Sasatikt ar Latgolu sarunu festivalā LAMPA. Īsacejumi diskuseju nūsaklauseišonai

Sasatikt ar Latgolu sarunu festivalā LAMPA. Īsacejumi diskuseju nūsaklauseišonai

Rokstu sagataveja: portals lakuga.lv

Šudiņ i reitu, 1. i 2. julī, nūteik sarunu festivals LAMPA, kurā itūgod var pīdzeivuot 270 dažaidus pasuokumus – diskusejis, izruodis, sarunys i cytus. Festivals nūteik kluotīnē Ciesīs, nu lelai daļai nūtikšonu leidza sekuot varēs tīšraidē festivala sātyslopā, kai ari četruos vītuos Latgolā – Bolvūs, Dagdā, Kruoslovā i Lūznovā – byus daīmama kūpā vieršonuos vareiba. Vysu festivala nūtikšonu vydā pīduovojam izlasi, kurā ir ar Latgolu saisteita tematika voi pīsadola Latgolu puorstuovūši dažaidu sferu ļauds.

Diskuseja “Sīvīšu puorstuovnīceiba politikā: vajadzeiba voi ekstra?”

  • 1. julī 15.30–16.30 skotivē “UZZIBSNĪ” (Nr. 28)

Vieliešonu godā sarunys centrā sīvīšu puorstuovnīceiba politikā – par faktorim, kas ļaun sīvītei īīt politikā voi taišni preteji – pat juos naatbaļsteitys i namapaneitys, par tū, kai vadās Latvejis politikys vidē i voi ite ir vārojama kaida diskriminaceja. Diskusejā pīsadola ari Rēzeknis dūmis deputate Leila Rasima. Vaira informacejis par nūtikšonu ITE.

Remigracejis diskusejis paneļs “Nikur nav cik labi kai sātā”

  • 1. julī 17.00–18.00 Regionu skotivē (Nr. 5)

Remigracejis diskusejis panelī varēs dzierdēt īdvesmojūšus i sīviškeigus stuostus par pīredzis dabuošonu uorzemēs i sovu sapynu pīpiļdeišonu dzimtinē. Saruna par ideju eistynuošonu, par sātys sajiutu, Latveju kai vītu, kur pīpiļdeit sapynus. Sarunu vadeis Astrīda Leščinska – remigracejis krystamuote Latgolā, bet tamā pīsadaleis ar tetoviešonys meistare Elīna Zelča, kurei ir attaisejuse sovu salonu Bolvu nūvda Upītē. Vaira informacejis par nūtikšonu ITE.

Diskuseja “LGBTQIA+ volūdu i kulturu škārsgrīzumā”

  • 1. julī 19.00–20.30 Kvīru nomā (Nr. 6)

Diskuseja par LGBTQIA+ kūpīnu car tauteibu i kulturu prizmu. Sarunā latgalīšim itymā vaicuojumā dasadūrs ari studente Jūlija T., taipat diskusejā pīsadaleis Marejis Dzeislys dzejis kruojuma “vysta smierts” projekta vadeituoja, rakstneica i redaktore Elīna Kokareviča. Vaira informacejis par nūtikšonu ITE.

Darbneica “Meļneicys i romaņcis”

  • 2. julī 11.00–12.30 Regionu skotivē (Nr. 5)

Darbneica bārnim i pīaugušajim, kurā ar romu i navaļstiskūs organizaceju puorstuovim byus vareiba īpasazeit ar Latvejis romu kulturu i izzynuot vaira par romu mediatoru dorbu pošavaļdeibuos. Darbneicā pīsadaleis ari Viļakys romu mediatore Rasma Zaharenko. Vaira informacejis par nūtikšonu ITE.

Saruna “Deļkuo školāni roksta esejis i zeimoj Satversmi?”

  • 2. julī 12.00–13.15 Ciesu izstuožu nomā (Nr. 25)

Sarunā tiks raudzeits saprast, deļkuo školāni roksta esejis, taipat byus Andra Akmentiņa dzejis meistarklase. Sarunā pīsadaleis literate, školuotuoja, tulkuotuoja Evika Muizniece i Rēzeknis Vaļsts 1. gimnazejis školāns Linards Munda. Vaira informacejis par nūtikšonu ITE.

Diskuseja “Pošvaļdeibu restarts. Kai veicynuot, kab īdzeivuotuoji daboj vaira nu pošvaļdeibu reformys?”

2. julī 12.30–13.30 skotivē “APGAISMO” (Nr. 23)

Diskuseja par pyrmū godu piec administrativi teritorialuos reformys, kurā pošvaļdeibu, vaļsts puorvaļdis, sabīdryskūs organizaceju i medeju puorstuovi byus aicynuoti atbiļdēt iz vaicuojumim, voi dzeivuot ir palics lobuok i īdzeivuotuojim izdeveiguok. Diskusejā pīsadaleis ari Rēzeknis nūvoda pošvaļdeibys vadeituojs Monvīds Švarcs. Vaira informacejis par nūtikšonu ITE.

Saruna “Darbeigūs kūpīnu ekosistema Latgolā: voi atbiļdeiba nūvad da sadarbeibys?”

