Kasgadejūs augusta svātku Aglyunys bazilikā programa

Kasgadejūs augusta svātku Aglyunys bazilikā programa

Rokstu sagataveja: portals lakuga.lv

Aglyunys bazilikā Vyssvātuokuos Jaunovys Marejis Dabasūs uzjimšonys svātki 15. augustā ir cīši eipaša dīna – tei ir katuoļu bazneicā obligati svietejama dīna, kas saistama ar Dīvmuotis Dabasūs uzjimšonys gūdu, tok vīnlaikus ari bazilikys titulsvātki.

1697. godā Viškovys (niulejuo Aglyuna) muižys eipašneica Eva Justīne Šostovicka (dz. Selicka) ar tūreizejuo Livonejis veiskupa Nikolaja Poplavska (1683–1709) atbolstu aicynuoja Viļnis dominikaņus izveiduot Aglyunā klūsteri i draudzis školu. Muižnīki dominikanim duovynuoja zems eipašumus i apsajāme uzceļt bazneicu, klūsteri i nūdrūsynuot atbylstūšus dzeivis apstuokļus divpadsmit dominikaņu tāvim.

1700. godā tyka uzcalta pyrmuo kūka bazneica. 1751. godā tū svineigi īsvieteja Livonejis veiskups Jāzeps Dominiks Puzina (1741–1752), veļtejūt tū Vyssvātuokuos Jaunovys Marejis dabasūs uzjimšonys gūdam.

1762. godā dominikani suoka ceļt jaunu mūra klūsteri i bazneicu īprīškejuos bazneicys vītā (cyti autori roksta par guņsgrāku, tok nav skaidru viesturisku olūtu, kas aplīcynuotu, ka kūka ākys byutu nūdagušys).

Ir sasaglobuojs nūstuosts, ka itymā apvydā kaidai kolpyunei Annai pasaruodejuse Jaunova Mareja ar Jezus bārnu. Meitine tū izstuostejuse tāvam Remigijam, kurs tamā pošā vītā lyudzūtīs redziejs vizeju: boltu bazneicu ar divejim tūrnim. Itī nūtykumi ari pamudynuojuši ceļt bazneicu Dīvmuotis gūdam. Dreizi piec bazneicys uzceļšonys, iz bazneicu suoka dūtīs pyrmī svietceļnīki.

1980. godā atzeimejūt bazneicys 200. jubileju, pavests Jānis Pāvils II tai pīškeira mozuos bazilikys „Basilica minoris” – titulu. 1993. godā pavests ari personeigi apmeklēja baziliku, sovpus 2018. godā tū apmeklēja niulejais pavests Francisks.

Karteņa: Svātuo mise Aglyunys bazilikā. Latgolys Turisma asociacejis arhivs.

Ir fiksāts, ka iz 1911. goda Vosorsvātkim piec tūreizejuo Aglyunys dekana Juoņa Velkmes ziņom, iz Aglyunu prīstera Bronislava Vežbicka vadeibā ir davušuos pyrmuos organizētuos procesejis nu Višķu, Kolupis i Nidricys draudzem. Kūpš tuo laika svietceļuojumi ir nūtykuši kotru godu i seviški uzplauka nu 1918.–1940. godam. Piec žurnala “Katōļu Dzeive” publicātuom ziņom 1934.–1938. godā svātceļnīku skaits 15. augustā sasnēdze ap 100 000 cylvāku.

Izmainis svātceļuojumu tradicejā Latgolā nūtyka padūmu varys periodūs, kod tyka aizlīgts organizēt svietceļnīku grupys, vystik daudzys tyukstūšys ticeigūs atrūņ vareibu privati apmeklēt Aglyunu. 1989. godā, t. i., Trešuos atmūdys laikā atsuokuos regulari svātceļuojumi iz Aglyunu.

