Kulturys īsacejumi vosorai: kū dareit vosorā Latgolā?

Kulturys īsacejumi vosorai: kū dareit vosorā Latgolā?

Rokstu sagataveja: portals lakuga.lv

Itūreiz portals Lakuga.lv uzrunuoja vairuokus Latgolā i Latvejā zynomus cylvākus, vaicojūt, kuri byutu tī pasuokumi Latgolā, kurus, piec jūs dūmu, nūteikti vajadzātu apmeklēt. Puorskaiti i īsadvesmoj sovom vosorys nūtikšonom!

Daugovpiļs Eiropys Kulturys golvyspiļsātys dasacejuma grupys koordinatore i Daugovpiļs Kulturys puorvaļdis pasuokumu organizatore Diāna Soldāne pavysam nūteikti īsoka ītūvosor pagasteit Daugovpilī, partū ka piļsātā sūluos byut “korsta” pasuokumu programa. Vysupyrma 21. junī Andreja Pumpura skverā byus īleiguošona – sasadzīduošona ar folklorys kūpu “Svātra” i skaņu meistaru Aleksandru Maijeru, vaiņuku veišona ar Intu Reču, juoņuzuoļu izmontuošonys muoksla ar Dzintru Abaroni, sīra vuoreišona ar Viju Kudiņu i dobys fotostudeja ar Reini Balodi.
Sovpus juļa sastdīņu vokori Daugovpilī byus eipaši kruošni, partū ka Dubrovina parkā kai dzeivuotuoji, tai gosti varēs nasteidzeigai baudeit dažaidu stilu breivdobys koncertus.

Karteņa: Dubrovina parks Daugovpilī. Autors: Andrejs Jemeļjanovs.

Sovpus aktivuos atpyutys i laivuošonys specialists Dagnis Tihovskis nu uzjāmuma “Atpūta Ludzā” īsoka apmeklēt Sātys kopejneicu dīnys Ludzys pusē, kurys nūtiks 23. i 24. julī. Uzjāmums “Atpūta Ludzā” ari paguojušajā godā pīsadaleja itymā pasuokumā. Dagnis stuosta, ka itūgod gaidomi koncerti iz plūsta Mozajā Ludzys azarā, kurus varēs baudeit nu krosta, kajaka voi iz SUP dieļa.
Sātys kopejneicu dīnys Latgolā itūgod nūteik četrūs dažaidūs datumūs – 2.-3 julī Preiļu, Aglyunys i Leivuona pusē; 9.-10. julī Augšdaugovys i Kruoslovys pusē; 23.-24. julī Rēzeknis i Ludzys nūvoda pusē i 28.-29. augustā Zīmeļlatgolā – Bolvu nūvodā. Vaira informacejis, īmūt tyvuok datumim, byus daīmama sātyslopā latgale.travel.

Karteņa: Dagnis Tihovskis muzicejūt iz plūsta. “Atpūta Ludzā” arhivs.

Latvejis Radejis personeiba Daira Zīle īsoka vairuokus lela mārūga pasuokums dažaiduos Latgolys vītuos. Jei pīzeist, ka pyrma juoizceļ 18. junī, gaidomais Lelais latgaļu tiergs Ludzā. Kotru godu vosorys saulgrīžu laikā Ludzā sasateik vītejī amatnīki, lauksaimnīki, muojražuotuoji i dzīduotuoji nu vysys Latgolys. Nav nūslāpums, ka mozajim uzjiemiejim pandemejis laiks beja cīši gryuts. Itamā vosorā latgaļu tiergs ir jauka vareiba atbaļsteit vītejūs ražuotuojus, īsaguodojūt jūs produkceju. Taipat Ludza vysod ir skaista vīta pastaigom i atpyutai pi azaru.
Vēļ Daira aicynoj apmeklēt 19. juņa koncertu Lūznovys muižā, kur uzastuos varganiste Iveta Apkalna. Iveta sovā koncertprogramā izpiļdeis J.S. Baha, F. Lista i Š.M. Vidora skaņdorbus. Apkalna ir pasauļa leimiņa muzike, i juos gasteišona i koncertiešona dzymtajā pusē vysod ir eipašs nūtykums.
Bet tymā pošā Lūznovys muižā 17. julī nūtiks ari kasgadejais muokslu i garšu festivals “Mākslas pikniks”. Tei ir vareiba ainaviskajā muižys parkā svaigā gaisā na viņ baudeit iedīņus i dzierīņus, tok ari apsavērt muokslys dorbus, performancis i vokora eipašū koncertu. Ituo goda programa vēļ nav izziņuota, tok tys nūteikti byutu apmekliešonys vārts pasuokums deļtuo, ka Lūznovys muiža i parks ir gleznainā vītā ar vairuokim dobys apsavieršonys objektim ari natuoli, i taipoš festivala kulturys programa paradzāta vysaidom gaumem.
Itūvosor, 6. augustā, Daugovpilī, stadionā “Lokomotīve”, gaidoms seņ nabejs nūtykums – ar koncertu “Gads bez kalendāra” iz skotuvis kuops “Prāta Vētra”. Vaira pat napīmiņu, kod pādejū reizi “Prāta Vētra” ir bejuse Latgolā, tok itūvosor tys otkon nūtiks. Vareiba latgalīšim i gostim pavysom tyvai dzierdēt vīnu nu pīcu “Prāta Vētras” vosorys koncertu Latvejā.

Karteņa: Ludzys katoļu bazneica, Dairas Zīles personeigais arhivs.

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]