Kai singlys izīt Shipsea i Ūgys kūpdorbs “Dunka”

Kai singlys izīt Shipsea i Ūgys kūpdorbs “Dunka”

Rokstu sagataveja: portals lakuga.lv

Juņa suokumā izguoja Shipsea (aba Juoņa Šipkēvica) jaunais albums “Apgaismo mani”, kurā kai gaška pīsadola ari latgalīšu hiphopere Ūga. Šudiņ obeju sadarbeiba – dzīsme “Dunka” – izīt kai singlys, aicynojūt iz muziķa koncertim vosorys golā.

Albumā “Apgaismo mani” ir 11 kompozicejis i vīnā nu tūs – dzīsmē “Dunka” – muzikis sasadorboj itūšaļt cīši popularū latgalīšu hiphopa izpiļdeituoju Ūgu, tai ari albuma īsaskanūt latgalīšu volūdai. Dzīsmis muzykys autors ir Juoņs Šipkēvics, bet vuordus sarakstejuši Marts Pujāts i Ūga.

Par albumu Shipsea soka: “Jaunais albums ir autobiografiskys – tematika baļsteita pīredzis stuostūs i nūtikšonuos. Tymā saklausomi muzykali kontrasti, pasamejūt kai energiskom, tai liriskom temom, kai ari dažaidu muzykalūs raksturu atsakluošonom.”

Leidza ar dzīsmi muziki pīduovoj “Dunka” dzeivuo izpiļdejuma videoīrokstu nu albuma prezentacejis nūtikšonys vosorys suokumā Dailis teatra mozajā zālē. Bet tīpat, Dailis teatrī, 30. i 31. augustā Shipsea aicynoj iz albuma lelajim koncertim.

Par sadarbeibu ar Ūgu dzīsmē “Dunka” Juoņs Šipkēvics soka: “Es uzrunuoju Ūgu jau tod, kod maņ beja viņ ituos dzīsmis skice i, koč ari īprīšk nabeju jū satics, mani beja savaldzynuojs juos latgaliski osais i reizē cīši jiuteigais veids, kai jei vuordūs ītierp sovu ospruoteigū dūmu.”

Ūga atsazeist, ka uzaicynuojums sasadorbuot ar Juoni jai bejs lels gūds i izaicynuojums: “Kai mes zynim, Juoņam ir eistyn dzirda muzykys dzierde muzykā. Golā, pasaļaunūt iz sovu maņu, ar lapnumu varu saceit, ka miseja ir izpiļdeita! Asu pateiceiga par kūpdorbu i grybu izsvērt, ka Juoņs ir truopejs taišni symtnīkā ar pavadejuma izvēli.”

Jau asam viestejuši, ka pādejā laikā, Ūgai, kurei ir ituos šaļts vīna nu aktivuokūs latgalīšu muziķu,  ir vairuokys sadarbeibys ar Latvejā zynomim puornūodu muokslinīkim – pārn izdūta kūpeiga dzīsme ar dzīduotuojom Patrishu i Dināru Rudāni, bet itūgod Ūga bejuse gaška ari Artura Skuteļa i Thomas Haze albumūs.

Print Friendly, PDF & Email

Nūtikšonu kalendars

Aug
18
Cat
20:00 Ūgys koncerts @ "Kaņepes Kultūras centrs"
Ūgys koncerts @ "Kaņepes Kultūras centrs"
Aug 18 @ 20:00 – 22:00
“Kaņepes Kultūras centra” duorzā – Ūgys koncerts. Pi puļts DJ MARTIN BIRCH.   Ūga īvalk klauseituoju Rēzeknis hiphopa kulturys kusteibā. Tei ir īlu muzyka, mīlesteiba i vīnuoteiba storp ituos kulturys pīkūpiejim. Vīneiguo sīvīte, kura repoj[...]