Tūp serials latgaliski – komedeja ar kriminalim elementim (+FOTO)

Tūp serials latgaliski – komedeja ar kriminalim elementim (+FOTO)

Rokstu sagataveja: portals lakuga.lv

Vēļ februara suokumā portals lakuga.lv viesteja, ka ir aizsuokts dorbs pi pyrmuo televizejis seriala latgaliski tapšonys. Niu Daugovpilī nūteik seriala fiļmiešona i portalam beja vareiba īsavērt seriala taiseišonys ūtruos dīnys dorbūs.

Īspiejams, ka Daugovpiļs 6. pamatškola pyrmū reizi sovā pastuoviešonys laikā vēļ pyrma 1. septembra pīdzeivoj tik lelu rūseibu. Desmitim cylvāku mierktīceigi puorsavītoj, īkuortoj i papyldynoj vidi, analizej uzjimtūs kadrus i plānoj jaunus. Nūteik pyrmuo latgalīšu seriala fiļmiešona.

Seriala idejis autors ir muzikis i sabīdryskais aktivists Arņs Slobožanins, kurs pats izsver, ka byuteibā idejis autori ir treis cylvāki – jis pats, mecenats i seriala golvonais atbaļsteituojs Pīters Ragaušs i niulejais seriala režisors Vadims Bogdanovs. Idejis aizmetni meklejami vēļ pārnejuo gods novembrī, kod Pīters Ragaušs izsacejs dūmu, ka latgaliski vajadzātu izveiduot kū na viņ foršu i myusdīneigu. Tys sakryta ar laiku, kod Arņs sovā dzymtajā Kuorsovā izzynuoja par kontrabandys cigarešu škandalu. Koč ari rodūšuo komanda ideju ir puortaisejuse, stuosts arviņ ir baļsteits iz suokūtnejū verseju. Par tū portals lakuga.lv raksteja jau februarī: “Div puiši atvede nu Krīvejis kontrabandys cigarešu kravu, piec tam dūmuoja, kur juos puordūt. Dabuoja kontaktus, tok jūs apmuoneja, cigaretis nūzoga. Tod jī nūlaupeja tū savedieju, kurs beja sarunuojs kontaktus, jū pamūceja, pīdzirdēja i pasyta. Tai jī sarunuoja, ka atdūs naudu par cigaretem, sarunuoja sasatikšonu, bet pa tū laiku jau tys savediejs beja vysu pastuostejs policejai, i puišus arestēja. Piec tam gon tyka nūslāgts mīrizleigums, bet kur palyka cigaretis, nivīns nazyna.”

Karteņā: seriala “Fati” fiļmiešona, foto Amanda Anusāne/portals lakuga.lv

Kai stuosta Arņs, suokūtneji itū ideju beja plānuots eistynuot na tik vierīneigi, vaira iztikt ar vītejim resursim, tok režisors Vadims Bogdanovs tam napīkrits i sacejs, ka vajag, kab byutu kruta. “Mums lobu laiku beja gryuteibys pīsaisteit finaņsejumu, roduos vysaidi škieršli. Vystik jau beja izveiduots i plotuok palaists seriala treilers. Tai kaidu breidi es sēdēju i dūmuoju, ka ruodīs – vys tik nikas nasaīs. Tod pieški maņ pīzvaneja nu Latvejis Televizejis i saceja, ka jī ir gotovi īsasaisteit i dūt finaņsejumu. Tys otkon beja kai dzinuļs, kab suoktu dareit i meklēt vēļ finansejumu. Piečuok es vēļ uzrunuoju televizejis pakalpuojumu snīdzieju TET, kuri ari beja gotovi īsasaisteit,” tai Arņs Slobožanins.

Koč ari seriala ideja īt nu Kuorsovys, kas tyvyok Zīmeļlatgolai, seriala fiļmiešonai obligati beja juonūteik Dīnavydlatgolā, papyldynoj Arņs.

“Maņ personeigi redzīs, ka Dīnavydlatgola ir napeļneiti atdaleita nu Latgolys kulturys. Es zynu, ka ari Dīnavydlatgolā ir daudz latgalīšu, tok jī ir varbyut drupeit snaudūši, na tik stypri pamanomi plotuokai auditorejai.”

Scenareja tekstu autore Ieva Pastare da šam ir rakstejuse scenarejus teatra izruodem, tok raksteit tekstu serialam ir pavysam kas cyts. “Pi scenareja nūpītnai struoduoju treis mienešu, ari niu, fiļmiešonys laikā, šū tū palobojam,” tai Ieva. Sovpus idejis autors Arņs Slobožanins pībylst, ka jis Ievu skaita par ituo projekta mamu i mediatoru storp jū pošu i režisoru Vadimu: “Jei ir tys cylvāks, kurs var myusu korstuos sirds drupeit nūmīrynuot.”

