Rokstu sagataveja: portals lakuga.lv

“Latgola vosorā ir eipaši skaista – ite nūteik dzeiveiba, rūseiba i ruodīs, ka cylvākūs atplaukst mīlesteiba, sirsneiba i cīši lela ciļvieceiba. Kotrys, kuram saīt ite tikt, palīk par līcinīku, ka Latgola maina jū pošu. Nav juobrauc iz tuoļom zemem, lai pīdzeivuotu breinumu, jo ari ite tū var pīdzeivuot. Es poša asu uzauguse Daugovpilī storp sirsneigim i jaukim cylvākim, i es lepojūs, ka īmu taišni nu ituos piļsātys,” tai dzīduotuoja PALÚ aba Olga Palušina.

PALÚ ar muzyku nūsadorboj jau nu agrys bierneibys, ir sajāmuse panuokumus vītejā mārūgā i storptautyski. Muzike leluoku atpazeistameibu īmontuoja 2021. goda rudinī, pīsadolūt muzykys šovā “X faktors”, kur beja vīna nu nu 12 finalistu. Olga portala lakuga.lv skaiteituojim īsoka TOP lītys, kurys paveikt itūvosor.

Grupys “Prāta vētra” koncerts Daugovpilī

Grupys “Prāta vētra” koncerts 6. augustā Daugovpilī ir tys, kas juoapmeklej kotram myusu vaļsts īdzeivuotuojam i ari uorzemnīkam. Tei ir grupa, kas dora sovu lītu nu vysys sirds i ar vierīni. Grupa sovūs koncertūs īgulda tik daudz energejis, lai tys byutu pasauļa leimenī i kotrys varātu tū baudeit kai eistu šovu. Poša asu bejuse jūs koncertūs sešys reizis i īšu ari itūgod, jo eipaši muzikim tys, taipoš kai Dzīšmu svātki, īdūd lelu īdvesmi. Poša personeigi asu īsapazynuse ar Ingaru Viļumu i Aiju Auškāpu, kas maņ koncertu padora vēļ eipašuoku.

Aglyunys bazilika i maizis muzejs

Ka grybīs sajust Latgolys dvēseli, tod vysmoz reizi dzeivē juoteik Aglyunā, tys nav apsprīžams, jo augusta vydā ite sasateik gondreiž vysi. Es poša kaidu reizi pīstruoduoju amerikaņim organizātajuos nūmetnēs Latgolā i kotru godu iz Aglyunu vedem amerikaņus, jī beja stuovā sajiusmā par itū vītu, partū iz itaini nazkod atvežu sovys kursa bīdrinis, juos ari nūviertēja tū, cik eipaša ir Aglyuna. Eipaši harizmatiska ir Aglyunys maizis muzeja saimineica, kura ekskursejis laikā pastuosta par maizis cepšonys procesu, īsaistūt apmaklātuojus. Teikūt muzejā, tu jussīs tai, it kai gasteitu pi sovys babys, kura pabaruos i tevi, i tovu dvieseli.

Jauna vīta Daugovpilī – “IGGI bārs & karbonādes”

Cīši kvalitativa i augsta leimiņa vīta, kur pasnādz estetiski nūformātus i interesantus dzierīņus, kai ari iedīņus. Asu dzierdiejuse, ka tī pasnīdz ari austeris, i Daugovpilī tys nūteikti ir jaunums. Faktiski, lelpiļsātu trendi teik ari pi myusu, par tū ir lela prīca. Cīši lepojūs ari ar sovim draugim, kuri Daugovpilī attaisejuši kopejneicu “LAMPA Cafe Bar”, kur kotru nedeļu teik aicynuoti jaunī muziki i talanti uzastuot, snīdzūt vareibu byut sadzierdātim i paruodeit sovu talantu.