Latgaliski i angliski izdūti bruoļu Cybuļsku atmiņu stuosti par Latgolu

Latgaliski i angliski izdūti bruoļu Cybuļsku atmiņu stuosti par Latgolu

Rokstu sagataveja: portals lakuga.lv

Gruomotā “Atmiņuos Latgolā/Latgalian Memories” izdūti latgalīšu rakstnīku, bruoļu Juoņa i Viktora Cybuļsku atmiņu stuosti. Etnografiskī tāluojumi dūd vareibu īsavērt 20. godu symta suoku katuoļticeigu latgalīšu kasdīnys dzeivē. Gruomota izdūta latgalīšu i angļu volūdā.

Bīdreiba “LgSC” izdavuse Juoņa i Viktora Cybuļsku gruomotu “Atmiņuos Latgolā/Latgalian Memories”, kurā latgalīšu i angļu volūdā publicāti obeju bruoļu atmiņu stuosti, etnografiski tāluojumi par tāva sātā bierneibā pavadeitū laiku. Stuosti dūd vareibu īsavērt kaidys saimis kasdīnys dzeivē – bārnu školys gaituos, Zīmyssvātku svieteišonys tradicejuos, izīšonā iz vīnsātom i cytuos nūtikšonuos.

Bruoļus izškeire Ūtrais pasauļa kars 1944. godā, i jūs liktini ir atškireigi. Juoni deportēja, i jis daudzus godus kai “tautys īnaidnīks” pavadeja Sibirī. Sovpus Viktors devēs trymdā, nu suoku atsaroda puorvītuotūs personu nūmetnē Vuocejā, piečuok emigrēja iz ASV. Gruomota “Atmiņuos Latgolā/Latgalian Memories” ir sova veida obeju bruoļu sasatikšona otkon.

Gruomotys izdūšonu finansiali atbaļsteja Viktora Cybuļska mozdāls, ASV dzeivojūšais latgalīts i Latvejis gūda konsuls Teksasys pavaļstī Pīters Ragaušs. “Es ceru, ka skaiteituojim byus saistūši īsavērt muna vactāva i juo bruoļa pasauļa redziejumā, kaids tys beja pyrma 100 godu latgalīšu volūdys zīdu laikūs,” tai P. Ragaušs.

“Atmiņuos Latgolā/Latgalian Memories” sastuodejuse Vineta Vilcāne, nu latgalīšu volūdys iz angļu volūdu tulkuojs Ugis Sprūdžs. Latgalīšu tekstu korekturu veikušys Lideja Leikuma, Maruta Latkovska i Laura Melne, angļu volūdys – Pīters Ragaušs.

Gruomotu var nūpierkt škārsteikla veikalā taiseitslatgola.lv, veikalā “O!Marta” Daugovpilī, “Liesma” Rēzeknē, “Zvaigzne ABC” i “Jānis Roze” gruomatneicuos.

Latgolys školom i bibliotekom ir vareiba gruomotu sajimt bez moksys, interesentim lyugums raksteit iz epostu vineta.vilcane@gmail.com.

Print Friendly, PDF & Email

Kalenders

Feb
29
Cat
all-day Evijis Styrnys gleznu izstuode “... @ Rēzeknis Centraluo biblioteka
Evijis Styrnys gleznu izstuode “... @ Rēzeknis Centraluo biblioteka
Feb 29 all-day
Mādz saceit, ka dzeive ir sapyns. Izstuodē ir vārojamys gleznys akvareļu tehnikā, kuru var skaiteit par eipaši pīmāruotu sapynu atspaitu radeišonai. Akvareļu kruosys ar sovu plyustūšū caurspeideigumu ļaun mums īsajust sapynu pasaulī, kur vysu dzeivūs[...]