Arņs Slobožanins: “Sevkura seriala fiļmiešonys laikā vysod jau ir taida drupeit reiviešonuos producenta i režisora vydā, i maņ ar Vadimu tei ir izteikta, tok jam tai dag acs, ka mes vīns ūtram vysu varim pīdūd, partū ka obim itei dzela cīši iņteresej.”

Ieva Pastare: “Ir labi, ka nūteik diskusejis, pa munam švakuok byutu, ka vysi vīns ūtram pīkrystu.”

Karteņa: seriala “Fati” fiļmiešona, foto Amanda Anusāne/portals lakuga.lv

Īspiejams, gona daudzim seriala nūsaukums ruodeisīs nasaprūtams, tok, kai īsmej Arņs i Ieva: “Voi nu tys tiks par jaunu, plotai atpazeistamu vuordu i byus seriala vizitkarte, voi mes poši byusim fati.” Scenareja autore Ieva paskaidroj, ka pyrmū reizi ar itū vuordu sasastopuse Ingys Ābelis romanā “Klūgu mūks” i vuorda skaidruojums varātu byut – cylvāki, kas ir jauni, glupi i naivi.

Vīns nu golvonūs akteru Ritvars Gailums stuosta: “Leluokais izaicynuojums ir tys, ka vyss nūteik latgaliski. Gribīs uztaiseit cīši labi i kvalitativi. Es ari asu fiļmējīs vairuokuos cytuos kinuos i varu saceit, ka ituo seriala komanda ir profesionala i ar lelu pīredzi. Maņ redzīs, ka vysa komanda sasastruoduoja jau ar pyrmū epizodi, ar kadra pyrmū sekuņdi.”

Seriala golvanuo aktrise Zanda Mankopa pībiļst: Kasdīnā es narunoju latgaliski, deļtuo maņ itys process ir gona sarežgeits, tok pa munam ir cīši forši īsavuiceit kū jaunu, i es skaitu, ka maņ dzeivē tys tikai paleidzēs, tam vysam kluot – maņ apleik ir supereigi kolegi.”

Sovpus režisors Vadims Bogdanovs stuosta, ka suokuma sagataveišonys stadejā beja baiss, voi vyss izadūs, tok niu baiļu vaira nav:

“Tagad mes cīši labi saprūtam, kai vyss juodora, ir styngra puorlīceiba, ka serials saīs lobs.”

Nūslādzūt myusu sarunu, Arņs izsoka cereibu, ka skateituoji byus īiņteresāti: “Vysmoz Daugovpilī lokalā mārūgā tys ir radejs lelu iņteresi. Pyrmizruode varātu byut novembrī, vaļsts svātku nedeļā, turim nūceju, ka vysi latgalīši i na tikai pīplaks pi televizoru ekranim i, vysa pyrma, aizdūs vaicuojumu, kas, pi valna, ir “Fati”?”

Seriala “FATI” pamatfakti:

  • Producents: Arņs Slobožanins (Latgolys Producentu Grupa)
  • Režisors: Vadims Bogdanovs
  • Idejis autori: Arņs Slobožanins, Pīters Ragaušs, Vadims Bogdanovs
  • Tekstu autore: Ieva Pastare
  • Muzyka: Apvīneiba “Ausmeņa Records”, skaņu celeni Armands Treilihs, Arņs Slobožanins
  • Montaža: Armands Treilihs
  • Golvonajuos lūmuos: Ritvars Gailums, Māris Korsiets, Zanda Mankopa
  • Izdūts: 2022. godā, 4 serejis kotra 20–25 minutu garumā.

Foto autore: Amanda Anusāne, portals lakuga.lv

Print Friendly, PDF & Email

Kalenders

Feb
22
Cat
10:00 Seminars “Konfesionālās attiecīb... @ Latvejis Universitatis Latvejis viesturis instituts
Seminars “Konfesionālās attiecīb... @ Latvejis Universitatis Latvejis viesturis instituts
Feb 22 @ 10:00 – 12:00
22. februarī 10.00 stuņdēs kluotīnē, Kalpaka bulvarī 4, 108. telpā nūtiks seminars LU Latvejis viesturis instituta akademiskuo omota pretendentim. Tymā tiks snāgts ziņuojums par īprīšk sagataveitu temu.   Seminara programa: 1. Tatjana Bogdanoviča. “Konfesionālās attiecības[...]