Lūznovys muižys literarūs sarunu cyklā varēs sasatikt ar Anneli Slišāni

Lūznovys muižys literarūs sarunu cyklā varēs sasatikt ar Anneli Slišāni

Rokstu sagataveja: portals lakuga.lv

Lūznovys muižā 16. oktobrī 17.00 stuņdēs nūtiks sarunu cykla “Literārās sarunas Lūznavas muižā” ituo gods rudiņa sezonys pyrmuo sasatikšona, kurys laikā byus vareiba īpazeit tekstilmuokslineicu i literati Anneli Slišāni. Sarunā pīsadaleit varēs kai kluotīnē muižā, tai i tīšraidē muižys sātys lopā.

Sarunu cyklys “Literārās sarunas Lūznavas muižā” aizasuoka 2017. goda rudinī. Itymā laikā sasatikšonys nūtykušys ar vaira nakai desmit vysaidus žanrus puorstuovūšim literatim, ļaunūt laseituojim kluotīnē sasatikt ar sovu īcīneitūs literarūs dorbu autorim i reizē ari boguotynojūt pasuokumu dažaideibu Latgolys regionā.

Tekstilmuokslineica i literāte Annele Slišāne pi plašuokys atpazeistameibys tyka ar sovu muokslys i literaturys projektu “#100dečiLatvijai” i nu tuo laika ir pīruodejuse sevi kai spūdru, idejom boguotu tekstilmuokslineicu i spieceigu myusu dīnu latgalīšu literaturys dorbu autori. Annele div reizis piec kuortys bejuse Latgolys prozys skaitejumu uzvarātuoja. Kai par projektu “#100dečiLatvijai”, tai ari par stuostu kruojumu “tuoraga stuosti” Annele ir sajāmuse Latgalīšu kulturys goda bolvu “Boņuks”.

Sarunā ar tekstilmuokslineicu i literati klauseituoji aicynuoti pīsadaleit kai kluotīnē, tai ari pīsaslādzūt tīšraidē. Literarūs sarunu vierzeituoja ari itūreiz byus literaturzynuotneica Ilga Šuplinska.

Kai stuosta vīna nu pasuokuma organizatoru Inga Žirgule, literaruos sarunys ir vareiba sasnēgt pavysam cytu mierkauditoreju. “Cylvāki atpazeist i gaida itūs pasuokumus, mums ir sovi pastuoveigī apmaklātuoji, tok vysod ir kaids vīns klusais apmaklātuojs, kurs īsarūn pyrmū reizi i viereigi sekoj vysam leidza. Tys nav masveida pasuokums, tok kotru reizi sasalosa ap 30 cylvāku,” tai Inga Žirgule. Jei ari dasoka, ka pasuokuma mierkauditoreju ir izadevs paplašynuot ar tīšraižu paleidzeibu, kuru laikā pasuokumam pīsaslādz Čikagys latvīšu literaruo kūpa i Minsteris laseituoju kūpa “Minsteres grāmatmīļi”.

“Itūšaļt asam ari īsnāguši jaunu projektu Kulturkapitala fondam i tai kai itūreiz vīns nu fonda mierku ir atbaļsteit taišni vysaida veida literaruos sarunys, ceram, ka cytugod myusu pasuokumu cyklys turpynuosīs ar četru jaunu autoru gasteišonu Lūznovys muižā,” stuosta Inga Žirgule.

Pyrma sasatikšonys ar Anneli Slišāni 16.00 stuņdēs interesentim byus vareiba izzynuot vaira par latgalīšu volūdu i pīsadaleit kluotīnis diktata latgalīšu rokstu volūdā raksteišonā, iz kuru aicynoj bīdreiba “LgSC”, latgalīšu kulturys ziņu portals lakuga.lv i Latvejis Radejis Latgolys studeja.

2022. goda sarunu cykla nūslāguma sasatikšona plānuota 6. novembrī ar rakstneicu Gundegu Repši.

Print Friendly, PDF & Email

Kalenders

May
18
Sai
10:00 Muzeju nakts @ Maltys viesturis muzejs
Muzeju nakts @ Maltys viesturis muzejs
May 18 @ 10:00 – 21:00
Muzeju nakts “Izzinot latgaliskās rotas, tērpus un stāstus”10.00 Pietnīcysks (izzynojūšs) ceļuojums pa Maltys apleicīnis piļskolnim ar viesturis aktivistu i konstruktoru bīdreibu “Kroma kolna bruoliste”.16.00-18.00 Darbneica “Seno latgaļu rotu rakstu noslēpumi” (7.-13. g. s.), kurū vadeis[...]