Rokstu sagataveja: portals lakuga.lv

Pīktdiņ, 5. augustā, 16.00 stuņdēs Rēzeknis nūvoda Drycānu draudzis sātā nūtiks izstuodis “Modests Līpenīts – Dricānu romantiķis” atkluošona, informej organizatoru puorstuove Lana Kazlauskiene. Školuotuoja, muokslinīka, sabīdryskuo darbinīka i dzymtuos vītys patriota Modesta Līpenīša (1934–2008) rodūšajam davumam, eipaši gleznīceibai, veļteituo izstuode byus apsaverama da 7. augusta Drycānu pogosta svātku laikā.

Drycānu, Taunagys i Jaunstrūžānu školu audzieknim vairuokuos paaudzēs Modests Līpenīts beja kīmejis, biologejis i vizualuos muokslys školuotuojs – zynūša, ar stuostnīka talantu apveļteita, praseiga i disciplinu prosūša personeiba. Gondreiž kotrys školys gaitinī voi klasē byus vierīs ari iz kaidu juo radeitu gleznu.

Tryukumā augušajam, obejus dzymdynuotuojus agri pagaisynuojušajam puišam šyupelī beja īlykta vareiba īraudzeit skaistū dobā i atkuortuot tū muokslinīciskim leidzeklim iz papeira. Rēzeknis pedagogiskajā školā juo talantu pamaneja i iz reizis suoce atteisteit zeimiešonys prīškmata metodikys pasnīdziejs Jakovs Beketovs. Piec školys pabeigšonys Modestam vīneigajam tyka dūta vareiba, nasuocūt školuotuoja gaitys, stuotīs augstškolā. Naveiksmeiga apstuokļu sakriteiba līdze eistynuot sapynu par studejom Muokslys akademejā, tok muokslys izzynuošonu i praktiziešonu jis turpynuoja patstuoveigai myuža garumā.

Pīminis izstuodē byus apsaverami daži dasmyti nu kūpumā ap symts Modesta Līpenīša radeitu muokslys dorbu. Tūs vydā romantiskā rūkrokstā veiduotys eļlis, akvareļu, temperys gleznys, pasteļkreiteņu dorbi, zeimiejumi i skicis, kas līcynoj par spieceigu aizaraušonu ar dobys ainovys i klusuos dobys pietnīceibu. Modesta daiļradē nūzeimeigu vītu ījam dzymtūs Drycānu attāluojums, kas tai pīškir papyldu vierteibu kulturys montuojuma kontekstā.

Unuki stuosta, ka vactāvs gleznuojs breivajā laikā – naktīs i leitainuos dīnuos, storp dorbu školā, gaitom duorzā, pļovā, pi lūpeņu i juo eksperimentu laukā – augļu duorzūs. “Jis naizsokamai mīļuoja dobu, vītejuos ainovys, zīdus, mežu, Kruoceiti, vysod pavasarūs guoja laseit vyzbuļus, dzīduoja dzīsmis par īvu zīdiešonu. Tū vysu ari gleznuoja. Beja lels romantiks i taids dīzgon napraktisks cylvāks, ar mašynu i traktorim nabrauce. Ar zirdzeņu jam cīši patyka braukt – sēdēt rotūs i dzīduot par skaistū tāvu zemi. I maņ mozai, klausūtīs juo dzīsmēs, stuostūs i vērūtīs, kai jis gleznoj, roduos apziņa, ka asmu skaistuokajā i lobuokajā vītā iz pasauļa. Tū jis muoceja izbūrt!” atmiņuos doluos mozmeita Gita Līpenīte-Čudarāne.

Modesta Līpenīša romantiķa rūkrokstu izstuodē varēs “skaiteit” ari juo uzjimtajuos dobys i portretu fotografejuos, kai ari ryupeigai gataveitajūs tekstūs, kurus reiz skaitejs kai bieru izvadeituojs i uzrunu saceituojs kopusvātkūs. Ekspozicejis dokumentaluos līceibys atguodynuos par aizrauteigu myuža dorbu ar školānim, režisora, aktera i scenografa gaitom vītejā amaterteatrī i cytim nūzeimeigim Modesta Līpenīša dzeivis guojuma pīturpunktim.