Rokstu sagataveja: portals lakuga.lv

Ar lekcejom, meistarklasem, performaņcem i izstuodem nu 26. da 29. juļa Daugovpilī nūtiks Storptautyskais laikmeteiguos keramikys festivals 2022, informej organizatoru puorstuove Inita Paegle.

Vosora eistyn ir festivalu laiks, kod pasuokumu vērtini var baudeit vairuokys dīnys piec kuortys. Itūgod keramiki i keramikys muokslys cīneituoji puļcejās Daugovpilī Storptautyskajā laikmeteiguos keramikys festivalā 2022. Tuo programa paradz izstuodis, lekcejis i prezentacejis. Ari keramikys simpozejs “Ceramic Laboratory”, kas itūgod Daugovpilī nūteik jau dasmytū reizi, ļaus sevkuram interesentam baudeit cepļu kūršonys i attaiseišonys svātkus i vērtīs keramiku paraugdemonstriejumus.

Festivala kulminaceja paradzāta pīktdiņ, 29. julī, 16.00 stuņdēs Daugovpiļs Marka Rotko muokslys centrā, reizē atkluojūt div izstuodis: keramikys simpozeja “Ceramic Laboratory” nūslāguma izstuodi i Pūlejis laikmeteiguos keramikys izstuodi “Telpas jautājumi”. Pyrma izstuožu atkluošonys 15.00 stuņdēs pūļu kuratore i muokslys viesturneica Marta Vrublevska vadeis lekceju, kurā īpazeistynuos ar Pūlejis keramiku. Lekceju cyklys turpynuosīs ari piec svineiguos izstuožu atkluošonys – 17.00 stuņdēs Rotko centra konferenču zalē plašuoku publiku īpazeistynojūt ar Latvejis sābru vaļstu laikmeteigū keramiku. Leidz ar saulis rītu 22.00 stuņdēs Martinsona sātys pogolmā byus baudoma rumaņu muokslineicys Delijis Maksimys i ungaru muokslinīka Jozefa Islai audiovizualuo performance “Polywaves”. Festivala nūslāgumā 23.00 stuņdēs tīpat īsamirdzēs i tiks atkluota latvīšu keramikis Elīnys Titānis guņs skulptura.

Festivalā pīsadaleis četrpadsmit muokslinīki nu septeņu vaļstu: Rasa Justaite Gecevičiene (Leitova), Ingrīda Allika (Igauneja), Alicja Bulavka-Fankidejska (Pūleja), Dmitrijs Bulavka-Fankidejskis (Pūleja), Marta Vrublevska (Pūleja), Delija Maksima (Rumaneja), Jozefs Islai (Ungareja). Latveju puorstuov muokslinīki Elīna Titāne, Lauris Krauze, Hanna Mjadzvedzeva, Una Gura, Lilija Zeiļa, Nellija Dzalba i Ilona Abdulajeva. Dalinīku pulkā ir ari muokslinīks nu Ukrainys – Andrijs Ilinskis.

Ar Storptautyskuo laikmeteiguos keramikys festivala programu var seikuok īpasazeit ITE.