Rudinī īplānoj laiku sev i bārnim, kai ari nūej iz vieliešonom
Rokstu sagataveja: portals lakuga.lv
Rudiņs atīt na tik ar lobu ražu, no ari ar tymsu. Goda tymsajā laikā naaizmiersti īplānuot laiku sev i bārnim, kai ari 1. oktobrī obligati nūīt iz vieliešonom. Kulturys īsacejumūs itūreiz pasadola diveju bārnu mama i profesionala portretu fotografe Dace Blūma-Vinceviča.
Nūved rudiņa sajiutu iz sātu nu Latgolys piļu i muižu ar kaštanu kuldā
Šmukais i kruošņais rudiņs ir kluotyn, par tū tys ir breineigs laiks izbraucīņam dobā. Pa ceļam vari apmeklēt kaidu šmuku muižu – akcejā “Apceļuosim Latvejis piļs i muižys 2022”, kas nūteik vēļ da 30. septembra. Latgolā itamā akcejā pīsadola 8 muižys – Arendolis, Bolvu, Gaļānu, Kruoslovys, Lielbornes i Lūznovys muižys, Preiļu parka komplekss i parks, kai ari Vuorkovys muižys piļs. Kotrys var atrast sev tiuļuokū i skaistuokū. Itymā braucīnī pajem leidza bārnus, draugus voi vacuokus i kūpā salosit rudiņa lopys, kaštaņus i atvedit rudiņa sajiutu iz sātu.
Vaira par akceju izzynoj ITE.
Svietej Mikeļa dīnu Kruoslovys tiergā voi kūpā ar bārnim sareikoj tiergu sātā
Itūnedeļ ir ari Mikeļa dīna – latvīšu rudiņa saulgrīži i goda augleiguokuos dalis aizvadeišonys svātki. Var īspēt izbaudeit eistu sajiutu Mikeļa dīnys tiergā. 1. oktobrī taids nūtiks Kruoslovā, bet var ari ar bārnim sataiseit šmukys rudiņa kompozicejis, sareikuot pošim sovu tierdzeņu i tū nūsvinēt ar kuorteigu i boguoteigu mīlastu sātā.
Veļtej laiku sev, “Giut breidi” plānuotuojā pīrokstūt lītys, kas saguodoj prīcu, naaizmierstūt īpānuot ari īšonu iz vieliešom i varbyut pat fotoseseju
Suocās tymsuokais goda laiks, pamozom pasuokumu, syltuma i gaismys palīk arvin mozuok. Partū navajag aizmierst pasaryupēt par sevi – savuorej sylta čaja, pīroksti sarokstu ar lītom, kas tevi īprīcynoj i īplānoj tuos. Pajem sovu pānuotuoju (mums pošim Latgolā ir “Giut breidi” plānuotuojs) i izplānoj itam rudiņam skaistys nūtikšonys, koncertus, sasatikšonys ar draugim, pīdzeivuojumus i varbyut skaistu fotoseseju sev. Kai ari naaizmiersti vīnu svareigu lītu – aizīt iz Saeimys vieliešonom 1. oktobrī!
Jaunais “Giut breidi” plānuotuojs jau nu oktobra byus daīmams īprīškpuordūšonā, sekoj informacejai leidza ITE, asu pagūdynuota, ka 2023. goda plānuotuojā i maņ byus vareiba simboliski sasatikt ar jums tuo puslopuos. Nu varim i sasatikt kaidā skaistā fotosesejā ar mani jau niu, pīsasaceit var ITE.
