Rokstu sagataveja: portals lakuga.lv

Nu 11. da 22. juļa Viļakā nūtiks 6. Storptautyskais gleznīceibys pleners “Valdis Bušs 2022”, informej Bolvu nūvoda puorstuove Vineta Zeltkalne. Pleneram žureja ir izavieliejuse sešys dalineicys: Agru Ritiņu (Latveja), Emilie Kanervo (Suomeja), Jena Jang (Dīnvydkoreja), Solveiga Gutaute (Leitova), Madara Tropa (Latveja, dzeivoj ASV) i Nimet Keser (Turceja).

Plenera organiziešona i tuo izstuodis izveiduošona ir apsazynuošona, ka Valda Buša atstuotais montuojums ir nūzeimeigs Latvejis i pasauļa mārūgā. Tuo organizatori apsazynoj sovu atbiļdeibu montuojuma saglobuošonā i nūdūšonā jaunajom paaudzem, rauga īīnteresēt vītejūs dzeivuotuojus nūviertēt nūvoda unikalitatis. Taišni Viļakys pusē – Susaju pogosta Puokšovā ir suocīs izcyluo latvīšu ainavu meistara Valda Buša dzeivis ceļš.

Plenera eistynuošonu ir atbaļstejuse Latgolys kulturys programa, leidzfinansiejumu nūdrūsynoj Bolvu nūvoda pošvaļdeiba. Sadarbeibys partners – Daugovpiļs Marka Rotko muokslys centrs – organizēja plenera dalinīku atlasi. Plenera kuratori byus Māris Čačka i Elita Teilāne. Plenera laikā radeitūs dorbu izstuodi atkluos 21. julī 16.00 stuņdēs Viļakys muzeja izstuožu zalē, Klūstera īlā 1, Viļakā.

Valda Buša dzymtuos pusis kulturys darbinīki turpynoj struoduot, kab veicynuotu kulturys atjaunuotnis i muokslys jaunradis procesus, vītejā sabīdreibā īnasūt pasauļa muokslu, īpazeistynojūt vītejū sabīdreibu ar myusu dīnu muokslinīkim; veicynuotu storptautysku sakaru atteisteibu i īpazeistynuotu ar Latveju kai breineigu rezideņču vītu; izveiduotu storptautyskuo gleznīceibys plenera laikā radeitūs dorbu ceļojūšū izstuodi, tai dūmūt vareibu sabīdreibai Latvejā īsapazeit ar myusu dīnuos radeitim muokslys dorbim.