Folklorys studeja “Banga” jaunajā albumā izdzīd tolkā īšonys dažaideibu

Folklorys studeja “Banga” jaunajā albumā izdzīd tolkā īšonys dažaideibu

Rokstu sagataveja: portals lakuga.lv

Itamā nedeļā izguojs folklorys studejis “Banga”, kurei dorbojās Reigā, debejis albums “TALKA”, kurā 25 dzīsmēs atkluoj latvīšim labi pazeistamū tolkā īšonys tradiceju dažaiduos nūzeimēs i nūzeimi myusu dīnuos. Vaira nakai puse – 13 nu vysu albuma dzīšmu – skaņ latgaliski. Šudiņ i reitu “Banga” aicynoj iz albuma attaiseišonys koncertim Reigā, viestej folklorys studejis publicātuo informaceja.

Albums “TALKA” īraksteits vairuoku godu garumā, vuocūt latvīšu tradicionalū muzyku nu dažaidu nūvodu, kai ari pietejūt tradiceju nu praktiskuos pusis ar senejim i na tik senejim lauku dorbim i saīšonu kūpā. Albumā var dzierdēt vysu spektru nu burdona daudzbaļseibys da pīcbaļseigu melodeju, kai ari tū papyldynoj eipaši izlaseiti dzīšmu tekstu nu tolcuonu, saiminīku i cytu tolkys perspektivu. Tautysdzīšmu teksti atlaseiti, jemūt vārā dažaidū nūvodu izlūkšņu sovpateibys.

Dzīšmu vydā ir paruodeits vyss tolkys process – nu aicynuošonys, saīšonys kūpā, dorbu dareišonys, daņčim i atsavadeišonys. Apsavārtais tolku spektrys pamatā ir nu pavasara da rudiņa, koč ari folklorys kūpys dalinīki atzeist, ka dažaidys tolkys nūteik vysu godu. Albumā vydā ir 25 dzīsmis, bet 13 nu tūs skaņ latgaliski. Dzīšmu vydā var dzierdēt taidys dzīsmis kai “Atīs zūses klaiguodamas”, “Ai, gaļdeni”, “Vusu dīnu Jumi dzynu”, “Oruojs ora kaļneņā” i cytys.

Folklorys studeja “Banga” rodusēs 2016. goda pavasarī i tamā apsavīnuojuši, dzīd i spieļoj ar folkloru izauguši i leidzeigi dūmojūši jauni ļauds. “TALKA” ir studejis pyrmais albums, bet īprīšk “Banga” taisejuse koncertprogramys “Dibenā” i Latvejis ebreju muzykys programu “Džingale”. Šūbreid teikūt struoduots ari pi Latvejā popularu cytu tautu daņču diska taiseišonys.

Ideja par albuma īrokstu “Bangai” rodusēs 2018. goda vosorā i, struodojūt pi tuo īroksta, folklorys studejai bejs svareigi ari pošai izdzeivuot, kū nūzeimoj dažaidys tolkys i tūs nūtikšona, deļtuo ari poši taisejuši i pīsadalejuši dažaiduos tolkuos, raudzejuši izprast tūs sastuovdalis, apreikuojumu i procesu. “TALKA” īskandynuošonys koncerti nūtiks Reigā – 23. septembrī kūka sātu renovacejis centrā “Koka Rīga” i 24. septembrī kulturys i atpyutys centrā “Imanta”, īejis moksa koncertūs 5,00 €. Pošu albumu var nūsaklauseit i nūpierkt vairuokuos muzykys straumiešonys vītnēs. Folklorys studejis “Banga” albums “TALKA” īraksteits studejā “Lauska”, bet albuma izdūšona padareita ari tolkys veidā – nauda tuo izīšonai salaseita kolektivuos finansiešonys vītnē projektubanka.lv.

Kalenders

Jun
16
Pyr
17:00 Seminars “Mutvuordu viesturis ol... @ Kruoslovys nūvoda muzejs
Seminars “Mutvuordu viesturis ol... @ Kruoslovys nūvoda muzejs
Jun 16 @ 17:00
Seminars "Mutvuordu viesturis olūtu izmontuošona 20. godu symta viesturis pietnīceibā" @ Kruoslovys nūvoda muzejs
Viesturnīki, muzeju darbinīki, 16. junī 17.00 stuņdēs bibliotekari nūvodpietnīki i cyti interesenti aicynuoti iz seminaru “Mutvuordu viesturis olūtu izmontuošona 20. godu symta viesturis pietnīceibā” Kruoslovys nūvoda muzejā.
Jun
19
Cat
06:45 Pasuokums “FIZISKAIS RŪBEŽS: kul...
Pasuokums “FIZISKAIS RŪBEŽS: kul...
Jun 19 @ 06:45 – 18:45
Pasuokums "FIZISKAIS RŪBEŽS: kulturys nūzeime i pīejameiba Latvejis austrumu regionā"
Latgolys muokslys i kulturys platforma MUD LAB aicynoj iz storpdisciplinaru pasuokumu FIZISKAIS RŪBEŽS, kas nūtiks Leivuonā ituo gods 19. junī, daudzfunkcionaluo jaunīšu iniciativu centra “Kvartāls” futbola laukumā i Leivuon dzeļžaceļa stacejā. Pasuokums, kurā pīsadaleis kai[...]
18:00 Seminars “Viesturis olūtu komple... @ Kruoslovys nūvoda muzejs
Seminars “Viesturis olūtu komple... @ Kruoslovys nūvoda muzejs
Jun 19 @ 18:00
Seminars "Viesturis olūtu kompleksuo izpiete: mutvuordu viesturis olūti i fotografejis" @ Kruoslovys nūvoda muzejs
19. junī 18.00 stuņdēs Kruoslovys nūvoda muzejā nūtiks seminars “Viesturis olūtu kompleksuo izpiete: mutvuordu viesturis olūti i fotografejis”.
18:30 Izruode “Melnais piens/2024” @ Jaunais Reigys teatris
Izruode “Melnais piens/2024” @ Jaunais Reigys teatris
Jun 19 @ 18:30 – 20:15
Paguojuši 15 godi, kai JRT roduos izruode “Melnais piens”. Itei izruode paruoda, ka teatram nav obligati vysod juobyut baļsteitam iz destrukceju i konfliktim. Tys var byut ari par harmoneju i skaistumu, koč i skumeigu. Vizuali[...]