Juoņa Ivanova Rēzeknis muzykys vydsškola svieteis 90 godu jubileju

Juoņa Ivanova Rēzeknis muzykys vydsškola svieteis 90 godu jubileju

Rokstu sagataveja: portals lakuga.lv

Juoņa Ivanova Rēzeknis muzykys vydsškola (JIRMV) 2022. gods oktobrī svietej školys pastuoviešonys 90 godu jubileju. Kai informej školys puorstuovi, koncertūs Latgolys viestnīceibā GORS i muzykys vydsškolā, izalauzšonys spēlē, daņču vokorā i digitalajuos aktivitatēs tuos jaunīši i pedagogi aplīcynuos narymstūšu jaunradis goru i muzykys mīlesteibu, tok jubileja mieneša nūslāguma dīnā, 29. oktobrī, bejušī audziekni sasapuļcēs školys absolventu saliduojumā.

J. Ivanova Rēzeknis muzykys vydsškola ir škola ar boguotom tradicejom i viesturi, kas pīdzeivuojuse vysaiduokus laikus. Tei ir škola, kur muzykys pasauli īpazynušys vairuokys tyukstūšys bārnu, muziķa profeseju vuicejušīs vairuoki symti jaunīšu. Reita i vokora stuņdēs pa školys attaiseitajim lūgim skaņ klavīru, vargaņu, steigu, pyušamūs i sytaminstrumentu skanis, bārnu skaneigī bolsi, beidzamajūs godūs – ari tautys instrumentu melodejis i džeza ritmi. Jubileja reizē škola ir sagatavejuse daudzveideigu pasuokumu programu vysa oktobra mieneša garumā.

Jubileja svieteišona suoksīs ar kasgadejū Latgolys viestnīceibā GORS nūteikūšū storptautyskū vargaņu muzykys festivalu “ORGANismi”, kura muokslinīcyskuo vadeituoja ir pasaulī slovonuo varganiste, JIRMV absolvente Iveta Apkalna. Juos spēli varēs dzierdēt divejūs festivala koncertūs – 7. oktobra koncertizvadumā “Ķepas, ūsas un Minkāns”, kura muzykys autore ir školys absolvente Ilona Rupaine, bet dalinīki – JIRMV bārnu kors i Rēzeknis kamerorkestris, kai ari 8. oktobra koncertā “Iveta Apkalna, LNSO un VAK “Latvija”.

13. oktobrī J. Ivanova Rēzeknis muzykys vydsškolys lelajā zalē skanēs školys audziekņu sagataveits koncerts, kurā uzastuos bārnu muzykys školys, vydsškolys jaunī muziki i muziķu kolektivi. Sovpus 21. oktobra vokors byus JIRMV jaunīšu rūkuos. Cytu školu jaunīši i interesenti tiks aicynuoti pīsadaleit spēlē ”Izlaušanās no JIRMV”, kas ļaus īpazeit školu, tuos pedagogus, audziekņus i školys rodūšū atmosferu. 21. oktobra aktivitatis nūslēgs daņču vokors školys lelajā zalē.

Jubileja mieneša kulminaceja gaidoma sastdiņ, 29. oktobrī. 12.00 stuņdēs Rēzeknis Suopu Dīvmuotis bazneicā nūtiks školai veļteits dīvakolpuojums, kur Sv. Misi celebrēs školys absolvents veiskups Andris Kravalis. 16.00 stuņdēs Latgolys viestnīceibys GORS Lelajā zalē suoksīs JIRMV 90 godu jubileja nūslāguma koncerts. Tuo dalinīki byus spūdri Latvejā i pasaulī atzeiti muziki – varganistis Ilona Birgele i Diāna Jaunzeme-Portnaja, čelliste Ilze Grudule, kontrabasists Einārs Everss, soliste Ilze Grēvele-Skaraine, folkmuzike Biruta Ozoliņa, trombonists Lauris Amantovs i cyti. Koncertā pīsadaleis ari JIRMV jauktais kors, Rēzeknis kamerorkestris, Rēzeknis bigbends, folkmuzykys i džeza muzykys apvīneibys, kuru dalinīki ir JIRMV absolventi. 29. oktobra vokorā vysi školys bejušī audziekni byus gaideiti absolventu saliduojumā J. Ivanova Rēzeknis muzykys vydsškolā.

Oktobrī nūtiks ari vairuokys jubilejam veļteitys digitalys aktivitatis – komponista Juoņa Ivanova dzimšonys dīnā, 9.oktobrī, školys Facebook lopā suoksīs rodūšūs dorbu konkurss “Caur Ivanova brillēm”. Vysa oktobra mieneša garumā školys Facebook lopā tiks publicāti JIRMV vysaidu godu absolventu video atmiņu stuosti. Kotram interesentam, kurs gribēs puorbaudeit sovys zynuošonys, nu 12. oktobra školys sātyslopā byus vareiba pīsadaleit interaktivā viktorinā “JIRMV 90”.

Vaira informacejis par jubileja aktivitatem i pīsasaceišonu iz školys absolventu saliduojumu var atrast školys sātyslopā jirmv.lv. Beleti iz festivala “ORGANismi” i JIRMV 90 godu jubileja koncertim nūpierkami bilesuparadize.lv i latgalesgors.lv

Print Friendly, PDF & Email

Kalenders

May
22
Tre
22:05 Egita Kancāne. Syltuo mola. Rade... @ Latvejis Radio 1
Egita Kancāne. Syltuo mola. Rade... @ Latvejis Radio 1
May 22 @ 22:05 – 23:00
Egita Kancāne. Syltuo mola. Radejis skaitejumi @ Latvejis Radio 1
Turpynojūt latgalīšu myusu dīnu literaturys īmyužynuošonys i populariziešonys dorbu, nu 21. da 24. maja Latvejis Radejis 1 eterā pyrmū reizi skanēs latgalīšu prozys dorbu izlase – stuosti i esejis, kuru autori ir Annele Slišāne, Valentins[...]
May
23
Cat
22:05 Valentins Lukaševičs. Casnāgu ma... @ Latvejis Radio 1
Valentins Lukaševičs. Casnāgu ma... @ Latvejis Radio 1
May 23 @ 22:05 – 23:00
Valentins Lukaševičs. Casnāgu maizeitis. Radejis skaitejumi @ Latvejis Radio 1
Turpynojūt latgalīšu myusu dīnu literaturys īmyužynuošonys i populariziešonys dorbu, nu 21. da 24. maja Latvejis Radejis 1 eterā pyrmū reizi skanēs latgalīšu prozys dorbu izlase – stuosti i esejis, kuru autori ir Annele Slišāne, Valentins[...]
May
24
Pīk
22:05 Raibīs. Pyrma syltī. Zalta tesmi... @ Latvejis Radio 1
Raibīs. Pyrma syltī. Zalta tesmi... @ Latvejis Radio 1
May 24 @ 22:05 – 23:00
Raibīs. Pyrma syltī. Zalta tesmini. Radejis skaitejumi @ Latvejis Radio 1
Turpynojūt latgalīšu myusu dīnu literaturys īmyužynuošonys i populariziešonys dorbu, nu 21. da 24. maja Latvejis Radejis 1 eterā pyrmū reizi skanēs latgalīšu prozys dorbu izlase – stuosti i esejis, kuru autori ir Annele Slišāne, Valentins[...]