Rogovkā nūtiks tradicionalais Pīterdīnys pasuokums

Rogovkā nūtiks tradicionalais Pīterdīnys pasuokums

Rokstu sagataveja: portals lakuga.lv

29. junī Nautrānu pogostā nūtiks tradicionaluos Pīterdīnys nūtikšonys: pīminis breids Desetnīku kopūs, kai ari koncerts Rogovkā, informej pogosta puorstuove Inga Vigule. Rogovkīšam, dzejnīkam Pīteram Jurciņam itūgod byutu 90 godu jubilejs, partū veiru kors “Graidi” sagatavejs eipašu koncertprogramu, kas izskanēs pasuokumā.

Namaineiga Rogovkā ir tradiceja 29. junī svieteit Pīterdīnu, kod nautrānīši gūdynoj dzejnīku Pīteri Jurciņu i vysus pogosta Pīterus. Ir bejuši koncerti, vakariešona pi gunkura, pogostu amatermuokslys kolektivu uzastuošona i citys aktivitatis, tok namaineigs ir pīminis breids Desetnīku kopūs. 2020. godā Pīterdīnu Rogovkā fiļmēja LTV1 raidejums “Cytaidi latviskais”, bet paguojušajā godā “Pīterdīna Rogovkā” tyka raideita tīšraidē nu Rogovkys centra.

Itūgod Pīterdīna tiks atzeimuota eipaši. Dzejnīkam Pīteram Jurceņam itys byutu 90. jubileja gods. Ar speciali izveiduotu koncertprogramu uzastuos veiru kors “Graidi”. Koncertā skanēs dzīsmis, kuru vuordu autors ir Pīters Jurciņš. Koncertprogramu veidoj kora dirigents Juoņs Mežinskis.

Koncerta laikā nūtiks i literatu konkursa, kas ir veļteits P. Jurciņa pīmiņai, nūslāgums. Itūgod konkursa moto ir Pītera Jurciņa vuordi: “Var tymsā pakrist redzeigais, bet naredzeigais – gaismā puortapt.” Kotrys nominacejis laureats sajims naudys premeju 100 (vīns symts) EUR apmārā, kai ari byus specbolva nu Latgalīšu volūdys, literaturys i kulturviesturis školuotuoju asociacejis (LVLKŠA) par bārnu prozu latgalīšu volūdā.

Itūgod konkursam tyka īsnāgti 14 dorbi dažaidūs žanrūs. Dorbi ir jau nūvārtāti i nominanti nūskaidruoti. Konkursa dorbu viertiešonys komisejis sastuovā tradicionali beja Veronika Dundure, Anna Rancāne i Ilga Šuplinska.

Pasuokums nūtiks 29. junī:

  • 17.30 – pīminis breids Desetnīku kopūs
  • 19.00 – “Pīterdīna Rogovkā” – koncerts Nautrānu sporta hallē – KN (afišā nūruodeits, ka pi hallis, tok korstuo laika i īspiejamuo nagaisa deļ pasuokums puorcalts iz īšktelpom), literatu konkursa nūslāgums i laureatu apbolvuošona, Pīteru gūdynuošona.

Pasuokums nūtiks ar a/s “Latvijas Valsts meži” i Vaļsts kulturkapitala fonda Latgolys kulturys programys finansialu atbolstu.

Print Friendly, PDF & Email