Jauns latgalīšu kebabs Reigā – “Garšeigs” Juglā

Jauns latgalīšu kebabs Reigā – “Garšeigs” Juglā

Rokstu sagataveja: portals lakuga.lv

Jau aptyvai pusgodu Reigā, Juglā, Murjuoņu īlā 91, atsarūn svaiga uotruos ādynuošonys īstuode “Garšeigs” kebabs. Ziņkuoreibys vadeiti, raudzejom izzynuot, kas tod globojās aiz “Garšeiga” kebaba i parkū izvālāts taišni taids nūsakums.

Kebabam “Garšeigs” saiminīki ir divi aktivi jauni puiši – Deniss i Mārteņš nu Rēzeknis. Mārteņš stuosta, ka jis latgaliski runoj sovā saimē i ar atseviškim draugim. Denisam dzymtuo volūda ir krīvu, tok ari jis ar leluokū prīcu “grīž naraveitā latgalīšu volūdā.” Obeji puiši runoj latgaliski ari dorba vajadzeibuos.

“Garšeigs” saiminīki nu kairuos pusis: Mārteņš i Deniss.

Kai stuosta Mārteņš, ideja par kebaba sataiseišonu Juglā roduos juo draugam Denisam, partū ka beja sajiuta, ka Juglā tryukst vītu, kur varātu dreiži i gordai paēst. Tai kai rajons nav mozs, tod vajadzātu byut ari gona lelam pīprasiejumam. Kebabs ir populars īlys iedīņs (street food) – tys ir dreiži pagatavojams, suoteigs, nu dabeigu izejvīlu, par daīmamu cenu i golvonais, ka gords!

Mārteņš ari pastreipoj, ka lels paļdis juosoka, īspiejams, popularuokuo kebaba “Ausmeņa kebabs” saiminīkam Valteram Murānam, partū ka tod, kod puišim roduos ideja par kebaba attaiseišonu, Valters Mārteņam deve vareibu struoduot sovā kebabā Reigā, reizē zynūt, ka jis audzynoj potencialu konkurentu. Kai asūt sacejs pats Valters: “Asu par tū, kab atsateista kebaba kultura Latvejā i kab sovejim vyss izadūd.”

Vaicojūt Mārteņam, parkū izvālāts taids nūsaukums, jis pīzeist, ka izdūmuot nimoz nabeja vīgli. Suokumā asūt bejuši vysaidi varianti, tok nivīns tai eisti nav patics. Tod puiši izlēme, ka nav vajadzeibys nu jauna izgudruot velosipedu i juoīt tautā ar nazkaidu vīnkuoršu nūsaukumu. Deļtam ari izviele krytuse taišni iz “Garšeigs”.

“Garšeigs” kebabs Juglā, Reigā.

“Nūsaukums beja veids, kai personalizēt uznāmumu, īlikt daleņu seve. Nui, mes dzeivojam Reigā, tok nasom sevī pasauļa redziejumu, kuru dabuojom Latgolā. Zynoms ari, ka Latgola ir izdaudzynuota par myusu vīsmeileibu i boguoteigi kluotim goldim – ari mes raugom struodot, tai, lai cylvāks pi myusu sasajustu kai ba byutu gostūs Latgolā.”

Mārteņš pīzeist, ka kasdīnā nasaīt cīši bīži runuot ar klientim latgaliski, tok, kod saīt, tuos vysod izavierš par pošom sirsneiguokajom sarunom. “Goduos, ka cylvāki īejūt soka: “Vasali!” i es ar navyltuotu prīcu suoku bērt vuordus latgaliski, jī apjiuk i tuoļuok vaira nasaprūt. Pa munam, tys nūzeimej, ka ari cylvākim, kuri narunoj latgaliski, itei volūda ir interesanta.”

Vaira par kebabu vari izzynuot “Garšeigs” Instagram kontā ITE i Facebook kontā ITE.

Print Friendly, PDF & Email

Nūtikšonu kalendars

Aug
16
Ūtr
20:00 Latgalīšu kukne @ tīšsaistē
Latgalīšu kukne @ tīšsaistē
Aug 16 @ 20:00 – 21:30
Latgalīšu kukne @ tīšsaistē
Vaira informacejis: ITE
Aug
18
Cat
20:00 Ūgys koncerts @ "Kaņepes Kultūras centrs"
Ūgys koncerts @ "Kaņepes Kultūras centrs"
Aug 18 @ 20:00 – 22:00
“Kaņepes Kultūras centra” duorzā – Ūgys koncerts. Pi puļts DJ MARTIN BIRCH.   Ūga īvalk klauseituoju Rēzeknis hiphopa kulturys kusteibā. Tei ir īlu muzyka, mīlesteiba i vīnuoteiba storp ituos kulturys pīkūpiejim. Vīneiguo sīvīte, kura repoj[...]