Rokstu sagataveja: portals lakuga.lv

Daugovpiļs Nūvodpietnīceibys i muokslys muzejs (DNMM) 2023. godā svieteis sovu 85. pastuoviešonys godadīnu. Itūšaļt muzejā nūteik dorbs pi materialu gatavuošonys gruomotai “Daugavpils mākslinieki”, kurā byus apsaverami ap 60 muokslinīku dorbu nu DNMM muokslys kruojuma kolekcejis, informej muzeja muokslys nūdalis vadeituoja Mairita Folkmane.

Izdavums tiks veiduots kai muokslys albums ar muokslinīka portretu, muokslys dorba fotografeju nu muzeja kruojuma i eisu anotaceju par autoru. Tys snēgs viestejumu par Daugovpiļs nūvoda muokslys atteisteibu laikā nu 1924. goda leidz 2022. godam, kuru sovūs pietejumūs raksturuos muokslys zynuotneicys Valentīna Liepa, Inga Bunkše i Aiga Dzalbe. Projektu atbolsta “Latvijas Valsts meži” i Vaļsts Kulturkapitala fonds Latgolys Kulturys programā 2022.

Kai viestej Mairita Folkmane, DNMM muokslys kruojumā itūšaļt atsarūn vaira nakai 1000 muokslinīku dorbu, kas atspīgeļoj godu symtu ilgu laika pūsmu kulturviesturiskā grīzumā. Kruojums pastuoveigai teik papyldynuots, partū muzejs ari pasasoka Daugovpiļs muokslinīkim Viktorijai Makarovai, Jūlijai Kuļgajevai, Olegam Marinoham, Dignai Gordijenko, Ilonai Linartei-Ružai, Dacei Pudānei, Alīnai Petkūnei, Elvīrai Sprindžukai, Olgai Gžibovskai, Sandrai Poplavskai, Aleksandrai Šļahovai, Anastasijai Dubovskai, Ksenijai Šinkovskai, Lilijai Zeiļai, Valdai Mežbārdei, Mairitai Folkmanei i Romualdam Gibovskim, kuri ar sovu muokslys dorbu duovynuojumim paguojušajā i itymā godā tū ir boguotynuojuši.