Rokstu sagataveja: portals lakuga.lv

7. oktobrī Latgolys Kulturviesturis muzejā puļciejuos interesenti, kab pīsadaleitu puorizdūtuo Antoninys Masiļūnis izdavuma “Povuoru gruomota” prezentacejā. Tei da ituo ir vīneiguo latgaliski izdūtuo povuorgruomota, kuruos pyrmais izdavums jau beja palics par bibliografisku ratumu.

Myusdīneigai redizainātuo izdavuma projekta eistynuotuojs ir Rēzeknis Tehnologeju akademeja (RTA), tuos sadarbeibys partneri: Latgolys Kulturviesturis muzejs, Latgolys industrialais tehnikums i Rēzeknis tehnikums. Svineigajā pasuokumā Rēzeknis Tehnologeju akademejis rektore profesore Iveta Mietule pastreipuoja: “Asam prīceigi, ka RTA Izgleiteibys, volūdu i dizaina fakultatē ir rodūši vuiceibspāki, kuri projektūs īsaista studentus, snādzūt vareibu dabuot pyrmū pīredzi”.

Daugovpilīte Valentīna Siņakova ir RTA absolvente, kura sovā magistra dorbā ir izstruoduojuse jaunu pyrmuos latgalīšu volūdā izdūtuos povuorgruomotys grafikys dizainu. Kab gruomota atbylstu latgalīšu rokstu volūdys pareizraksteibys normom, pīsaisteitys volūdys konsultantis Maruta Latkovska i Lideja Leikuma. Gruomotā asūšūs fotografeju autore ir Zaiga Pettere. Izgleitojūšūs materialu veiduošonā, publiciešonā, populariziešonā tyka īsaisteiti Latgolys Kulturviesturis muzeja specialisti, Rēzeknis Tehnologeju akademejis studenti i docātuoji-pietnīki, Latgolys industrialuo tehnikuma i Rēzeknis tehnikuma audziekni i vuiceibspāki, kai ari cyti interesenti.

V. Siņakovys magistra dorba vadeituoja, projekta autore docente Diāna Apele nūruoda: “Gruomota ir pīdzeivuojuse ūtrū elpu, asam raudzejuši veiduot uzskotamys iedīņu fotografejis, pylnveiduojuši volūdu. Ceram, ka skaiteituojam byus pateikamai redzēt jaunū gruomotys veidūlu, kai ari nūdereigys byus pošys receptis. Gruomotys izdūšona ir lela Latgolys kulturys nūtikšona. Paļdis kotram, kurs ar sovu dorbu veicynuoja ituos gruomotys izīšonu.”

Izdavums sagataveits ar Rēzeknis Tehnologeju akademejis Izgleiteibys, volūdu i dizaina fakultatis i Regionalistikys zynuotniskuo instituta finansialū atbolstu. Projekts realizāts ar Rēzeknis piļsātys pošvaļdeibys agenturys „Rēzeknes Kultūras un Tūrisma centrs” leidzfinansiejumu Mozūs kulturys i turisma projektu konkursā.

Galerejā: “Povuoru gruomotys” prezentaceja Latgolys Kulturviesturis muzejā. Karteņu autore: Amanda Anusāne/portals lakuga.lv