Latgolys izcyluokajim pedagogim padūtys Nikodema Rancāna bolvys

Latgolys izcyluokajim pedagogim padūtys Nikodema Rancāna bolvys

Rokstu sagataveja: portals lakuga.lv

Ir nūskaidruoti Nikodema Rancāna konkursa uzvarātuoji. Kai informej organizatoru puorstuove Ilga Šuplinska, bolvys sajāmuši Ligita Spridzāne (Baļtinovys vydsškola), Natālija Garā (Ruguoju vydsškola), Aivars Vilkaste (Austrumlatvejis Tehnologeju vydsškola), Marija Mickeviča (Kruoslovys Varaveiksnis vydsškola), Gunta Blauma (Bolvu suokumškola) i Sandra Juste (Rēzeknis suokumškola), sovpus specialuos bolvys sajiemieja ir Daina Pužule (Rekovys vydsškola).

Nūslāguma pasuokums nūtyka 25. septembrī Bolvūs, tymā pīsadaleja daleibnīki i jūs atbaļsteituoji nu Rēzeknis piļsātys i nūvoda, Bolvu, Kruoslovys nūvoda i Daugovpiļs. Sevkurs runuotuojs izcēle školuotuoja profesejis nūzeimeibu i prestižu, saceja pateiceibys vuordus školuotuoju saimei kūpumā, partū ka N. Rancāna konkursa nūslāgums īvoda ari Školuotuoju dīnys pasuokumus. Juopīzeist, ka ari školuotuoji, kas kūpejā pasauļa i Latvejis nūtykumu straumē jiutās saguruši, sovuos uzrunuos saglobuoja syltumu i pateiceibu bārnim, vacuokim, vītai i laikam, ka jī ir palykuši par školuotuojim i var dareit itū gryutū i pasauļa vierzīni ītekmejušū dorbu.

N. Rancāna bolvu – sudobra pokovsaktu (autors Rihards Ciblis) – nominacejā par īguļdejumu i sasnāgumim latgalīšu volūdys, kulturviesturis i nūvoda vuiceibys īvīsšonā i īdzeivynuošonā školā sajēme Ligita Spridzāne (Baļtinovys vydsškola) i Natālija Garā (Ruguoju vydsškola), atzineibys – Inga Stafecka (Viļānu vydsškola), Inta Nagla (Nautrānu vydsškola) i Daina Pužule (Rekovys vydsškola). Daina Pužule dabuoja ari Latgolys Etnografiskuos viestnīceibys specialū bolvu – etnogrāfiskuos drēbuos leli, kū ir darynuojuse Iveta Seimanova, aplīcynojūt, ka ari iz prīšku atbaļsteis konkursu izcyluokajim Latgolys školuotuojim.

Kai sovā uzrunā saceja I. Seimanova: “Itei ir 57. lele, kas iztaiseita vysaidim labdareibys projektim. Munys tautu meitys dzeivoj pa vysu pasauli – nu Rēzeknis da Reigys, nu Londonys da Adelaidys. Bet itei dzeivuos Rekavā pi školuotuojis, kas vuica bārnim ari tautu tārpa nosuošonys kulturu. Vuica, ka meitinem pi tautu tārpa juosapyn bizis, a puiši bez capuris navar kuopt iz skotuvis. Sylajuoņu Iļža, Madalis muosa, dzeivuos pi Dainys Pužulis.”

Iveta Seimanova, specialuos bolvys īdybynuotuoja, foto autors Māris Justs

Der atguodynuot, ka Latgolys kongresa 2022 laikā piec Nikodema Rancāna tāluojuma “Ceļuojums pa Latgolu” tyka atruodeita Madaļa i Jezups, i vēļ ap 40 “kongresmenem” latgalīšu etnografiskajuos drēbēs.

Nominacejā par radūšu i psihologiski atbolstūšu pīeju vuiceibu vidē tyka gūdynuoti izgleiteibys īstuožu vadeituoji: Aivars Vilkaste (ATV) i Marija Mickeviča (Kruoslovys Vareiksnis vydsškola). Taipoš sudroba pakovsakta tyka padūta Guntai Blaumai (Bolvu suokumškola) i Sandrai Justei (Rēzeknis suokumškola). Atzineibys itamā nominacejā sajēme ari Juoņs Tukāns (Kruoslovys gimnazeja), Anita Ludbuorža (Nautrānu vydsškola), Anita Tukāne (Kruoslovys gimnazeja), Juris Ozols (Latgolys Industrialais tehnikums) i Anna Sondore (Dekšāru pamatskola).

Sirsneiguo i pateiceibys vuordim boguotuo nūslāguma ceremoneja ir apsaverama sevkuram Bolvu pošvaļdeibys Youtube kontā:

Konkursu organizej Latgalīšu kulturys bīdreiba sadarbeibā ar Latgolys Planavuošonys regionu i Bolvu nūvoda pošvaļdeibu. Konkurss ļaun izceļt i gūdynuot lobuokūs nūzaris pedagogus, ceļūt školuotuoja profesejis prestižu sabīdreibā i atguodynojūt, cik svareiga lūma puormaiņu procesā ir izgleiteibai.

Print Friendly, PDF & Email

Kalenders

Mar
7
Cat
16:00 Valentina Lukaševiča gruomotys “... @ Latgolys Centraluo biblioteka
Valentina Lukaševiča gruomotys “... @ Latgolys Centraluo biblioteka
Mar 7 @ 16:00 – 17:30
7. martā 16.00 stuņdēs Daugovpilī, Latgolys Centralajā bibliotekā, 2. stuovā (Reigys īlā 22a) nūtiks Valentina Lukaševiča vītu stuostu kruojuma “Dīnvydlatgolys stuosti” prezentaceja i sasatikšona ar autoru. Gruomotys 39 stuostūs autors, ceļojūt na tik telpā, bet[...]