Festivals “Gostūs Latgolā” Daugovpilī sagaideis ar tradicionalom i jaunom nūtikšonom

Festivals “Gostūs Latgolā” Daugovpilī sagaideis ar tradicionalom i jaunom nūtikšonom

Rokstu sagataveja: portals lakuga.lv

Ituo gods 30. julī nu 12 stuņžu pušdīņlaikā leidz pat 11 stuņdem vokorā Vīneibys laukumā Daugovpilī nūtiks jau ūtrais festivals “Gostūs Latgolā”.

Festivala “Gostūs Latgolā” vīns nu golvonūs mierķu ir stuosteit par Latgolys vīsmīleibu, kulturu i tradicejom. Festivals ir ari lobs īmeslis, kab atzeimēt Šmakovkys muzeja ekspozicejis sastū dzimšonys dīnu. Šmakovkys muzejs pādejūs godūs ir palics par vīnu nu īcīneituokūs turisma vītu kai piļsātys dzeivuotuojim, tai i gostim.

Pasuokuma laikā vysaidūs veidūs tiks atkluots, kai vīnkūpus dzeivoj vysaidu tauteibu cylvāki, kuri ari daudznacionalā vidē sagloboj sovu tradicionalū kulturu, omotus i kulinarū montuojumu. Vīna svareiga Latgolys kulinaruo montuojuma sastuovdaļa ir ari šmakovkys darynuošona i patieriešona.

Sūplūk tradicionalajai Latgolai ir ari myusdīneiguo Latgola. Taišni deļtam kai daļa nu festivala programys byus ari storptautyskais motobraucieju saīts, kurā pīsadaleis motoklubi ar lelu pīredzi i sovom tradicejom: Old School MC, MOTO POINT, Hells Angels MC, Pārdaugava MC, Verum Bellators MC, Free Hawks MC, Quest of the Roads MC, Red Devils MC, Tommy Guns MC, Vēja Brāļu Ordenis MC, Stuntfighters MC, Lielceļa Klaidoņi MC, Rēgi MC, Wolf Skull MC, Mammoths MC, XIII MC, Spieķi Vējā MC, Panthers MC, Savējie MC, Rolling Anarchy Mcc, Shadows Mcc i cyti.

Vysys dīnys garumā Vīneibys laukumā nūtiks vysaidys aktivitatis: ekspozicejis “Šmakovkys muzejs” prezentaceja, Latgolys amatnīku i ražuotuoju tierdzeņš, keramikys darbneicys, tetoviešonys salons i pat sovs mini zoo.

Latgolys vīsmīleibys svātki suoksīs ar piļsātys nacionalūs bīdreibu muzykalajim prīšknasumim (latvīšu, leitovīšu, ukraiņu, ebreju, krīvu i cytys nacionaluos bīdreibys). Trejuos stuņdēs suoksīs storptautyskuo motobraucieju saīta parada braucīņs. Leidz pat ostoņom stuņdem vysi mocikleti stuovēs Vīneibys laukumā, tūs varēs apsavērt i pi tūs nūsabiļdēt. Pasuokuma laikā byus ari moto triala paraugdemonstriejumi, kur uzastuos Kristaps Kīlis – vīns nu lobuokūs moto triala braucieju Latvejā i Baļtejā. Byus ari īspaideigs šovs “StuntRider”, kuru ruodeis Didzis Grundulis, kurs ar naatlaideigim trenenim i saceņseibu pīredzi ir palics par vīnu nu Eiropys lobuokūs kaskaderu.

Septeņuos stuņdēs Vīneibys laukumā byus vokora koncerts, kurā uzastuos Vjačeslavs Mitrohins i orkestris “Daugava”, taipoš ari muokslinīki nu Leitovys KJ Collective ar solisti Kotrīnu Juodzevičuti.

Sovpus Daugovpiļs Turisma informacejis centra skotlūgūs (Reigys īlā 22a) nu 30. juļa leidz augusta beigom byus vareiba apsavērt tautys fotostudejis “Ezerzeme-F” izstuodi “Latgolys skaistuokuos ainovys”. Izstuodē apkūpuoti Pjotra Murāna, Anatolija Kivrina, Svetlanys Pokulis, Linarda Onzula i Jura Buklovska fotografejis ar Latgolys dobys skotim vysaidūs godalaikūs i piļsātys skoti.

Tikom ekspozicejā “Šmakovkas muzejs” (Reigys īlā 22a) byus vareiba apsavērt 10 lelformata fotodorbus, kuru autori ir Ivars Soikāns, Valērija Cigankova, Ivars Skudra, Mārtiņš Onzuls, Pjotrs Murāns, Svetlana Pokule, Viktors Savčenko, Linards Onzuls i Jurijs Buklovsks.

Print Friendly, PDF & Email

Kalenders

Jul
16
Ūtr
17:00 Rezidejūšūs muokslinīku publisku... @ Rotko muzejs
Rezidejūšūs muokslinīku publisku... @ Rotko muzejs
Jul 16 @ 17:00 – 18:30
16. julī 17.00 stuņdēs Rotko muzejā sevkuram byus vareiba īpasazeit tyvuok ar ostonim storptautyskim muokslinīkim publiskajuos prezentacejuos, kurymuos jī īpazeistynuos ar sevi i sovu dailradi.   Nedelis garumā, nu 12. da 19. juļa Eiropys Savīneibys[...]
Jul
18
Cat
14:00 Bolvu nūvoda svātki @ Bolvi
Bolvu nūvoda svātki @ Bolvi
Jul 18 @ 14:00 – Jul 20 @ 23:45
Bolvu nūvoda svātki @ Bolvi
16:00 Storptautyskuos rezidencis nūslā... @ Rotko muzejs
Storptautyskuos rezidencis nūslā... @ Rotko muzejs
Jul 18 @ 16:00 – 17:30
18. julī 16.00 stuņdēs Rotko muzeja konferenču zālē nūtiks storptautyskuos rezidencis nūslāguma izstuodis atkluošona.   Nedelis garumā, nu 12. da 19. juļa Eiropys Savīneibys finansātuo projekta “Eiropas kultūra: Visi dažādi – visi vienlīdzīgi” laikā Rotko[...]