Sarunu festivalā LAMPA byus diskuseja latgaliski “Paļdis nūvodam, ka aizslēdze školu!”

Sarunu festivalā LAMPA byus diskuseja latgaliski “Paļdis nūvodam, ka aizslēdze školu!”

Rokstu sagataveja: portals lakuga.lv

Sastdiņ, 2. julī, nu 15.00 da 16.00 stuņžu Sarunu festivala LAMPA “Regionu skotivē” Ciesīs nūtiks Latvejis Radejis Latgolys multimedeju studejis, latgalīšu kulturys ziņu portala lakuga.lv i bīdreibys “LgSC” taiseituo diskuseja “Paļdis nūvodam, ka aizslēdze školu!”, kurys mierkis ir rūsynuot iz slāgtūs školu problematiku regionā apsavērt car jaunu īspieju prizmu.

Diskusejis nūsaukums i moto “Paļdis nūvodam, ka aizslēdze školu!” ir Namaterialuos kulturys montuojuma centra “Upīte” direktora Andra Slišāna Latgalīšu kulturys goda bolvā “Boņuks 2021”, sajemūt bolvu par izalauzšonys ustobu “Pīci panti”, pasceitais. Nūtikšonu kluotīnē varēs nūsaklauseit kluotīnē sarunu festivalā LAMPA sastdiņ, 2. julī, nu 15.00 da 16.00 festivala “Regionu skotivē” (numers 5), kurei itūgod topuse ar British Council puorstuovnīceibys Latvejā atbolstu. Diskusejis informaceja festivala sātyslopā ITE.

Diskusejis “Paļdis nūvodam, ka aizslēdze školu!” pamatā ir situaceja, ka jau vairuokus godus Latvejis izgleiteibys sistemys optimizacejis dīnys parāda vīns nu suopeiguokūs punktu ir školu likvidaceja. Itys lāmums īrosts roda daudzi vaicuojumu kai par tū, kū dareit ar školys sātom, tai ari par tū, kai tys ītekmej vītejū kūpīnu i vītys atteisteibu, nu nareši taišni školys likvidaceja var byut kai pyrmais atspierīņa punkts vītys transformacejā. Diskusejā  “Paļdis nūvodam, ka aizslēdze školu!” byus vareiba īpasazeit ar treis Latgolā slāgtūs školu “dzeivisstuostim” – kai tuos dabuojušys cytu izmontuošonys veidu i tykušs par vītejuos kūpīnys jaunajim centrim. Itūs stuostu mierkis ir īdvesmuot ari cytys Latvejis regionu vītys, kurom saguojs leidzeigs liktiņs – slāgta škola, dūmuot, radeit i meklēt veidus, kai nu vīnys pusis skumais lāmums var radeit pozitivys puormainis. Sarunys golā tuos reikuotuoji tur nūceju radeit treis sūļu ceļvedi pošvaļdeibom i uzjiemeigajim jaunūs školu stuostu taiseituojim, kas var nūderēt cytu slāgtūs školu sātu transformacejis radeituojim.

Diskusejā pīsadaleis Namaterialuos kulturys montuojuma centra “Upīte” direktors Andris Slišāns, “KUUP kopeja grauzdātova” saiminīks Oskars Maculevičs, Lūznovys muižys puorvaļdneica Iveta Balčūne, Ludzys nūvoda pošvaļdeibys dūmis prīšksādātuoja vītineica Ināra Silicka, diskuseju vadeis Latvejis Radejis Latgolys multimedeju studejis vadeituoja Renāte Lazdiņa.

Šaļteņu pyrmai piec diskusejis kotram grybātuojam byus vareiba praktiski sajust daļu nu kotrys slāgtuos školys jaunuos dzeivis – paraudzeit latgaliskuos izalauzšonys ustobys “Pīci panti” aizdavumu voi īsajust tyltu byuvis inženera uodā.

Aicynojūt iz diskuseju, bīdreibys “LgSC” vadeituoja Edeite Husare soka: “Sarunu festivalā LAMPA pa reizei īsaskaņ ari latgalīšu volūda, deļtuo ari gribējuos, kab itys gods nav izjāmums. Sadarbeibā ar ilggadejim partnerim latgalīšu volūdys populariziešonā – Latvejis Radejis Latgolys studeju i bīdreibys portalu lakuga.lv – itūgod izlēmem pīsadaleit festivalā, izmontojūt British Council puorstuovnīceibys Latvejā Regionu skotivis konkursu. Ituos reizis tema ir raudzeišona apsavērt kai iz tū, ka školu sliegšona ir cīši lela regiona bāda, nu reizē redzēt tamā jaunys īspiejis i nasakoncentrēt iz skumeigū daļu. Mums nav ticeibys, ka regionā, kur īdzeivuotuoju skaits dramatiski sasamazynoj, školu sliegšonys process nūstuos, bet mums ir ticeiba, ka školu sātys var puordzimt i, pasasokūt vītejūs aktivitatei, dūt jaunu dzeiveibu regiona vītom.”

Festivalā itūgod natryuks sarunu i nūtikšonu, kuruos pīsadaleis ari organizacejis i dalinīki nu Latgolys, vys tik itei diskuseja byus vīneiguo, kuruos dorba volūda piļneibā byus latgalīšu.

Diskusejis “Paļdis nūvodam, ka aizslēdze školu!” nūtikšonu sarunu festivalā LAMPA pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]