Aicynoj iz večerinku Ambeļūs 19. godu symta nūskaņuos

Aicynoj iz večerinku Ambeļūs 19. godu symta nūskaņuos

Rokstu sagataveja: portals lakuga.lv

30. augustā 20.00 stuņdēs Ambeļu estradē (voi Medinīku nameņā, ka byus nalobi laikapstuokli) paradzāts vokors ar spieliešonu i daņčim, kai ari kūklātuojis Laimys Jansonis koncerts, informej bīdreibys “JUBRA” projektu vadeituoja Ilze Mežniece. Pasuokuma dalinīki aicynuoti īsarast 19. godu symtam rakstureiguos drēbēs.

Večerinka Ambeļūs ir projekta “19.gadsimts. Saimis gūdu riedeit – tradicionālo amatu un mūzikas nometne ar lomu spēles un eksperimentālās etnogrāfijas elementiem” nūslāguma pasuokums. Piec div dīnu dzeivuošonys 19. godu symtam tyvuos nūskaņuos i apstuokļūs, muziciešonys, kūkliešonys, struoduošonys i vysa kuo jauna īsavuiceišonys, jaunīši i muzykanti aicynuos sevkuru īsajust 19. godu symtā i nūsvieteit vosorys beigys eistā lauku večerinkā, apvalkūt kaidu drēbis gobolu – capuri, garū bruņci, veirīšu vesti voi lynu kraklu, kas tyvynuos myusu dīnu cylvāka tālu tyvuok laikam, kurā veiduojuos i dzeivuoja tautysdzīsmis. 

Projekta mierkis ir radeit i izdzeivuot jaunu formatu tradicionaluos muzykys i omotu nūmetnem, apvīnojūt prasmu vuiceišonūs ar lūmu spēlis elementim i eksperimentaluos etnografejis pajiemīnim, kab atrostu i attaiseitu taidus ceļus jaunīšu īsaisteišonai tradicejis puormontuošonā, kas jaunīšim ruodīs atraktivi, tai veicynojūt folklorys kusteibys kontinuitati – jaunīšu īsaisteišonu folklorys kusteibā. Augusta beiguos tiks organizāta nūmetne, kurā eisā laika periodā sevkurs interesents varēs īspiejami patīsai sasatikt ar vysaiduokim tautys tradicejis elementim, pīdzeivojūt dzeivi “kai senejūs laikūs”. Tradicionaluos prasmis varēs na tik vuiceitīs, bet tiks radeitys situacejis, kod tuos paliks napīcīšamys kasdīnys eksisteņcei. Vidē, kas pītyvynuota izvālātajam laikmatam, 19. g. s. beigom, vysu laiku tiks mimikrāta mitiskuo “paguotnis kasdīna”, rodūt inscinātus sarežgejumus, kas īdereigu lūmu pījāmušim dalinīkim rysynojami “tradicionalā gorā”.

“Nūmetnē aba amatnīka sātā saimineica ar paleidzi sasatrauks par pīdagušū putru, bet saimineicys meita i juos draudzinis ar sātys školuotuojis paleidzeibu gatavēsīs vuiceibom Kruoslovys mārgu gimnazejā. Dāls, kurs napabeidzs studejis Tērbatā paleidzēs saimnīkuot sātā i škaļdeis molku tuos pošys putrys vuoreišonai, sarunuos ar draugim studentim, kas atbraukuši tolkā īkuortuot naseņ īpierktū sātu, diskutēs par nacionalisma i cytom mūdeigom idejom, cikom fotografa muoceklis svaideisīs ar sarkastiskim komentarim i uzjims gaismys biļdis. Valineica, kas paleidz kuortuot jaunūs studeņšu pyuru, pīpaleidzēs ar jūstu i vysaidu nūdereigu reiku gataveišonu, bet nakts tiks pavadeitys pi gunkura pīguļā,” stuosta nūmetnis organizatore Ilze Mežniece. “Mes aicynuosim dalinīkus obejis dīnys pīsaturēt pi sevis izvālātuos lūmys i dorbuotīs, runuot i pat dūmuot tai, it kai lūma byutu juo “ūtrei uoda”, kab kūpā radeitu eistuma sajiutu. Raudzeisim kūpā saprast, ar kū suocās kotra sadzeivē vajadzeiguo līta, cik tulznu ir vajadzeigs tuos sataiseišonai i cik sūļu pa dīnu juonūīt, kab piec vakareņu varātu lobpatykā īlēkt daņcī.”

Projektā tyka izvālāts nūsaceitais “19. godu symta beigu” laiks nūmetnē planavuotūs situaceju izspieliešonai, jo 19. g. s. beiguos dzeivisveids laukūs vēļ ir pīteikami leidzeigs senejūs laiku, tymā skaitā mitiskuo “tautysdzīšmu laika” dzeivis veidam, bet tymā pošā laikā jau ir pīteikami daudz nu piļsātys īsavīsušu “jaunūs” realeju, kab laikmata imitacejā nasarostu puoruok lelys gryuteibys ar materialū bazi. Okuleri, naži, kotli, luopstys, ciervi, puorneicys, škeivi, deči – tī jau ir leidzeiguoki myusu dīnom, atrūnamys i pīlāgojamys tūs jaunuokys kopejis. Kab īvīstu “eistuma” sajiutu, īspieju rūbežūs planavuots 21. godu symtu atstuot aiz nūmetnis rūbežu. Ambeļūs augusta beiguos byus pyrmais mieginuojums itaida tipa nūmetnei.

Nūmetnei vēļ var pīsasaceit. Vaira par tū var izzynuot ITE

Print Friendly, PDF & Email

Nūtikšonu kalendars

Oct
5
Tre
15:00 Pītera Korsaka fotografeju izstu... @ Latgolys Kulturviesturis muzejs
Pītera Korsaka fotografeju izstu... @ Latgolys Kulturviesturis muzejs
Oct 5 @ 15:00 – 16:30
Izstuode viestej par 20. i 21. godu symtā satyktajim zynomajim i mozuok zynomajim latgalīšim. Tei ir līceiba par laikabīdrim mynātajā periodā, kurūs vydā ir Pīters Zeile, Evalds Vasilevskis, Bronislava Martuževa, Juoņs Streičs, Bronislavs Spridzāns i[...]