Kulturys īsacejumi nedeļai: baudeit Latgolys dobu i gataveitīs jaunajam vuiceibu godam

Kulturys īsacejumi nedeļai: baudeit Latgolys dobu i gataveitīs jaunajam vuiceibu godam

Rokstu sagataveja: portals lakuga.lv

Itūnedeļ jau 1. septembris, kas nūzeimej, ka suocās jaunais vuiceibu gods. Partū ari īsacejumus itūreiz sagatavejušys jaunītis, kam itys datums vys vēļ cīši aktuals – latgaliskuo jaunīšu seminara “Atzolys 2022” dalineicys Marija Skangale, Agnese Skangale i Antra Toporkova. Juos īsoka, kai izbaudeit pādejuos vosorys dīnys i lobuok īsuokt jaunū školys godu.

Smeļtīs spāku dobā

Marija Skangale īsoka vosorys pādejuos dīnuos atsapyust i smeļtīs spāku dobā. “Vēļ pādejuos vosarys dīnys i jau dreiži vuiceibys atsasuoks. Īsoku ituos dīnys pavadeit mīreigai i labi atsapyust, lai sasagataveitu jaunajam vuiceibu godam. Vyslobuok tū var eistynuot pi dobys. Zīmeļlatgola i Austrumlatgola varātu byut vīns nu lobuokūs variantu.

Apsavērt kolnus var ari Latgolys dobys parkā “Balkanu kalni”. Staigojūt pa dobys parka stygom, var atkluot kūka skulpturys, interesantus dobys objektus i daudz kū cytu.

Cylvāki, kas ir naskorta meža cīneituoji, drūši var dūtīs pastaigā pa Styglovys grovu. Īspiejams īraudzeit smilšakmiņs atsagumus, daudzveideigu augu pasauli, Styglovys upeitis īleju i pat olu.

Styglovys grova. Kartenis autore: Edeite Husare/portals lakuga.lv

Ka pateik izbraucīni ar velosipedim, tod ir īspieja dūtīs iz dobys parku “Numernes valnis”. Tī var izkuopt skotu tūrnī, pasastaiguot, ir pat velomaršruts. Saimis voi draugu lūkā var dūtīs iz parku “Zīdūņs”. Parkā ir īspieja pasastaiguot, kai ari izbraukt ar velosipedim.”

Aizbraukt iz Cyblu

Sovpus Antra Toporkova īsoka itamuos dīnuos vēļ paspēt aizbraukt iz Cyblu. “Lai atsapyustu nu kasdīnys skriejīņa, ir vārts sataiseit pādejū sprintu i aizbraukt leidz Ludzys nūvodam, Cyblai. Cīmats izaceļ ar sovu kulturviesturis i dobys stygu. Tuos laikā var uzjimt šmukys biļdis iz romantiska tiļteņa puori Iļžys upei, dzīdynuot fiziskuos i gareiguos vainis dzīdnīcyskūs akmiņu kompleksā, kai ari stygys nūslāgumā pabyut iz legendom apveitys solys – Zintnīka laivys. Runoj – ka tī nūsastuot storp trejim dažaidim kūkim i īsavielēt vieliešonūs, tei nūteikti pīsapiļdeis. Pa ceļam nūteikti var īsagrīst paēst kaidā nu Ludzys omuleigūs kopejneicu i atsapyust pi Ludzys azara. Kai ari pavysam natuoli atsarūn neogotikys stylā caltuo Felicianovys muiža.”

Tiļteņš puori Iļžys upei Cyblā. Kartenis autore: Edeite Husare/portals lakuga.lv

Padareit vuiceibu godu interesantu

Agnese Skangale soka, ka, kab veiksmeigai puorcīstu jaunū vuiceibu godu, vajag tu padareit interesantu i troku, bet ar mozu i eipašu ūdzeņu, tod ari pošys vuiceibys byus lobys.

Kai tū padareit? Variantu ir daudz i dažaidi. Pīmāram:
• sātys dorbus piļdi kūpā ar sovim draugim kaidā kopejneicā voi bibliotekā;
• storpbreižūs skaiti kaidu gruomotu voi klausīs muzyku austeņuos;
• stuņdēs “padzeņ” kaidus jūkus/anekdotus;
• pīsasoki kaidā školys/pogosta voi piļsātys puļceņā – deju kolektivs, sporta puļceņš, folklorys kūpa voi tū, kū tev pīduovoj tova vuiceibu vīta;
• veidoj šmukus pīrokstus stuņdēs, tai tev pasaruodeis motivaceja vuoceitīs labi i nūkuortuosi eksamenus;
• golvonais ir sajimt drūsmi nu reita pīsaceļt i naaizmierst ryupētīs par sevi!
Kai soka:”Dzeivoj šmuki, lai navarātu aizmierst!”

Print Friendly, PDF & Email

Nūtikšonu kalendars

Nov
26
Sai
13:30 Ligijis Purinašys dzejis kruojum... @ Nacionalais Botaniskais duorzs
Ligijis Purinašys dzejis kruojum... @ Nacionalais Botaniskais duorzs
Nov 26 @ 13:30 – 15:00
Ligijis Purinašys dzejis kruojuma "pierobežas" eksotiskī skaitejumi @ Nacionalais Botaniskais duorzs
Registraceja daleibai pasuokumā ITE
16:00 Sandrys Martys Grudulis autorvokors @ Andreja Upīša memorialais muzejs
Sandrys Martys Grudulis autorvokors @ Andreja Upīša memorialais muzejs
Nov 26 @ 16:00 – 18:00
26. novembrī 16.00 stuņdēs Andreja Upīša memorialajā muzejā Reigā (Breiveibys īlā 38–4) nūtiks Sandrys Martys Grudulis autorvokors. Tys aizsuoks jaunu pasuokumu cyklu muzejā – “Ceļā uz pirmo grāmatu”.   Sandra Marta Grudule izauguse Teiču pūrā,[...]
17:00 “Zīpis” @ Lūznovys muižys škiuņs
“Zīpis” @ Lūznovys muižys škiuņs
Nov 26 @ 17:00 – 19:30
"Zīpis" @ Lūznovys muižys škiuņs