  • 2. julī 13.00–14.30 Regionu skotivē (Nr. 5)

“Darbeiguos kūpīnys” ir iniciativa, kurei ītūšaļt teik eistynuota Latgolā. Sarunā byus vareiba īpasazeit ar ituos idejis jāgu, raudzeit dūmuot i meklēt atbiļdis iz vaicuojumim, par pīmāru, kai peļneit naudu sev, nu ceļt kūpīnu, kaida ir kūpīnu ekosistema i cytim. Vaira informacejis par nūtikšonu ITE.

Diskuseja “Paļdis nūvodam, ka aizslēdze školu!”

  • 2. julī 15.00–16.00 Regionu skotivē (Nr. 5)

Diskuseja, kurys reikuotuoju vydā ari portals lakuga.lv, i kurei vīneiguo festivalā nūtiks piļneibā latgaliski. Itei byus raudzeišona apsavērt iz Latgolā slāgtūs školu ūtrū īspieju i cytaižuoku dzeivi. Par dorbuošonūs bejušūs školu sātā sasarunuos Andris Slišāns nu Upītis, “KUUP kopejis grauzdātovys” saiminīks Oskars Maculevičs, Lūznovys muižys puorvaļdneica Iveta Balčūne i Ludzyns nūvoda dūmis prīšksādātuoja vītineica Ināra Silicka. Sarunu vadeis Latvejis Radejis Latgolys studejis vadeituoja Renāte Lazdiņa. Vaira informacejis par nūtikšonu ITE.

Saruna “Totalitarisma viesturis memorialu liktini Latvejā”

  • 2. julī 15.00–16.30 Sirdsapzinis guņkura skotivē (Nr. 26)

Saruna par pīminis vītom Latvejā – kai tuos paruoda sarežgeituos totalitarisma viesturis nūtikšonys, atbiļdeibu par pīminis vītom i tūs atteisteibys leiminim, suocūt nu vītejis atzeišonys da īkļaušonys turisma ceļvežūs. Sarunā pīsadola Latgolā labi zynomais viesturnīks Kaspars Strods, bet sarunu vadeis viesturneica i religeju pietneica Inese Runce. Vaira informacejis par nūtikšonu ITE.  

Saruna “Latvyskuos i latvīšu identitatis”

  • 2. julī 15.15–17.15 Ciesu izstuožu noms (Nr. 25)

Par latvīšu identitatem i tūs dažaideibu sasarunuos latgalīšu, lībīšu i sieļu kulturtelpu puorstuovi, kurūs vydā ari latgalīši – zvārynuots advokats Agris Bitāns, kriminalromanu autors Aldis Bukšs, Rēzeknis Vaļsts 1. gimnazejis školāns Linards Munda. Vīna nu sarunys vadeituoju – tulkuotuoja, školuotuoja, literate Evika Muizniece. Vaira informacejis par nūtikšonu ITE.

Daugovpiļs 2027

1. i 2. julī ar vasalom ostoņom nūtikšonom pi seve gostūs iz kūpeiguos volūdys kulturvītu (Nr. 27) aicynoj “Daugovpiļs 2027” komanda. “Daugovpiļs 2027” apvīnoj ļauds, kurī dorbuojās Daugovpiļs dasacejuma Eiropys kulturys golvyspiļsātys 2027 izstruodē. Ari piec konkursa nūsasliegšonys ir gribiešona aizsuoktuos iniciativys i projektus turpynuot. Sarunys par dažaidu vidis i socialūs vaicuojumu rysynuošonu, ilgtspieju, īsakļaušonu i vierteibom. Vaira informacejis par kulturvītys programu ITE.

Tim, kurī navar byut iz vītys festivalā Ciesīs, ir vareiba festivala programu pīdzeivuot diskuseju tīšraidēs voi kaidā nu četru kūpā vieršonuos vītu Latgolā. Tuos itūgod ir Bolvu nūvoda muzejs (1. julī nu 12.00 da 15.00), Dagdys Turisma informacejis centrs (1. julī), Kruoslovys nūvoda centraluo biblioteka (1. julī nu 10.00 da 17.00 i 2. julī nu 10.00 da 14.00) i Lūznovys muiža (1. i 2. julī nu 10.00 da 18.00). Vaira par festivala kūpā vieršonuos vītom ITE.

Print Friendly, PDF & Email

Nūtikšonu kalendars

Aug
16
Ūtr
20:00 Latgalīšu kukne @ tīšsaistē
Latgalīšu kukne @ tīšsaistē
Aug 16 @ 20:00 – 21:30
Latgalīšu kukne @ tīšsaistē
Vaira informacejis: ITE
Aug
18
Cat
20:00 Ūgys koncerts @ "Kaņepes Kultūras centrs"
Ūgys koncerts @ "Kaņepes Kultūras centrs"
Aug 18 @ 20:00 – 22:00
“Kaņepes Kultūras centra” duorzā – Ūgys koncerts. Pi puļts DJ MARTIN BIRCH.   Ūga īvalk klauseituoju Rēzeknis hiphopa kulturys kusteibā. Tei ir īlu muzyka, mīlesteiba i vīnuoteiba storp ituos kulturys pīkūpiejim. Vīneiguo sīvīte, kura repoj[...]