Latgalīšu organizacejis aicynoj iz sadarbeibys pīredzis stuostim

Latgalīšu organizacejis aicynoj iz sadarbeibys pīredzis stuostim

Rokstu sagataveja: portals lakuga.lv

Svātdiņ, 12. junī, 14.30 stuņdēs Lūznovys muižā (Rēzeknis nūvodā) paradzāta pīredzis stuostu nūtikšona “Kai sasadorbuot i kas juodora, kab sadarbeiba struoduotu?”, kurā aicynuotys pīsadaleit organizacejis, kas struodoj ar latgalīšu kulturvidis vaicuojumim, bet tamā ar sovim sasadorbuošonys pīredzis stuostim pasadaleis ari Kūrzemis i Sielejis organizaceju puorstuovi, viestej pasuokuma reikuotuoju, bīdreibys “LgSC” publicātuo informaceja.

Leidza ar Latgolys kongresu aktualizējīs ari vaicuojums par latgalīšu navaļstiskūs organizaceju sadarbeibu i īsaisti kongresa rezolucejis eistynuošonā, deļtuo svātdiņ, 12. junī, organizacejis, kuruos struodoj ar latgalīšu kulturvidis vaicuojumim, aicynuotys iz pīredzis stuostim “Kai sasadorbuot i kas juodora, kab sadarbeiba struoduotu?”. Tymūs byus vareiba nūsaklauseit diveju navaļstiskūs organizaceju ekspertu pīredzi par dorbu navaļstiskajā sektorā i organizaceju pīredzi i veidim sadarbeibys veiduošonai. Ar sovim stuostim, pīredzi i padūmim pasadaleis Vilis Brūveris nu bīdreibys “NEXT” (Aizpute), kurī eistynoj vierīneigū īdvesmis stuostu sereju tuesi.lv, kai ari veidoj video projektu “Vieta-Latvija”. Vilis ir ari pīredziejs pasuokumu vadeituojs, organizaceju mentors i daudzu ar navaļstikūs organizaceju izaugsmi saisteitu nūtikšonu iniciators. Ūtrys pīredzis stuosts byus nu Sielejis pusis – bīdreibys “Sēlijas salas” puorstuovs Juoņs Dzimtais pasadaleis ar sovu pīredzi, veidojūt niu spieceigū Sielejis organizaceju sadarbeibys teiklu i paleidzūt pi Sielejis atpazeistameibys veiduošonys.

12. junī īcarātajā nūtikšonā var pīsadaleit ari cytys organizacejis, kurom ir aktuala sadarbeibu, teiklu veiduošonys i navaļstiskuo sektora pīredzis izzynuošona, kai ari īpasazeišona ar latgalīšu kulturvidis organizacejom.

Pīredzis stuosti īcarāti kluotīnis sasatikšonys formā, bet, ka kaidam ir interese pīsadaleit, bet nav vareibys byut iz vītys Lūznovys muižā, varēs pīsaslēgt ari attuolynuoti. Kab pīsadaleitu nūtikšonā, organizaceju puorstuovi aicynuoti pīsateikt da sastdīnis, 11. juņa, pušdīnis laika, rokstūt bīdreibai “LgSC” iz lgsc@lgsc.lv.

Taipat vysi grybātuoji tamā dīnā var pīsadaleit ari cytuos nūtikšonuos – taišni pušdīnis laikā iz kūpsapuļci aicynoj Latgalīšu kulturys bīdreiba, kurys darbeibā var īsasaisteit ari jauni bīdri, bet piec pīredzis stuostu, 17.00 stuņdēs, nūtikšonys dalinīkim ir vareiba palikt ari iz literarūs sarunu Lūznovys muižā sasatikšonu ar literatu, publicistu i literaturzynuotnīku Valentinu Lukaševiču.

Pīredzis stuostu “Kai sasadorbuot i kas juodora, kab sadarbeiba struoduotu?” nūtikšonu pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu bīdreibys “LgSC” projektā “Latgaliskuos kulturvidis organizaceju sadarbeibys i sabīdreibys zynuošonu styprynuošona”.

Print Friendly, PDF & Email

Nūtikšonu kalendars

Oct
5
Tre
15:00 Pītera Korsaka fotografeju izstu... @ Latgolys Kulturviesturis muzejs
Pītera Korsaka fotografeju izstu... @ Latgolys Kulturviesturis muzejs
Oct 5 @ 15:00 – 16:30
Izstuode viestej par 20. i 21. godu symtā satyktajim zynomajim i mozuok zynomajim latgalīšim. Tei ir līceiba par laikabīdrim mynātajā periodā, kurūs vydā ir Pīters Zeile, Evalds Vasilevskis, Bronislava Martuževa, Juoņs Streičs, Bronislavs Spridzāns i[...]
Oct
7
Pīk
14:00 Antoninys Masiļūnis “Povuoru gru... @ Latgolys Kulturviesturis muzejs
Antoninys Masiļūnis “Povuoru gru... @ Latgolys Kulturviesturis muzejs
Oct 7 @ 14:00 – 15:30
Programā: 2022. godā atjaunuotuo izdavuma prezentaceja i stuostejums par 1992. godā izdūtuos A. Masiļūnis gruomotys “Povuoru gruomota” redizaina projektu i tuo realizaceju, prezentej – dizainere Valentīna Siņakova; Daleišonuos atmiņuos, pīsadola: 1992. goda izdavuma dizaina autore[...]
19:00 Rudiņa bals @ Iļžukolna TN
Rudiņa bals @ Iļžukolna TN
Oct 7 @ 19:00 – 23:45
Rudiņa bals @ Iļžukolna TN