nu molys. Vāruotuoja poziceja dzeivē i dzejā ļaun Lukaševičam precizi saukt lītys eistajūs vuordūs, tok tymā pošā laikā, pat nabyudams aktivs procesu vierzeituojs, jis ir kluotyn asūšs vysuos latgaliskajuos aktivitatēs. Lukaševiča komunikacejis prasmis paver vys jaunus apvuoršņus kruojumu i gruomotu idejom.

Sarunā ar dzejnīku, publicistu, literaturzynuotnīku Valentinu Lukaševiču klauseituoji varēs pīsadaleit kai kluotīnē, tai tīšraidē. Literarūs sarunu vierzeituoja ari itūreiz byus literaturzynuotneica Ilga Šuplinska, bet sarunu muzykali papyldynuos Sovvaļnīks. 2022. goda sarunu cykla sasatikšonys reizis rudiņa pusē vēļ paradzātys ar literati i tekstilmuokslineicu Anneli Slišāni, kai ari rakstneicu Gundegu Repši.

Sarunu cyklys “Literārās sarunas Lūznavas muižā” aizasuoce 2017. goda rudinī. Itūgod izvālātī sarunu cykla temati i autori, nu vīnys pusis, atkluos, cik daudzveideiga ir jaunuokuo literatura i kai tei atsabolsoj Latgolys, Latvejis i pasauļa kulturtelpā, ļaunūt apjaust sovu identitati, nu ūtrys – “meklēs” sovu publiku itaidys tradicejis turpynuošonai, partū uzrunuotī autori ir atškireigi kai piec puorstuovātuo žanra, tai auditorejis, kurai pamatā adresāti jūs dorbi.

Literarūs sarunu nūtikšonu atbolsta Vaļsts kulturkapitala fonds i Rēzeknis nūvoda pošvaļdeiba. Īīšonys moksa kluotīnē 3,00 €, beletus var īsaguoduot “Biļešu paradīzes” kasēs. Nakluotīnē literarūs sarunu nūtikšonai leidza sekuot varēs Lūznovys muižys sātyslopā.

Print Friendly, PDF & Email

Nūtikšonu kalendars

Jun
30
Cat
vysu dīnu Džeinys Gavaris gleznu izstuode ... @ Maltys viesturis muzejs
Džeinys Gavaris gleznu izstuode ... @ Maltys viesturis muzejs
Jun 30 vysu dīnu
Džeinys Gavaris gleznu izstuode "Mantojums" @ Maltys viesturis muzejs
Da 30. juņa Maltys viesturis muzejā var apsavērt dzīsmineicys, gleznuotuojis i dzejneicys Džeinys Gavaris gleznu izstuodi “Mantojums”. Poša Džeina Gavare stuosta: “Izstuode ir kai turpynuojums viestei par mīlesteibu. Izstuode ir par tū, kuo „pādūs” mes[...]
Jul
1
Pīk
20:00 Grupys “Reibums” koncerts @ "Fresh Terase"
Grupys “Reibums” koncerts @ "Fresh Terase"
Jul 1 @ 20:00 – 21:30
Grupa “Reibums” ir cālusēs Rāznys azara krostā Kaunatā Covid īrūbežuojumu laikā, kod vīneiguos izklaidis vareibys beja izklaidēt sevi pošim. Tok dalinīku saspēlis pyrmsuokumi meklejami jau lobu laiku īprīšk.   Grupa “Reibums” spielej vīnkuoršu, jautru dzeivū[...]