Rokstu sagataveja: portals lakuga.lv

3. septembrī 14.00 stuņdēs Stāmerīnys pilī atkluos diveju Latgolys muokslineicu – tekstilmuokslineicys Annelis Slišānis i keramikis Kristīnis Nicmanis (“Jašas podi”) – izstuodi “Sasatikšona”. Tamā varēs na tik satikt muokslineicys i apsavērt izstuodi, bet ari sasadzīduot ar Arni Slobožaninu i dzert piparmātru čaju ar madu nu “Jašas podu” kruškom.

Izstuodē byus apsaveramys Annelis Slišānis austī deči, kai ari Kristīnis Nicmanis veiduotī keramikys trauki. Kai stuosta Kristīne, izstuode byus sadaleita treis daļuos. Pyrmuo – kūšums, kurā kai dečūs, tai traukūs spielejās zylī, zalī i dzaltonī tūni. Ūtruo – dobys tūni nu bolta da smiļšu i metaliskuo. Sovpus trešuo daļa ir kai ceļuojums materialu pasaulī, kur savīnuots naīdūmojamais – fotofiļmeņu lentys, bārnu mantenis i tt.

Annele soka, ka itei jom ar Kristīni ar sasatikšona kai materialā, tai dzeivē. Sasateik deči ar pūdim, tekstils ar muolu, i pyrmūreiz ari pošys muokslineicys. “Idejiski, pruotūs i dvēselē sasatikšona beja nūtykuse jau seņuok, tādīņ kluotīnē. I ir šmuki – deči i pūdi ir cīši sadereigi, kai jau seņ byutu ituo gaidejuši,” tai Annele. Jei ari dasoka, ka Stāmerīnys piļs ir breineiga vīta sasatikšonai: “Šmuki, muzykali i nūslāpumaini, i ceļš iz tīni kotru reizi aizvad pa cytu vītu.”