Svieteis muzeja “Kolnasāta” 30 godu jubileju i Sakstagola svātkus

Svieteis muzeja “Kolnasāta” 30 godu jubileju i Sakstagola svātkus

Rokstu sagataveja: portals lakuga.lv

13. augustā Fraņča Trasuna muzejā “Kolnasāta” svieteis Sakstagola cīma i 440 godu pastuoviešonys svātkus i “Kolnasātys” 30 godu jubileju, informej muzeja puorstuove Inta Deksne.

Pyrma 440 godu Sakstagols pyrmū reizi pīmynāts viesturis olūtūs – kod 1582. gods 28. julī Pūlejis karaļa revizori vuocu dyžciļteigajam Diderham Heringam nūdeve eipašumā treis zemnīku saimis nu Sakstagola. Nu tuo laika Sakstagolā ir nūsamainejušys vairuokys paaudzis, tok apdzeivuotuo vīta ir izaveiduojuse par pogosta administrativū centru, kur 1897. gods 19. februarī izveiduots pogosts, kas suokumā ītylpa Rēzeknis apriņčī, bet niu ir Rēzeknis nūvoda Drycānu apvīneibys puorvaļdis Sakstagola pogosts.

Sovu atpazeistameibu Sakstagols dabuoja, pasasokūt Trasunu dzymtai – eipaši Fraņčam Trasunam, kurs beja katuoļu gareidznīks, politiks, kulturys i sabīdryskais darbinīks, kurs eipaši ryupiejuos par latgalīšim i latgaliskū, reizē mudynojūt dabuot izgleiteibu i īt kūpeigu ceļu ar Baļtejis latvīšim (vydzemnīkim i kūrzemnīkim). F. Trasuns ir vīneigais katuoļu prīsters, kura dzymtajā sātā Sakstagola “Kolnasātā” jau 30 godu dorbojuos jam veļteits muzejs.

13. augustā 16.00 vysi teik aicynuoti iz F. Trasuna muzeju “Kolnasāta”, kur īškpogolmā byus svātku koncerts, kurā pīsadaleis Rēzeknis nūvoda folklorys kūpys, uzastuos “Dricānu Dominante” i atmiņuos par muzeja atkluošonu daleisīs kulturys darbineica Elīna Prusaka. Pasuokuma laikā tiks atkluota puorvītojamuo izstuode “Sakstagala ciems laikmeta griežos”, kurys veiduošonā izmontuoti muzeja kruojuma materiali i viesturnīka Agra Dzeņa pietejumi par Sakstagolu. Prezentēs ari atkluotņu komplektu “F. Trasuns un viņa laikabiedri”.

Muzeja izstuožu noma kaminzalē bārni (da 10 godu) varēs izkruosuot (mozuokī) voi izzeimēt (leluokī) muzeja kuormus, piec svineiguo pasuokuma muzeja īškpogolmā byus apsaverama itūs dorbu ekspresizstuode. Sovpus muzeja uobeļduorzā varēs izzynuot senejuos spēlis i rūtalis.

Bārnim i dzeivinīku meiļuotuojim byus vareiba muzeja pļovā vyzynuotīs ar zyrgim nu “Rudo kumeļu pauguriem”, apsavērt sīna stuostu i nūsafotografēt pi sīna stoga i vysaidūs veidūs salyktom sīna gubom.

Svātku laikā varēs apsavērt muzeja ekspozicejis (“F. Trasuna dzīve un darbība”, “Pasaule mazā zemniekdēla acīm”) i izstuodis (rūkdorbu izstuode “Papīrs, audums un diegs…” i Latgolys pūdnīku izstuode).

Pasuokuma dīnā muzejs apmaklātuojim byus attaiseits nu 16.00 stuņžu, muzeja apsavieršona i vysys pīduovuotuos aktivitatis byus par breivu.

Print Friendly, PDF & Email

Kalenders

Jul
13
Sai
19:00 Koncertizvadums “Atgriežamies La... @ Lejiscīma estrade
Koncertizvadums “Atgriežamies La... @ Lejiscīma estrade
Jul 13 @ 19:00 – 21:00
Latgolys cylvāku spāks i humora dzierksts, kai ari vaira nakai 100 nūspālātys “Latgola.lv” izruodis īdrūsynuojušys autorus taiseit koncertizvadumu “Atgriežamies Latgolā”. Itamā kompanejā ir apsavīnuojuši režisors Valdis Lūriņš, komponists Valdis Zilveris, dzīšmu tekstu autors Jānis Peters,[...]
22:00 Postfolklorys grupys “Rikši” uza... @ Rotko muzeja pogolms
Postfolklorys grupys “Rikši” uza... @ Rotko muzeja pogolms
Jul 13 @ 22:00 – 23:00
13. julī Daugovpiļs cītūksnī nūtiks 7. storptautyskais viesturyskuos rekonstrukcejis festivals “Dinaburg 1812”. Tū nūslēgs postfolklorys grupys “Rikši” uzastuošona.