Šveicīšu muokslinīka izstuodē – Latgolys skicis i stuosti

Šveicīšu muokslinīka izstuodē – Latgolys skicis i stuosti

Rokstu sagataveja: portals lakuga.lv

Svātdiņ, 17. junī, trejuos stuņdēs piec pušdīņu Lūznovys muižys festivala “Muokslys pikniks” laikā ar sasatikšonu nūsaslēgs šveicīšu multimuokslinīka Vinsenta Flikigera (Vincent Flückiger) personalizstuode, kurā vysu dorbu vydā apsaverami ari zeimiejumi nu juo Latgolys skiču cikla. Izstuodis nūslāguma pasuokumā byus vareiba īsavērt ari tūpūšajā eisūs stuostu i zeimiejumu gruomotā “Trusīni vessim reitā pi puiša”.

Muokslinīks, blogers i profesionalais muzikis Vinsents Flikigers ir dzims Friburgā, Šveicē. Juo dzeivisbīdrine ir čelliste Ilze Grudule, pasasokūt kurai, Vinsents breivi runoj latvyski, kai ari vuicuos latgalīšu volūdu. Jau vaira nakai desmit godu Vinsenta celi regulari vad iz Latveju i jo eipaši Latgolu, kurū jis īmyužynuojs ari skiču ciklā “Latgale laiku ritā”. Sūpluok itam ciklam Lūznovys muižā apsaveramajā izstuodē “Noir sur Blanc un citas krāsas” (Malns iz bolta i cytys kruosys) skotomi dorbi nu dažaidu muokslinīka rodūšuos darbeibys periodu – komiksi ar šaļteņom nu muziķu dzeivis, animacejis projekta “Bach-o-matic” vizualī i tielnīceibys dorbi, ituo gods pavasarī rezidiešonys laikā Pedvalē topušī muokslys dorbi i cyti. Izstuodē ir puorstuovāti vysi Vinsenta Flikigera rodūšuos darbeibys vierzīni – vizualuo muoksla, kino i muzyka. Muokslineica Ilona Linarte-Ruža par Flikigera dorbim soka: “Vinsenta Flikigera viereiguo acs sagiun i īvāroj kotru seikumu, kū piečuok puorvierš tik jam rakstureigā zeimiejumā, skicē, vīgli sagiunamā kompozicionalā rysynuojumā.”

Nu 2016. gods muokslinīks struodoj pi vierīneiga projekta: komiskim ar šaļteņom nu muziļu dzeivis, kas 2020. goda suokumā izdūti atseviškā gruomotā. 2021. gods suokumā Flikigers radejs ari animacejis kinu “Bach-o-matic”, kurei bejuse vairuoku nūzeimeigu storptautyskūs kinu festivalu programu vydā. Tei ir stuosts par treis minutim baroka laika komponista Johana Sebastiana Baha dzeivē, kod jis 1735. gods pavasarī izlem nu jauna iztaiseit sovys pasis biļdi. Sūpluok kinys ir sataiseitys ari animacejis dorba golvonuo personaža Baha skulpturys i bronzā i replikys kruosainā sintetiskajā materialā. Muokslinīka jaunuokais projekts ir Hendeļa oratorejis “Il trionfo del tempo e del desinganno” atskaņuojums ar orkestri “Les Passions de l’Âme” i dzeivū ilustriešonu (“live illustration”), kas izskanēja ituo gods pavasarī Šveicē i gasteišonu Beļgejā.

Karteņā: Vinsenta Flikigera izstuode Lūznovys muižā, foto Edeite Husare/portals lakuga.lv

Atseviški izstuodē apsaveramī dorbi īprīšk vairuokys reizis jau pabejuši Latvejā – kai dorbi nu izstuodis par Raiņa dzeivi Šveicē, tai izstuodis “Latgale laiku ritā”. Taišni dorbi nu Latgolys cikla, kurā īmyužynuota Latgola Stiernīnis apleicīnē, ir īdvesmuojuši eisūs stuostu i zeimiejumu gruomatenis “Trusīni vessim reitā pi puiša” tapšonu. Tuos radeišonai Vinsents pyrma vairuoku godu stuostu pīraksteišonai uzrunuoja latgalīšu projektu vadeituoju Edeiti Husari. Vysu izstuodis laiku tuos apmaklātuojim pyrmajim beja vareiba īpasazeit ar itim stuostim. Skenejūt QR kodus, kas izlykti iz pīna konu speciali izstuodei taiseitajā instalacejā “Pīna golds”, video versejā stuostus varēja nūsavērt autoris skaitejumā. Stuostu īdviesme ir Vinsenta zeimiejumi, kurūs tematikā īveita kaida pošys Edeitis, Vinsenta voi kur cytur nūklauseitys nūtikšonys šaļts. Eisūs stuostu gruomateņa izīs vosorys golā, tū ar Latgolys kulturys programys atbolstu izdūs bīdreiba “LgSC”. Vysi stuosti sūpluok latgalīšu volūdai byus publicāti ari vuocyski (tulkuotuoja Nikole Naua) i angliski (tulkuotuojs Džeids Vils).

Svātdiņ, 17. julī, izstuodis nūslāgums reizē byus ari Lūznovys muižys festivala “Muokslys pikniks” atkluošonys pasuokums. Tymā byus vareiba dzierdēt poša Vinsenta Flikigera stuostejumu par izstuodē apsaveramajim dorbim, kai ari īsavērt gruomateņā “Trusīni vessim reitā pi puiša” i dzierdēt puora stuostu Edeitis Husaris skaitejumā.

Galerejā: Vinsenta Flikigera izstuode Lūznovys muižā, foto Edeite Husare/portals lakuga.lv

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]