Rokstu sagataveja: portals lakuga.lv

Nautrānu pogosta Rogovkys cīmā niu gostus i vītejūs dzeivuotuojus sveicynoj laternu stobu baneri, kuri nūruoda pīdereibu Rēzeknis nūvodam, Nautrānu pogostam i raksturoj Rogovku ar slovonū teicīni – “Troks voi nu Rogovkys”, viestej pogosta kulturys pasuokumu organizatore Inga Vigule.

Baneri sataiseiti ar Rēzeknis nūvoda Kulturys nūdalis Latgaliskuos identitatis konkursa finansialu atbolstu, i projektu realizēja Nautrānu pogosta puorvaļde. Tī ir treis veidu – “Vasals Rēzeknis nūvodā”, “Vasals Nautrānu pogostā” i “Troks voi nu Rogovkys”. Iz baneru ir attāluoti Rēzeknis nūvoda i Nautrānu pogosta logo. Iz banera “Troks voi nu Rogovkys” ir radzamys rogovys – Rogovkys simbols. Teksti iz baneru ir latgalīšu volūdā. Tī tyka izmontuoti ari pyrmuo dzejis slama latgaliski “Rogovkys dzejis voga” skotuvis nūformiejumam.

Baneru dizaina autore ir Elvita Kotāne, kura banerūs apvīnuoja Rēzeknis nūvoda identitati, jaunizveiduotū Nautrānu pogosta logo i Rogovkys teicīni vīnuotā stilistikā. Kūpā tyka īguoduoti 45 baneri – pa 15 nu kotra veida.  

Inga Vigule soka: “Baneri sovā veidā kai Rogovkys gostim, tai pošim dzeivuotuojim veicynoj vītys apziņu – mes asam Rēzeknis nūvods, Nautrānu pogosts, Rogovka, i mes runojam latgaliski. Baneru uzstuodeišonys pyrmajuos dīnuos socialajūs teiklūs izavērse diskuseja par latgalīšu volūdys pareizraksteibu i latgalīšu vuordim, kas sovu reizi aktualizēja tū, kas ir sarunvolūda i kas – pareizraksteiba. Latgalīšu volūdys īvīsšona apleicejā vidē roda autentiskuma sajiutu – mes asam Latgolā.”