Myusu dīnuos Jaunovys Marejis dabasūs uzjimšonys svātkus suok svieteit jau nu 11. augusta, kotru nu dīnu veļtejūt konkretim nūdūmim. 11. augusts – lyugšonys par sliminīkim; 12. augusts – lyugšonys par saimem; 13. augusts – sv. Meinarda gūdam; 15. augusts – Dīvmuotis Dabasūs uzjimšonys gūdam.

Svātku programa Vyssvātuokuos Jaunovys Marejis Dabasūs uzjimšonys gūdam.

11. augusts

12.00 Dīnys Svātuo Mise par sliminīkim pi Bazilikys duorza oltora.
19.00 Vokora Svātuo Mise Dīvmuotis gūdam pi Bazilikys duorza oltora.

12. augusts

12.00 Dīnys Svātuo Mise par saimem pi Bazilikys duorza oltora.
19.00 Vokora Svātuo Mise Dīvmuotis gūdam pi Bazilikys duorza oltora.

13. augusts

12.00 Dīnys Svātuo Mise Dīvmuotis gūdam pi Bazilikys duorza oltora.
Svātuo Meinarda svineibys: 19.00 i 24.00 Svātuo Mise pi Bazilikys duorza oltora.

14. augusts

10.00 Svātuo Mise bazilikā.
12.00 Svātuo Mise pi Bazilikys duorza oltora.
16.00 Svātuo Mise Bazilikā pi Dīvmuotis oltora.

14. augusts, Vyssvātuokuos Jaunovys Marejis Dabasūs uzjimšonys obligatuos svineibys

18.00 Nešpors (vesperis), vokora dīvkolpuojums pi pavesta oltora.
19.00 Svātuo Mise, īstyprynuošona, euharistiskuo proceseja, svieteiba ar vyssvātuokū sakramentu Bazilikys sakralajā laukumā.
22.00 Tautys krystaceļš Bazilikys sakralajā laukumā.
23.30 Pušnakts Svātuo Mise pi pavesta oltora.

15. augusts

07.00 Svātuo Mise latgaliski Bazilikā pi Dīvmuotis oltora.
09.00 Svātuo Mise ar īstyprynuošonu pi Bazilikys duorza oltora.
10.00 Svātuo Mise pūļu volūdā bazilikys kriptā.
12.00 Svātku golvonuo Svātuo Mise, euharistiskuo proceseja, svieteiba ar vyssvātuokū sakramentu, Vaļsts prezidenta uzruna, vaļsts himna pi pavesta oltora.
15.00 Svātku nūslāgums.
19.00 Svātuo Mise Bazilikā.

Print Friendly, PDF & Email

Nūtikšonu kalendars

Sep
27
Ūtr
19:00 Latgalīšu rokstu volūdys nūdarbeiba @ tīšsaistē
Latgalīšu rokstu volūdys nūdarbeiba @ tīšsaistē
Sep 27 @ 19:00 – 20:30
Bīdreiba “LgSC” sadarbeibā ar latgalīšu kulturys ziņu portalu lakuga.lv aicynoj iz ostoņom latgalīšu rokstu volūdys tīšsaistis bezmoksys nūdarbeibom, kab kotrys interesents varātu izzynuot vaira par latgalīšu rokstu volūdu i īsavuiceit tuos pamatprincipus. Latgalīšu rokstu volūdys[...]
Sep
29
Cat
15:00 Viesturis šaļteņu pītura “Latvij... @ Latgolys Kulturviesturis muzejs
Viesturis šaļteņu pītura “Latvij... @ Latgolys Kulturviesturis muzejs
Sep 29 @ 15:00 – 17:00
Itūšaļt Latvejā ir pyrma vieliešonu laiks, kod pylsūni lem, par kuru nu deputatu kandidatu sarokstim atdūt sovu bolsu. Ari pyrma 100 godu 1922. goda 7. i 8. oktobrī riezeknīši, kai ari vysys Latgolys i Latvejis[...]