Rokstu sagataveja: portals lakuga.lv

“Guoju putni vosorys beiguos laižās iz dīnanydim, tok, papietejūt augusta beigu nūtikšonys Latgolā i apleicīnē, vysmoz mani vaira valk iz zīmeļu pusi,” tai folklorys kūpys “Ceidari” dalineica Vizma Mičule pīsoka ituos nedelis īsacejumus.

Tikt pi spāka i sasaskrīt ar guoju putnim

Sastdiņ, 27. augustā, divejuos stuņdēs, ir vārts nūbraukt iz Indrānu pogostu, kur dzejneicys Bronislavys Martuževys dzejis kliets duorzā nūtiks veiru kūpys “Vilki” sasasaukšona ar Bronislavu. Itymā pasuokumā nūteikti varēs tikt pi eistyna spāka, i varbyut pa ceļam izadūs sasasaukt ari ar kaidu Lubuona guoju putnu kuosi. Ka nūbrauksi agruok, varēsi izpieteit ari Dzejis klieti, Slāptuvi, Dzejis strūpus i Rokstu akmiņus. Pyrma pasuokuma vari puorskaiteit “Broņislavas Martuževas Likteņgaitu kladi”, kuramā Bronislavys myužs cīši sasavej ar Latvejis viesturis dzeiparim.

Īprīcynuot vādaru i goru

Kai 27., tai 28. augustā byus vareiba gastēt pi Bolvu nūvoda saiminīku i nūbaudeit jūs saguoduotūs lobumus Sātys kopejneicu dīnuos. Prīca byus na tik vādaram, bet ari goram, tok sovam zūbam i gaumei atbylstūšuokuos sātys kopejneicys vari izavielēt ITE.

Izaļustēt daņčūs Upītē

Kab atvylktum elpu nu ražys nūvuokšonys dorbu, cīši loba izaļustiešona i izakustiešona nu 24. da 28. augustam sagaidoma Bolvu nūvoda Upītis pusē, kur nūtiks storptautyskais foklorys festivals “Lipa kust”. Baļtejis vaļstu i Pūlejis folklorys lobumus varēsi baudeit kai koncertūs, tai daņču meistarklasē i daņču naktī. #UpītieDzeiveJauka

Lipys kustynuošonys programu vari izpieteit ITE.