Bolvūs nūtiks Nikodema Rancāna bolvys Latgolys izcyluokajim pedagogim padūšona

Bolvūs nūtiks Nikodema Rancāna bolvys Latgolys izcyluokajim pedagogim padūšona

Rokstu sagataveja: portals lakuga.lv

Svātdiņ, 25. septembrī, Bolvu Kulturys i atpyutys centrā, īsuocūt Školuotuoju dīnys sviniešonu i gūdynojūt vīnu nu izcyluokūs školuotuoju Nikodemu Rancānu, nūtiks Nikodema Rancāna bolvys Latgolys izcyluokajim pedagogim padūšonys ceremoneja. Itūgod bolvai dasaceiti 14 pretendenti nu Rēzeknis vaļstpiļsātys i Rēzeknis nūvoda, Bolvu nūvoda, Kruoslovys nūvoda i Daugovpiļs vaļstspiļsātys, informej bolvys reikuotuoju puorstuove Ilga Šuplinska.

N. Rancāna bolvai ir dasaceiti 14 pretendenti nu pīcu Latgolys pošvaļdeibu. Juosoka, pretendenti puorstuov divys pamata nominacejis: par īguļdejumu un sasnāgumim latgalīšu volūdys, kulturviesturis un nūvoda vuiceibys īvīsšonā un īdzeivynuošonā školā i par radūšu i psihologiski atbolstūšu pīeju muoceibu ci studeju vidē. Nasaverūt iz tū, ka ūtrymā nominacejā tyka aicynuots dasaceit izgleiteibys īstuožu vadeituojus, tymā ir daudz radūšu i sirdsgudru pedagogu, kas struodoj bārnim par prīcu, sova aicynuojuma vadeiti. Tymā pošā laikā divuos nominacejuos nav pīteikti školuotuoji, taidā veidā paruodūt, ka pyrmsškolā i augstuokajā izgleiteibā latgalīšu volūdys, literaturys i kulturviesturis vaicuojumi prosa spieceiguoku viereibu i finansējumu.

Nūslāguma pasuokums nūtiks 25. septembrī 14.00 stuņdēs Bolvu Kulturys i atpyutys centrā. Iz pasuokumu gaideiti kai pretendentu izvierzietuoji, tai jūs atbaļteituoji, poši konkursa daleibnīki, kai ari īprīškejūs godu nominanti i sadarbeibys partneri. Bolvenīšim tei ir loba īspieja pīsadaleit pasuokumā i paruodeit sovys kulturys bogoteibys. Nominantu sveikšonu kuplynuos muzykali puorsteigumi nu folklorys kūpys “Egle” (Rekava, vad. I. Sokirka), Bolvu muzykys školys vokalais ansambļs i solisti, D. Lāpāns (Bolvi) i Kate i Domeniks Slišāni (Upīte).

Kluotasūšī varēs pīsadaleit literaruos sarunuos ar Anneli Slišāni i Skaidrīti Svikšu. Juopībiļst, ka gruomotu autoris ir ari školuotuojis i ir pīkrytušys, ka jūs gruomotys duovynuos konkursa daleibnīkim. Naizpaliks ari sirsneigys sarunys i otkon redziešonuos prīca pi čaja.

Pasuokumu varēs vērtīs ari tīšraidē, Bolvu nūvoda pošvaļdeibys YouTube kanalā.

Konkursu organizej Latgalīšu kulturys bīdreiba sadarbeibā ar Latgolys Planavuošonys regionu i Bolvu nūvoda pošvaļdeibu. Konkurss ļaun izceļt i gūdynuot lobuokūs nūzaris pedagogus, ceļūt školuotuoja profesejis prestižu sabīdreibā i atguodynojūt, cik svareiga lūma puormaiņu procesā ir izgleiteibai.

Nikodema Rancāna konkursa daleibnīki (2022):

Bolvu nūvods

  • Gunta Blauma, Bolvu suokumškola
  • Ligita Spridzāne, Baļtinovys vydsškola
  • Natālija Garā, Ruguoju vydsškola
  • Daina Pužule, Rekavys vydsškola

Daugovpiļs

  • Juris Ozols, Latgolys industrialais tehnikums (da 01.09.2022 Daugovpiļs Byuvnīceibys tehnikums)

Kruoslovys nūvods

  • Marija Mickeviča, Varavīksnes vydsškola
  • Jānis Tukāns, Kruoslovys gimnazeja
  • Anita Tukāne, Kruoslovys gimnazeja

Rēzekne

  • Sandra Juste, Rēzeknis suokumškola
  • Aivars Vilkaste, Austrumlatvejis Tehnologeju vydsškola

Rēzeknis nūvods

  • Anita Ludborža, Nautrānu vydsškola
  • Inta Nagla, Nautrānu vydsškola
  • Anna Sondore, Dekšāru pamatskola
  • Inga Stafecka, Viļānu vydsškola

Konkursu finansiali atbolsta Latgolys Planavuošonys regions, Bolvu nūvoda pošvaļdeiba, z/s “Kotiņi”, Latgolys Etnografiskuo viestnīceiba, informativi – “Vietējā Latgales Avīze”, Latgalīšu kulturys ziņu portals lakuga.lv, Latvejis Radio Latgolys studeja.

Kalenders

Jul
15
Ūtr
19:00 Leivuona piļsātys svātki @ Leivuons
Leivuona piļsātys svātki @ Leivuons
Jul 15 @ 19:00 – Jul 19 @ 23:45
Ar pylnu svātku programu var īpasazeit ITE.
Jul
17
Cat
19:00 Izruode “Mazpiļsāta” @ "Ulbrokas pērle"
Izruode “Mazpiļsāta” @ "Ulbrokas pērle"
Jul 17 @ 19:00 – 21:00
“Pannas Teātris” skateituojim pīduovoj izruodi – slovonuokuos myusu dīnu Latgolys lugu autoris Danskovītis jaunuokū komedeju. Izruodis režisors Juris Rijnieks liks akterim Zanei Daudziņai, Aldim Siliņam, Elīnai Vānei, Jānim Skanim voi Jurim Lisneram runuot ari latgaliski[...]
Jul
18
Pīk
all-day Vikys Ekstys izstuode “Bēres Slo... @ galereja "Alma"
Vikys Ekstys izstuode “Bēres Slo... @ galereja "Alma"
Jul 18 all-day
Galerejā “Alma” byus apsaverama Reigys Fotografejis bienalis “Next 2025” programā īkļautuo Vikys Ekstys personalizstuode “Bēres Slobodā”. Izstuodis kuratore ir Astrīda Riņke. Dokumentalū video par ituos izstuodis dorbu kopiešonys procesu analogajā foto laboratorejā taisejs Kristians Fukss. [...]