Rokstu sagataveja: portals lakuga.lv

Pavasarī grupa “Rupuči”, kurā apsavīnuojuši muzikis, pasuokumu vadeituojs i akters Kristaps Rasims kūpā ar sovim bārnim Ernestu i Terēzi, publicēja treis videoklipus dzīsmem nu albuma “Vuškeņa iz pļovys” i atkluoja sovu YouTube kanalu. Niu grupa rodūšū darbeibu turpynoj, īmyužynojūt video formatā ari cytys albuma dzīsmis i niu pīduovoj nūsavērt videoklipu dzīsmei “Okeans”.

Dzīsme “Okeans” taipat kai vysys treis pavasarī video versejuos publicātuos dzīsmis “Div mozi eži”, “Četri bārni” i “Vīna poša” ir nu digitaluo albuma bārnim “Vuškeņa iz pļovys”. Albuma rasšonuos īdviesme ir bīdreibys “LgSC” pārnejuo gods golā izdūtuo literatis Ilzis Spergys i muokslineicys Līgys Romančukys dzejūļu gruomota bārnim ar taidu pošu nūsaukumu “Vuškeņa iz pļovys”. Albuma “Vuškeņa iz pļovys” dzīšmu muzykys autors ir Kristaps Rasims, bet tuos īdzīduojuse grupa “Rupuči”, kurā apsavīnuojuši Kristaps, Ernests i Terēze Rasimi, kai ari Luocs Numeža. Albums īraksteits studejā “Reiga”, īrokstā tolkā guojuši ari muziki Zane Dziesma, Deniss Smirnovs i Mārcis Lipskis, bet albumu masteriejs Krišjānis Geidāns. Albums “Vuškeņa iz pļovys” bārnim da ituo beja daīmams nūsaklauseišonai tekstu video formatā YouTube, kai ari kai audio cytūs popularuokajūs muzykys straumiešonys servisūs. Kotram grybātuojam YouTube ir daīmami diveji dzīšmu varianti – dzīduošonai leidza ar grupu “Rupuči” voi pošim viņ ar muzykys pavadejumu.

Pavasarī leidz ar pyrmajim publicātajim videoklipim grupa “Rupuči” aizsuoce ari sovu videokanalu, kurā iz prīšku plānuots publicēt bārnu i saimu auditorejai paradzātu saturu latgaliski – dzīsmis, stuostus i cytys padareišonys. Grupys dalinīks Kristaps Rasims par videoklipu taiseišonu albuma “Vuškeņa iz pļovys” dzīsmem stuosta, ka asūt saprats, ka ļauds vysvaira zyna tuos albuma dzīsmis, kurom “Rupuči” pavasarī beja sataisejuši video operatora Ivara Utināna fiļmātūs videoklipus, nu tai kai albumā dzīšmu ir vaira, tod izlamts videoversejis radeit ari puorejom dzīsmem. Plānuots, ka jaunī videoklipi, kurī itūreiz tūp pošu spākim, tiks publicāti kotru svātdīni.

Atguodynuojumam – dzejūļu gruomota i muzykys albums bārnim “Vuškeņa iz pļovys” ir vīns nu Latgalīšu kulturys goda bolvys “Boņuks 2021” sajiemieju.