Rokstu sagataveja: portals lakuga.lv

Ituos nedelis golā Lūznovys muižā nūsaslādz šveicīšu multimuokslinīka Vinsenta Flikigera (Vincent Flückiger) izstuode “Noir sur blanc i cytys kruosys”. Vinsenta dorbūs vīta ir ari Latgolys stuostim, jo ite paīt ari sova daļa juo laika, bet itūnedeļ jis īsoka nūtikšonu izlasi, kurū aicynoj pīdzeivuot Latgolā.

Eisūs kinu festivala “Manhattan Short Film Festival” sasatikšona

13. julī Latgolys viestnīceibā GORS byus sasatikšona ar Mahhetenys eisūs kinu festivala organizātuoju Latvejā – režisoru Stanislavu Tokalovu. Tai kai pats taisu ari kinys, regulari sekoju leidza kinu i eipaši eisūs kinu festivalim vysā pasaulī, deļtuo munu viereibu dasaisteja ari itei sasatikšona ar “Manhattan Short Film Festival” organizatorim Latvejā. Prīcojūs, ka jaunīšim niu ir taida īspieja! Īsoku tū izmontuot i reizē vieleju ari rodūšū veiksmi.

Preiļu parka svātki i “Zero Waste” festivals 15. i 16. julī

Parka svātku i jo eipaši “Zero Waste” festivala temati, vareiba klauseitīs lobu muzyku, aktivitatis dobā kai, par pīmāru, velosipedu puorguojīņs, dobys i dižkūku stygu puorguojīņs maņ ruodīs cīši interesanti! Tys ir bezatkrytumu i videi draudzeiga dzeivisveida populariziešonai veļteits festivals i ruodīs, apsveicami, ka koč kas taids nūteik ari Latgolā!

Lūznovys muižys “Muokslys pikniks” 17. julī

Es jau seņ gribieju byut kluotyn kaidā nu “Muokslys pikniku”, par kurim asu cik daudzi dzierdiejs, nu nikod da ituo nabeja saguojs byut. Itūgod gon byušu na viņ publikā, nu ari pīsadaleišu ar izstuodi “Noir sur blanc un citas krāsas”. Ar Lūznovys muižu mani saista ari tys, ka pyrmais koncerts, kas tyka atcalts pyrma diveju godu, kod suocēs pandemejis laiks, beja paradzāts taišni ite. Maņ ir lela prīca beidzūt atsagrīzt itamā īdviesmi nasūšajā vītā!