Rēzeknē atkluos Breivvaļsts duorgumu nomu

Rēzeknē atkluos Breivvaļsts duorgumu nomu

Rokstu sagataveja: portals lakuga.lv

Itūgod Rēzeknis piļsātys svātki suoksīs ar svineigu i nūzeimeigu nūtikšonu – jauna izstuožu noma “Brīvvalsts dārgumu nams” (Krosta īlā 35) atkluošonu, informej tuo vadeituoja Jolanta Leitāne. Koč ari ekspozicejis prīškmati raksturoj Latveju kūpumā, leluokuo daļa nu tūs saisteiti ar Latgolys regionu i Rēzekni, partū taišni tei izvālāta par Breivvaļsts duorgumu noma atsarasšonys vītu.

Izstuožu noma pamatekspozicejis zalē eksponāti prīškmati nu leluokūs Latvejis i uorzemu privatkolekceju, kas viestej par laiku nu Latvejis Republikys proklamiešonys 1918. godā da Ūtruo pasauļa kara suoku. Ekspozicejā ir unikala vareiba apsavērt Latvejis vaļsts, militarūs vīneibu, policejis, rūbežsardzis, kai ari leluokūs Latvejis organizaceju i bīdreibu apbolvuojumus, medalis, kryušu nūzeimis, dokumentus, kartenis, formys i cytys interesantys, vierteigys i rešys viesturis līceibys.

Atseviška izstuodis daļa ir veļteita latvīšu strieļnīkim, kuri kai nacionalys bruņuotys vīneibys tyka organizātys Krīvejis imperejis sastuovā i pīsadaleja Pyrmajā pasauļa karā. Piec Latvejis vaļsts izveiduošonys lela daļa strieļnīku īsastuoja tuos bruņuotajūs spākūs i pīsadaleja Latvejis Naatkareibys karā.

Sovpus ūtruo stuova Boltajā zalē apsavieršonai teik pīduovuotys Latgolys muokslinīku gleznys, kai ari gleznys, kuruos atainuotys Latgolys ainovys. Byutiskai atzeimēt, ka daudzi Breivvaļsts duorgumu noma prīškmati publiskai apsavieršonai eksponāti pyrmū reizi.

Breivvaļsts duorgumu noma atkluošona nūtiks pīktdiņ, 5. augustā, kod nu 17.00 da 20.00 stuņžu izstuožu noma durovys tiks attaiseitys vysim interesentim. Sastdiņ, 6. augustā, izstuožu noms apmaklātuojim byus attaiseits nu 14.00 da 20.00, bet svātdiņ, 7. augustā, nu 14.00 da 18.00 stuņžu. Itamuos svātku dīnuos izstuožu nomu varēs apmeklēt bez moksys.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]