Rokstu sagataveja: portals lakuga.lv

Šudiņ, 8. septembrī, grupa “Bez PVN” prezentej jaunu dzīsmi – “33”, kas ir veļtejums vysim tim, kas nu myusu dzeivu nūīt cīši agri. Leidza ar jaunū dzīsmi grupa aizsuoc jaunu tradiceju – iz prīšku pa jaunai dzīsmei tikšūt prezentāts kotra mieneša 8. datumā.

Jaunuos dzīsmis “33” muzykys i vuordu autors i grupys “Bez PVN” dalinīks Kristaps Rasims, īroksts taiseits studejuos “Hodila Records” pi Girta Laumaņa i studejā “Reiga”, bet dzīsmis miksa i mastera apstruodis taisejs Armands Treilihs.

Latgalīšu muzykys grupys “Bez PVN” aizsuocieji, bruoli Rasimi, stuosta: “Mums, Kristapam i Guntim, beja 7 i 9 godi, kod puoragri myužeibā nūguoja mamys bruoļs, myusu krysttāvs Andris – myusu bierneibys supervarūņs. Taišni juo vacuos i jau nūputejušuos gitarys piec kaida laika mes atrodom ustobys augšā. Tai i aizasuoce vyss myusu muzykys stuosts. Krysttāvs Andris nūguoja tī augšā, nu gaisma piec jo palyka.”

Dzīsmei “33” grupys YouTube kanalā daīmams ari dzīsmis vuordu video, pi kura vizualuos idejis i eistynuošonys struoduojuse Viola Lapa.

Atguodynuojumam – grupā “Bez PVN” dorbojās: Kristaps Rasims (bolss, elektriskuo gitara), Guntis Rasims (bolss, akustiskuo gitara), Juris Vucāns (bolss, elektriskuo gitara, tausteni), Valdis Vucāns (basa gitara) i Normans Bārbals (bungys).