Rotko centrā izskanēs kamermuzykys koncerts “Latgales ainavas”
Rokstu sagataveja: portals lakuga.lv
Pīktdiņ, 9. septembrī, 18.00 stuņdēs Daugovpiļs Marka Rotko muokslys centrā izskanēs kamermuzykys koncerts “Latgales ainavas”, informej centra puorstuovi.
Koncerts “Latgales ainavas” veļteits Latgolā dzymušu, kai ari ar tuos kulturu saisteitu komponistu dorbim. Koncertā byus klausama kamermuzyka flautai, vejūlei i klavīrem, kū atskaņuos jaunekleigais akademiskuos muzykys trio “Tea For Three”.
Trio sastuovā muzicej flautiste Dārta Stašāne, vejūļnīks Ingus Grīnbergs i pianiste Inta Klimoviča.
Koncerta programā Juoņa Ivanova, Romualda Jermaka, Jēkaba Graubiņa, Arvīda Žilinska, Renātis Stivrinis i Riharda Dubrys kamermuzykys dorbi, kai ari Renāta Cvečkovska veļtejums trio, kas koncertā pīdzeivuos pasauļa pyrmatskaņuojumu.
Jaunais komponists Renāts Cvečkovskis par sovu skaņdorbu “Miera skūpsts” stuosta: “Dorbs roduos, īsaspaidojūt nu personeigu puordzeivuojumu i sovys dzeivis nūtikšonu. Koncertā tys tiks izkluosteits konkretuok. Ari itymā dorbā, kai jau vairuokūs cytūs munūs dorbūs, ir gareiguma tema, partū muzyka puorsvorā ir mīra pylna.”
Paradzāts, ka itys koncerts 4. decembrī skanēs ari Lūznovys muižā.
