Rokstu sagataveja: portals lakuga.lv

Itūšaļt Latgolys regionā cikom tikai vīnai pošvaļdeibai – Bolvu nūvodam – pi ībraukšonys nūvodā ir pastateitys ceļazeimis kai latvīšu literarajā, tai ari latgalīšu rokstu volūdā. Tok niu ari Preiļu nūvoda pošvaļdeiba ir izlāmuse par lobu taidu zeimu pastateišonai.

29. juļa Preiļu nūvoda dūmis sēdē tyka apstyprynuots lāmums par jaunu ceļazeimu izgataveišonys finansiešonu. Tyka lamts, ka iz golvonajim autocelim, ībraucūt Preiļu nūvodā, tiks pastateitys jaunys zeimis obejūs latvīšu volūdys paveidūs – latvīšu literajā i latgalīšu rokstu volūdā.

Preiļu nūvoda sabīdreibys īsaistis i marketinga dalis vadeituoja Aneta Urka komentej:

“Itys lāmums ir saisteits ar Preiļu nūvoda ilgtspiejeigys atteisteibys strategeju, kurā asam sevi definiejuši kai latgalisku teritoreju.”

Anete Urka ari dasoka: “Asam vīns nu nadaudzūs Latgolys nūvodu, kur pošvaļdeibā kasdīnā struodoj divejuos dorba volūduos – latvyski i latgaliski. Latgalīšu volūda ir daļa nu myusu identitatis, mes ar tū nasalīlejom, tok lapojamīs.”

2021. goda 18. novembrī pyrmū reizi Latvejis viesturē pi ībraukšonys Bolvu nūvodā tyka pastateitys itaida leimiņa ceļazeimis latvyski i latgaliski. Latvejis Universitatis Lībīšu instituta vadeituojs, volūdnīks, muokslinīks, lībīšu kulturys aktivists Valts Ernštreits, tūlaik nūruodeja, ka ituos zeimis pastateišona ir puormaiņu īsazeimiešona ari sabīdreibā kūpumā:

“Itei zeime paruoda lelys puormainis ari sabīdreibā. Zeime paruoda, ka beidzūt piec cīši garu godu mes varim īraudzeit Latvejis dažaideibu – sūpluok latvīšu literarajai volūdai varim īraudzeit latgalīšu rokstu volūdu.

Vysu rokstu par Bolvu nūvoda zeimem skaiti ITE. Piečuok 2022. goda martā Bolvu nūvodam par itū iniciativu tyka pasnāgta Latgalīšu kulturys goda bolva “Boņuks 2021”.

Ari pārnejuo gods vosorā pījimtais Latvīšu viesturiskūs zemu lykums vaļsts i pošvaļdeibu īstuodem nūsoka par pīnuokumu nūdrūsynuot latgaliskuos identitatis i kulturviesturiskuos vidis saglobuošonu i ilgtspiejeigu atteisteibu. Itūs pīnuokumu vydā ir veicynuot latgalīšu volūdys lītuošonu publiskajuos nūtikšonuos i kasdīnys dorbā, kai ari atjaunuot i vidē izmontuot vītvuordus latgalīšu volūdā, tymā skaitā ceļazeimēs, vītu i īlu nūsaukumūs.